Məlahət Mürşüdlü: "Dərs ilinin sonunda məktəblilərin biliyinin imtahanla sınağa çəkilməsi metodu artıq geridə qalıb"
"Qiymətləndirmə imtahanlarını daha aşağı siniflərdə keçirmək zəruri fənlər üzrə şagirdlərin nəticələrini yaxşılaşdırmağa imkan verəcək". Bunu təhsil naziri Mikayıl Cabbarov jurnalistlərə açıqlamasında deyib. Nazir bildirib ki, bu il ərzində qiymətləndirmə imtahanlarının daha aşağı siniflərdə keçirilməsi məsələsi Təhsil Nazirliyində müzakirə edilib:
"Təhsil Nazirliyi tərəfindən Təhsil Problemləri İnstitutu qarşısında bu məsələ ilə bağlı vəzifə qoyulub. Hazırda bu istiqamətdə beynəlxalq təcrübə araşdırılır. Digər tərəfdən, ötən tədris ilinin sonunda Dövlət İmtahan Mərkəzi ilə işçi səviyyədə bununla bağlı müzakirələr aparılıb.
Müzakirələrdə belə bir qiymətləndirmənin aparılması imkanlarının mövcud olması qənaətinə gəlinib, amma biz bu tədris ili üçün bu qərarı vermirik. Belə həlledici qərarlar verilməmişdən öncə ekspertlər tərəfindən araşdırmalar aparılmalı, beynəlxalq təcrübənin öyrənilməsi başa çatdırılmalıdır".
Məsələ ilə bağlı fikir bildirən təhsil sahəsi üzrə ekspert Məhərrəm Zülfüqarlı "Bakı-Xəbər"ə açıqlamasında qeyd etdi ki, aşağı siniflərdə təhsil alan şagirdlərin imtahanla sınağa çəkilməsi düzgün deyil: "Kiçik yaşlı məktəbliləri imtahanla yükləmək olmaz. Onlar daim stress içində olacaq ki, dərs ilinin sonunda necə imtahan verəcək. 9 və 11-ci siniflərdə buraxılış imtahanının keçirilməsi məqbuldur. Aşağı siniflər üçün isə imtahan yox, onların il ərzində nə öyrəndiklərini sınamaq üçün müəyyən yoxlama işləri keçirilə bilər. Uşaqları sıxıntı, stress içində saxlamaq yox, ruhlandırmaq lazımdır".
Azad Müəllimlər Birliyinin sədri Məlahət Mürşüdlü bizimlə söhbətində bildirdi ki, şagirdlərin imtahanla sınağa çəkilməsi düzgün deyil: "Hazırda şagirdlərin biliyinin qiymətləndirilməsi üçün çox gözəl vasitələr var. Onlardan biri şagirdlər arasında şifahi sorğunun aparılmasıdır. Həmin sorğu əsasında şagirdlərin biliyi aşkar olunur. Və ona əsasən şagird qiymətləndirilir. Həm rüblük, həm də illik". Həmsöhbətimiz hesab edir ki, artıq imtahan ənənəsindən imtina etmək lazımdır. Onun sözlərinə görə, hər bir fənn üzrə ayda bir dəfə testlərdə həmin proqram əsasında sorğu aparmaq olar: "Belə bir sorğu uşaqları daha çox motivasiya edər. Dərs ilinin sonunda məktəblilərin biliyinin imtahanla sınağa çəkilməsi metodu artıq geridə qalıb. Şagird və valideynləri imtahan stressindən uzaq tutmaq üçün məktəblilərlə ayda bir dəfə bütün fənlər üzrə yazılı və ya şifahi sorğu keçirilə bilər. Həmin sorğular həm keçilən mövzuları əhatə edəcək, həm də məntiqə dayanıqlı olacaq. Belə olan şəraitdə uşaqların məntiqi təfəkkürü də inkişaf edəcək".
Günel CƏLİLOVA
