Xoş gördük ana məktəb! Məktəb doğma ana kimi bizi qoynuna alır, bəsləyib böyüdür, oxuyub yazmağı, müstəqil düşünməyi öyrədir, qəlbimizdə Vətənə, yurda, xalqa, dövlətə, bayrağa sevgi toxumları əkir.
Hər bir uşaq məktəbi isti ana qucağı, müəlliməsini isə doğma ana bilir. Uşaqlar məktəbə qədəm qoyanda özləri ilə bir dünya sevinc aparır, o sevincdən hər kəsə bir çimdik pay düşür. Birinci olmağın, birinci sinfə getməyin həyəcanı heç nə ilə ifadə oluna bilmir. Elə bir adam tapılmaz ki, ilk dərs gününü həyəcanla xatırlayıb ilk müəllimini yada salmasın. Məktəbdə ilk hərfləri, rəqəmləri ona öyrədən müəllim heç zaman unudulmur.
Xoş gördük ana məktəb, Al bizi ağuşuna. Ömrümüzü naxışla, Layiq olaq alqışına.
Birinciyik birinci, Həm dürdanə, həm inci. Ata-ana sevinciyik Tac olmuşuq başına. Hər bir uşaq qəlbi deyir ki, xoş gördük ilk dərs günü, salam əziz müəllimə.
Xalqımızın böyük oğlu Heydər Əliyev elmə, təhsilə qiymət verərkən deyirdi: "İnsan təhsilinin əsasını orta məktəbdə alır... Əgər onun fundamental, köklü orta təhsili varsa, o, cəmiyyətdə özünə yer tapacaq, çalışacaq, cəmiyyətimizin şüurlu üzvü olacaqdır". Bu misilsiz tövsiyə hər bir şagird üçün əsl örnəkdir.
Azərbaycan Respublikasının Prezidenti İlham Əliyevin 21 avqust 2004-cü il tarixli Sərəncamı ilə 15 sentyabr respublikamızda Bilik günü elan edilib. 12 ildir 15 sentyabr 1-cilərin həyəcan, sevinc, şadlıq dolu günlərinin şahidinə çevrilib.
15 sentyabr - Bilik günündə birinci sinfə gedənlər sırasında Azərbaycan Mətbuat Şurasının İdarə Heyətinin üzvü, "Bakı-Xəbər" qəzetinin baş redaktoru Aydın Quliyevin nəvəsi Nurman da var. Paytaxtın ümumtəhsil məktəblərindən birində birinci sinfə qədəm qoyan Nurman Quliyevlər ailəsinin sevincidir. Məktəbə böyük sevgi bəsləyən Nurmanı ürəkdən təbrik edirik! Nurman, uğurlarını gözləyirik. Ümid edirik ki, sən dərs əlaçısı olacaqsan!
İlk qədəmin mübarək, Çox sev ana məktəbi. Heç əlindən buraxma Dəftər, qələm, kitabı.
Nurman, bağlan məktəbə, Yolun uğurlu olsun! Gündəliyin hər zaman Beşlərlə dolu olsun!
Şadlığısan babanın, Könlü bağlıdır sənə. Yaxşı oxusan inan, Sevinc düşər nənənə.
Azərbaycan Yazıçılar Birliyinin üzvü, "Yada düşdü" jurnalının baş redaktoru Nəzakət xanım Məmmədovanın nəvəsi Şərqiyyə Mahmudlu da birincilərdəndir. Bakıda fəaliyyət göstərən liseylərdən birində birinci sinfə gedən balaca qızımız Şərqiyyəyə həmişə birinci olmağı arzu edirik. Hər bir uşaq ailənin sevinci, deyərdik ki, hərəkətverici qüvvəsidir. Şərqiyyə balanın məktəbə də işıq, nur saçacağına inanırıq.
Şərqiyyə bir şərqidir, Anasının qəlbində. Tanrı yazan nəğmələr Əzbər olsun dilində.
Ay qızların gözəli, Sevimli, əziz balam! Məktəbə ver könlünü, Ay qızılgülüm, laləm!
Şərqiyyə birinci ol, Həmişə həyatda sən. Bil ki, sevir ürəkdən Səni öz əziz nənən!
Qəzetimizin əməkdaşı İradə Sarıyevanın oğlu da bu il birincilər sırasına qoşulub. Bakı məktəblərindən birində ilk dərs gününü qarşılayan Əsgər Həsən Nazilə müəllimənin sinfində oxuyur. Əsgər həqiqətən də məktəbi çox sevir. Bundan başqa, Əsgər Həsən vətənpərvərdir, vətənə, torpağa aid çoxlu şeirlər bilir. Birinci sinfə getməsi münasibətilə Əsgər balanı da təbrik edirik! Qədəmlərin uğurlu, sayalı olsun Əsgər, ata-ananın ümidlərini hər zaman doğrult!
Əsgərim birincidir, Gedib məktəbə dünən. Deyir sevdim məktəbi, Fərəhdən doldu sinəm.
Uğuruna sevindim, Vətənsən mənə oğlum! Böyü qoru torpağı, İndi şəkər noğulum.
Əsgər, sev müəlliməni, O sənə bir dayaqdır. Oğlum, bil ki, hər zaman Elm adama dayaqdır!
Azərbaycan Yazıçılar Birliyinin üzvü, "Yada düşdü" jurnalının baş redaktoru Nəzakət xanım Məmmədovanın doğması Sənubər Məmmədova da birinci sinfə qədəm qoyub. Sənubər bala, Allah-Təala səni ucaltsın, məktəbə dəyən ilk qədəmin uğurlu olsun! Arzu edirik ki, qiymətin hər zaman 5 olsun!
Sənubər qızım, Sən bir işıqsan! Doğma evimə Düşən işıqsan.
Mübarək günün, Birinci oldun. Kövrək könlümün Sevinci oldun!
Kitabın əlvan, Dəftərin gözəl. Uğurun çox olsa, Anan sevinər!
Qəzetimizin əməkdaşı Vidadi Ordahallının qızı Nuray da dünən məktəbə yollanıb. Nurayın dərslərində uğurlar əldə edəcəyinə inanırıq. Valideynlərinin sevinci, müəllimlərinin fəxri olasan, Nuray bala.
Nuray nur parçasıdır, Sevir dərsi, kitabı. Atasının sevinci, Gül-çiçəyi, gülabı. Sevinir evdə hamı, Bilik günün mübarək!
Ay ananın çırağı, Əlində bir nazlı çiçək. Sən məktəbə gedirsən, Şadlanırıq ürəkdən. Tanrı ucaltsın səni, Seçilmirsən mələkdən.
Nurmanın, Şərqiyyənin, Əsgərin, Sənubərin, Nurayın timsalında ilk dəfə məktəbə qədəm qoyan birinciləri ürəkdən təbrik edir, onlara uğurlar, bol şanslar arzu edir, valideynlərinə, nənə-babalarına gözaydınlığı veririk!
Ümidimiz sizədir, əziz balalar! Gələcəyimiz sizdən, sizin xoş əməlinizdən, bilik və bacarığınızdan başlayır! Yolunuz, iziniz, yeni dərs gününüz mübarək!
Günel CƏLİLOVA
