"Bu onların keyfiyyətli təhsil almasına kömək edəcək"
Azərbaycanda yeni müasir tələbə yataqxanası inşa ediləcək. Təhsil naziri Mikayıl Cabbarov mətbuata müsahibəsində deyib ki, ali təhsil müəssisələrində, xüsusilə böyük şəhərlərdə, ilk növbədə paytaxtda tələbə yataqxanalarının az olmasının, bir çox universitetlərdə isə ümumiyyətlə olmamasının səbəbləri yaxşı məlumdur:
"Bizim təşəbbüsümüzə müsbət cavab verərək Heydər Əliyev Fondunun dəstəyi və təşəbbüsü əsasında şəhərimizin mərkəzi hissəsində 1000 nəfərlik tələbə yataqxanasının layihəsinə start verilib. Bu layihə dövlət-özəl tərəfdaşlığının daha bir nümunəsidir. Hazırda layihələndirmə işləri başa çatdırılıb və yaxın günlərdə tikinti işlərinə başlanacaq. Müasir tələbə yataqxanası bu gün mövcud olan ən müasir standartlara uyğun olaraq tələbə infrastrukturunu və bugünkü həyat tərzini nəzərə almaqla inşa ediləcək".
Təhsil naziri qeyd edib ki, yeni yataqxana layihəsi dövlətin müvafiq ali təhsil müəssisəsinin, xüsusilə Dövlət Neft və Sənaye Universitetinin balansında olan ərazilərdə həyata keçiriləcək: "Lakin bu layihənin özəlliyi var. Biz belə bir fəlsəfə və siyasət həyata keçirəcəyik ki, yalnız Dövlət Neft və Sənaye Universitetinin tələbələri deyil, ehtiyacı olan digər ali təhsil müəssisələri də tələbələrini müvafiq kvotalara uyğun olaraq həmin tələbə yataqxanalarında yerləşdirmək imkanı qazansınlar".
Neçə illərdir rayonlardan Bakıya ali təhsil almağa gələn tələbələr yataqxana problemindən əziyyət çəkir. Onlar məcburən baha qiymətə kirayə ev tutmalı olur. Bu da onların təhsil almasında çətinliklərin yaranmasına səbəb olur. Bu baxımdan 1000 nəfərlik yataqxana tikintisini ekspertlər necə dəyərləndirir? Məsələyə münasibət bildirən ekspert Rəsul Cahangirli "Bakı-Xəbər"ə açıqlamasında sözügedən təşəbbüsü dəstəklədiyini bildirdi: "Sovet dönəmində, demək olar ki, bütün ali məktəblərin yataqxanaları var idi. Bu yataqxanalar tələbələrin sosiallaşması üçün çox böyük önəm kəsb edirdi. Yataqxanaların həyətində idman meydançaları, kitabxanalar var idi. Əyalətdən gələn tələbələrin çox böyük hissəsi həmin yataqxanalarda yerləşirdi və bu onların formalaşmağında, sosiallaşmağında müəyyən rol oynayırdı. Bu həm də daha yaxşı oxumaq üçün şərait yaradırdı. Ancaq sovetlər dağıldıqdan sonra təhsil müəssisələrinin yataqxanalarının böyük bir qismi, demək olar ki, təmir olunmadı, sıradan çıxdı. Digər bir qismində isə qaçqın və məcburi köçkünlər məskunlaşdı. Ona görə də yeni yataqxanaların tikilməsi, köhnə yataqxanaların bəzisinin əsaslı təmir olunması müsbət addımdır. Bu istiqamətdə görülən işlər gələcəkdə öz müsbət effektini verəcək. Bu onların keyfiyyətli təhsil almasına kömək edəcək". Vidadi ORDAHALLI
