"15-20 yaş arasında olan cütlüklərin boşanması səbəblərindən biri onların evliliyə hazır olmamasıdır"
Rəsmi statistikaya görə, ölkədə nikah bağlayan hər 5 cütlükdən biri sonradan yollarını ayırır. Bəziləri buna səbəb kimi sosial problemləri göstərir, digər qənaətlərə görə, valideynlərin müdaxiləsi, iqtisadi çətinlik, gənclərin bir-birinə güzəştə getməməsi boşanmalarda mühüm rol oynayır. Boşananlar arasında müxtəlif yaş kateqoriyasında olanlar var. Onların arasında yeni ailə quran cütlüklər üstünlük təşkil edir.
Dövlət Statistika Komitəsinin yaydığı məlumata görə, 2015-ci ildə nikaha girən 15-17 yaşarası 1 kişi, 17-19 yaşarası isə 11 kişi boşanıb. Ötən il boşanan 12 gəncin evliliyi 5 ilə qədər davam edib.
Ötən il nikaha girən 20 yaşa qədər qadınların sayı çox olduğu kimi, boşananların sayında da kişilərə nisbətən böyük rəqəmlər müşahidə edilir. Belə ki, 2015-ci ildə 15-17 yaşarası 3 qadın, 18-19 yaşarası isə 176 qadın boşanıb. Ötən il boşanan 179 qızın da evliliyi 5 ilə qədər davam edib.
Boşananlar arasında 15-20 yaşarası gənclərin olması cəmiyyəti narahat edir.
Sosioloq Anar Məmmədov "Bakı-Xəbər"ə açıqlamasında qeyd etdi
ki, son zamanlar ailələrin dağılması Azərbaycanda adi hala çevrilib. Hər gün kiminsə ayrıldığını ve ya boşandığını eşidirik: "İnsanlar birgə yaşamağı bacarmadıqda artıq əvvəlki kimi dözümlülük nümayiş etdirmir, birdəfəlik ayrılırlar. Ailə qurmaq çox ciddi məsələdir və bu addımı atmazdan əvvəl ətraflı düşünməli, maddi baxımdan hazırlıqlı olmalı və gələcəkdə mütləq kompromisə getməyi bacarmaq lazımdır".
Həmsöhbətimiz 15-20 yaş arasında olan cütlüklərin boşanması səbəbi kimi onların evliliyə hazır olmamasını göstərir: "Ailələrin dağılmasının birinci səbəbi gənclərin buna hazır olmamasıdır. Çətin bir vəziyyətə düşdükdə, yaxud aralarında yaranan mübahisəni müzakirə edib həll etmək əvəzinə, ayrılmaq barədə qərar verirlər. Hətta ilk mübahisə yaranan kimi məhkəməyə müraciət etməkdən belə çəkinmirlər.
Digər səbəb isə maddi baxımdan yaranan problemlərdir. Bəllidir ki, 15-20 yaşında ailə quran cütlüklər valideynlərindən asılı olur. Onlar özləri evə qazanc gətirmədiyi üçün ailədə narazılıqlar yaşanır. Bəy işləmir, gəlin isə maddi ehtiyaclarını ödəmək üçün ya qaynana, ya da qaynataya müraciət etməli olur. Bu cür ailələrdə əksərən problemlər yaşanır. Bəzi hallarda boşanmaların səbəbi olaraq xasiyyətlərin düz gəlmədiyi göstərilsə də, əslində boşanmanın əsl səbəbi maddi problemlərdir. Yeni qurulan ailələrin dağılmasının bir səbəbi də seksual problemlərlə bağlıdır. İntim həyatda harmoniyanın pozulması və ya uyğunsuzluq boşanmanın səbəblərindən biridir".
Sosioloq onu da əlavə etdi ki, yeni ailə quran cütlüklərin boşanması səbəblərindən biri də qadın və ya kişinin öncəki həyatıdır: "Yəni qadının və ya kişinin əvvəlki həyatında uğursuzluğu, sevdiyi insan ola-ola başqası ilə ailə qurması, acığa ailə qurması, evdə qalmamaq üçün, necə deyərlər, gözüyumulu ərə getməsi o ailənin uzunömürlü olmasını sual altında qoyar. Əksər hallarda rayon yerlərində yaşayan qızlar və ya oğlanlar valideynin istəyi ailə qurur. Onlardan "sevdiyin varmı" sualı soruşulmur. Filankəslə ailə qurmalısan və söhbət bağlanır. Birdə ayılırlar ki, artıq bunlar yola gedə bilmir və iş məhkəməyə çatıb. Sevmədən qurulan ailələrin dağılmasına səbəb qadının həyat yoldaşında sevdiyi insanın xarakterini, davranışlarını axtarıb tapa bilməməsidir".
Günel CƏLİLOVA
