Vaqif Qarayev: "Elektron səhiyyə kartının olmasının həm səhiyyəyə, həm tibb işçilərinə, həm də vətəndaşlara xeyri var"
Səhiyyə Nazirliyi tərəfindən vətəndaşlar üçün elektron səhiyyə kartının yaradılması nəzərdə tutulur. Nazirliyin yaydığı məlumata əsasən, hər bir vətəndaş üçün yaradılması nəzərdə tutulan elektron səhiyyə kartında vətəndaşın təcili yardıma nə zaman müraciət etməsi, hansı diaqnozla müalicə alması barəsində məlumatlar toplanacaq. İstənilən tibb müəssisəsinə müraciət etdiyi halda vətəndaşa məxsus kod nömrəsini və ya şəxsiyyət vəsiqəsinin nömrəsini sistemə daxil etməklə həmin şəxsin sağlamlığı barədə məlumat əldə etmək mümkün olacaq.
Elektron səhiyyə kartının özəllikləri barədə məlumat əldə etmək üçün həkim-ekspertlərə müraciət etdik. Professor, həkim-ekspert Adil Qeybulla "Bakı-Xəbər"ə açıqlamasında qeyd etdi ki, elektron səhiyyə kartı, bir növ, tibbi kartdır: "Elektron səhiyyə kartında xəstə haqqında bütün məlumatlar qeyd olunacaq. Onun keçirdiyi əməliyyatlar, hansısa xəstəlik daşıyıcısı olub-olmadığı və digər faktorların hər biri qeyd olunacaq. Belə bir kartın olması yaxşıdır, ancaq vətəndaşların sosial müdafiəsi yüksəlməmiş, icbari tibbi sığorta formalaşdırılmadan vətəndaşın elektron səhiyyə kartından fayda görəcəyini düşünmürəm. Bizi gedən proseslər yox, nəticə maraqlandırır". Həkim Vaqif Qarayev bizimlə söhbətində bildirdi ki, elektron səhiyyə kartından bütün dünyada istifadə olunur: "Elektron səhiyyə kartının olmasının həm səhiyyəyə, həm səhiyyə işçilərinə, həm də vətəndaşları xeyri var. Məsələn, uşaq anadan olan zaman onda hər hansı bir xəstəlik qeydə alınıbsa, həmin faktlar adıçəkilən kartda əks olunur. Uşağa vurulması nəzərdə tutulan peyvəndlərin hansınınsa ona uyğunluğu kimi faktlar da qeyd olunur. Uşaq böyüyəndən sonra da onun səhhətində yaşanan bütün hallar həmin elektron səhiyyə kartında qeyd olunur. Ola bilsin ki, bir insan epilepsiya xəstəsidir. Həmin şəxs epilepsiya xəstəsi olduğunu gizlədib demir. Ancaq şəxsin kartında onun xəstəlik daşıyıcısı olduğu qeyd olunur. Bu mənada elektron səhiyyə kartının yaradılması müsbət təklifdir".
Həmsöhbətimiz təklif edir ki, elektron səhiyyə kartının hər yerdə oxunulması üçün mərkəzləşdirilmiş şəbəkə yaradılsın.
V.Qarayevin sözlərinə görə, elektron səhiyyə kartının olması həm həkimin vaxtına qənaət edir, həm də xəstə haqqında bütün informasiyalar həmin kartda əks olunacaq: "Belə məlumat var ki, təcili yardım və reanimasiya şöbələrində elektron səhiyyə kartının tətbiqi müzakirə olunur. Məncə elə bu sahələrə tətbiq olunması daha vacibdir. Çünki reanimasiyada olan xəstələrin vəziyyəti ağır olur və onlar özləri haqqında məlumat verə bilmir. Həkim həmin kartla tanış olduqdan sonra xəstə haqqında məlumat əldə edir. Təcili yardım sahəsində adıçəkilən kartın olması mühümdür. Bəzən elə hallar olur ki, xəstə təcili yardım işçilərinə ünvanı dəqiq başa sala bilmir. Belə olan halda, təcili yardım işçiləri xəstənin elektron səhiyyə kartı ilə tanış olduqdan sonra ünvanı rahatlıqla tapa biləcək. Elektron səhiyyə kartının yaradılmasının tərəfdarıyam".
Günel CƏLİLOVA
