"Belə olsa, o zaman ölkənin turizmdən əldə etdiyi gəlirlər artacaq"
Azərbaycanda turizmin mövsümi xarakter daşımasının aradan qaldırılması ilə bağlı işlər də davam etdiriləcək. Bunu mədəniyyət və turizm naziri Əbülfəs Qarayev Azərbaycan Turizm Assosiasiyasında (AZTA) turizm şirkətlərinin nümayəndələri ilə keçirilən toplantıda deyib.
Nazir bildirib ki, bunun üçün dəniz turizminin inkişafı, rekreasiya zonalarının yaradılması, sağlamlıq turizminin növlərinin artırılması, qış turizminin daha da inkişaf etdirilməsi də əsas istiqamətlərdəndir: "Azərbaycana xarici turistlərin cəlb olunması üçün təbliğat işlərinin daha da gücləndirilməsi vacibdir. Ölkəmizdə "Tax free" sisteminə qoşulan ticarət obyektlərinin sayının artırılması təmin olunacaq".
Nazir bildirib ki, "şopping festival"ların keçirilməsi istiqamətində görüləcək işlərlə əlaqədar olaraq turizm obyektləri də müvafiq təkliflər verə bilər.
Sözügedən məsələ ilə bağlı fikirlərini "Bakı-Xəbər"lə bölüşən ekspert Zakir Əhmədov hesab edir ki, bu olduqca vacib təşəbbüsdür: "İnkişaf etmiş ölkələrdə turizmin bu növündən çox bacarıqla istifadə edirlər. Məsələn, Şimali Kiprdə turizm mövsümü cəmi 4-5 ay olduğu halda, bu ölkənin turizm təmsilçiləri bunu 7-8 aya çatdırıb. Elə ölkələr də var ki, bütün mövsümlərdə ora turist gəlir. Turizmin inkişaf etdiyi ölkələrdə turist axınının bərabər paylanması üçün bu növdən bacarıqla istifadə edirlər. Nəticədə turistlər təkcə bir mövsüm deyil, bütün ilboyu gəlir. Belə işgüzar tədbirlər adətən yaz və ya payız mövsümündə təşkil edildiyindən, turist axınının tənzimlənməsində əhəmiyyətli rol oynayır. Azərbaycanda da bütün mövsüm boyu turistlərin gəlməsi üçün şərait yaradılmalıdır. Məlum olduğu kimi, "Şahdağ"da qış turizminin inkişafı üçün hərtərəfli şərait yaradılıb. Hesab edirəm ki, analoji şərait digər bölgələrdə də yaradılmalıdır. Belə olsa, o zaman Azərbaycanın turizmdən əldə etdiyi gəlirlər artacaq. Təkcə bir mövsümdən asılılıq olmayacaq". Vidadi ORDAHALLI
