"Toylar haqqında qanun qəbul olunarkən insanların toylar haqqında düşüncələri nəzərə alınmalıdır"
Elimizin toy kimi gözəl adəti var. Ancaq təəssüf ki, bu adət-ənənə müasirləşdirilərək keçmişdən əsər-əlamət qalmayıb. Ailə qurmaq istəyən cütlüklər toyun onlara neçəyə başa gələcəyini öncədən götür-qoy etdikləri üçün bəzən ailə qurmaqdan yayınır.
Azərbaycanda toy mərasimləri haqqında qanun qəbul olunması təklif olunur. Belə bir təklifi millət vəkili Məlahət İbharimqızı irəli sürüb. O qeyd edib ki, toy mərasimləri haqqında qanunun qəbulu uzun müddətdir müzakirə mövzusu olsa da, hələ ki, belə bir sənəd qəbul olunmayıb: "Toy adət-ənənələrini xalqımız yüz illər boyu yaşadıb, ancaq toy mərasimlərinin tənzimlənməsi ilə bağlı Milli Məclisdə qanunun qəbul edilməsi bu gün vacibdir. Hazırda dünyada ciddi maliyyə böhranı mövcuddur və əlbəttə ki, bu vəziyyət Azərbaycana da təsir edir. Xüsusən də belə bir məqamda insanların israfçılığa yol verməsi doğru deyil. Lakin çox vaxt bu onlardan asılı olmur. Süni yaradılan problemlər ucbatından insanlar qənaət edə bilmir və son nəticədə ziyana düşürlər".
M.İbrahimqızı deyib ki, şadlıq evlərinin sahibləri mafiya, qrup yaradıb: "Bu toy mafiyaları sadə insanlara imkan vermir ki, onlar öz büdcələrinə uyğun menyu seçsinlər. Şadlıq evləri öz qiymətlərini diktə edir, süni şəkildə qiymətləri artırırlar. Bu, mədəni yolla vətəndaşları soymaqdır. Menyu vətəndaşların imkanlarına uyğun tərtib edilməlidir. Bu səbəblərdən parlamentdə toy mərasimləri ilə bağlı qanun layihəsi hazırlanmalıdır. Bu məsələdə qanun öz sözünü deməlidir".
Ekspertlər də toy mərasimi haqqında qanunun qəbul olunmasının tərəfdarıdır.
Sosioloq Anar Məmmədov "Bakı-Xəbər"ə açıqlamasında bildirdi ki, toy da hər bir vətəndaşın fərdi istəyidir. Hər kəs övladına bir cür toy etmək istəyir: "Buna görə bu məsələləri sərt şəkildə tənzimləmək olmaz. Amma düşünürəm ki, rəngləri çox qaraltmadan bu məsələni tənzimləmək olar. Hesab edirəm ki, toylarda lazımsız israfçılığa düzən verməyin vaxtı çoxdan çatıb. Toylarda təkcə yemək yox, insan da israf olunur. Bizdə toy etmirlər, adama toy tuturlar. Amma bu o demək deyil ki, dəbdəbəli toy edənlərin hüquqlarını pozmalıyıq. Adam var pulu çoxdur, hara xərcləyəcəyini bilmir. Hər kəsin öz seçimi var. Nəyin yanlış olduğunu hamı bilir. İnzibati metodların tətbiq olunmasına əsas yoxdur. Məsələn, nəyə əsasən deyə bilərik ki, sən filan-filan prinsiplərə görə toyunda filan yeməkləri verə bilməzsən. Adamın pulu var, verir. Bunu tənzimləmək olmaz. Deməyim odur ki, hər kəsin öz seçimi var. Biri oğluna aləmə səs salan, dəbdəbəli toy etmək istəyir. Eləsi də var sadə nikahla kifayətlənir. Yaxşı olar ki, restoranlarda stolun qiyməti hər kəsin büdcəsinə uyğun olsun. Toylarda yeməklərin təqdimatına ciddi fikir vermək lazımdır. Allaha çox şükür ki, bir tikə çörəyi hamımız tapırıq, hamımız yeyirik. Masanın üzərini lazımsız salatlarla doldurmağın mənası yoxdur. Toylarda insanların narazılıq etdiyi məqamlardan biri də musiqidir. Toyu tamadanın çıxışı, musiqinin o qulaq yormayan notu ilə daha maraqlı, daha əyləncəli etmək olar. Biz konsertə qulaq asmağa getmirik ki... Toyda həm yeməklər, həm də musiqi xüsusi qayda əsasında tərtib olunmalıdır".
Həmsöhbətimiz təklif edir ki, parlamentin payız sessiyasında mərasimlər haqqında qanun qəbul olunarkən insanların toylar haqqında düşüncələri nəzərə alınsın. Dəbdəbəli toylardansa sadə mərasimə keçmək lazımdır: "Sadə toyları təbliğ etsək, gənclər bu cür mərasimə üstünlük verər".
Günel CƏLİLOVA
