"Turizmin nəbzinin tutulması və qiymət baxımından 2 və 3 ulduzlu otellərin tikilməsi vacib şərtlərdəndir"
Yaxın gələcəkdə ölkəmizdə 2, 3 ulduzlu otellər şəbəkəsinin yaradılması nəzərdə tutulur. Bunu mədəniyyət və turizm naziri Əbülfəs Qarayev Azərbaycan Turizm Assosiasiyasında (AZTA) turizm şirkətlərinin nümayəndələri ilə keçirilən toplantıda deyib. Toplantıda Prezident İlham Əliyevin sentyabrın 1-də imzaladığı "Azərbaycan Respublikasında turizmin inkişafı ilə bağlı əlavə tədbirlər haqqında" Sərəncamından irəli gələn məsələlər geniş müzakirə olunub.
Sərəncamın əhəmiyyətini diqqətə çatdıran nazir bildirib ki, Azərbaycanda turizm sənayesinin inkişafı üçün atılan addımlar öz bəhrəsini verməkdədir: "Bu gün turizm Azərbaycan iqtisadiyyatının qeyri-neft sektorunun aparıcı qüvvəsinə çevrilməkdədir. Son bir neçə ildə ölkəmizdə böyük turizm infrastrukturu qurulub, brend otellər istifadəyə verilib. Bunun nəticəsində dünya turizm bazarında Azərbaycan lüks turizm xidmətləri təklif edən ölkə kimi tanınıb. İndi bu sahədə görülən işlər davam etdirilməkdədir. Yaxın gələcəkdə 2, 3 ulduzlu otellər şəbəkəsinin yaradılması nəzərdə tutulur. Bununla da ölkəmizə müxtəlif təbəqələrdən olan xarici turistlərin axını təmin edilmiş olacaq".
Ekspertlər də ölkədə 2-3 ulduzlu otellər şəbəkəsinin yaradılmasının tərəfdarıdır.
Turizm sahəsi üzrə ekspert Çingiz İsmayılov "Bakı-Xəbər"ə açıqlamasında qeyd etdi ki, 2-3 ulduzlu otellər şəbəkəsi yaratmazdan öncə müəyyən sayda eyni ulduzu olan otellər tikilməlidir: "Müəyyən sayda 2-3 ulduzlu otel yaradılmamış otellər şəbəkəsi yaradıla bilməz. Bəllidir ki, hazırda maliyyə böhranı yaşanır. Bu böhranın az da olsa təsiri Azərbaycanda da hiss olunur. Belə şəraitdə 3 ulduzlu otel şəbəkəsinin yaradılması sual doğurur. Otel şəbəkəsinin yaradılması üçün gərək 15-20 sayda 2-3 ulduzlu otel yaradılsın. Mədəniyyət və Turizm Nazirliyi xarici investorları otel şəbəkəsi yaratmağa cəlb edibsə, bunu ictimaiyyətə açıqlasınlar". Ekspertin fikrincə, turizmin nəbzinin tutulması və qiymət baxımından 2 və 3 ulduzlu otellərin tikilməsi vacib şərtlərdəndir: "Bakı şəhərində 2 və 3 ulduzlu otellərə tələbat daha çoxdur və getdikcə bu tələbat artacaq. Çünki Azərbaycanın iqtisadi qüdrəti artdıqca, Bakı şəhərinin nüfuzu da yüksəlir. Bu isə şəhərimizin qonaqlarının sayının çoxalmasına rəvac verir. Artıq paytaxtımıza gələn insanların tələbatını ödəyəcək qədər 5 ulduzlu otellərimiz var. Bu baxımdan artıq 2 və 3 ulduzlu otellərə tələbat artıb".
Günel CƏLİLOVA
