"Gecə saatlarında qəzaların çoxu məhz sürücülərin yorğunluğu səbəbindən baş verir"
Son vaxtlar baş verən yol qəzalarının əsas səbəbləri araşdırılarkən sürücülərin sükan arxasında yorğun və yuxulu olması faktlarına da rast gəlinir. Bunu nəzərə alan DİN Baş Dövlət Yol Polisi İdarəsinin rəisi, general-mayor Ramiz Zeynalov DYP-nin şəhərlərarası yollardakı stasionar postlarında sürücülərin istirahətinin təmin edilməsi ilə bağlı göstəriş verib. Göstərişə əsasən, bütün DYP postlarında sürücülərin qısamüddətli istirahəti üçün şərait yaradılıb.
Araşdırma zamanı məlum olub ki, həqiqətən də postlarda əl-üz yuma yerləri quraşdırılıb və orada dəsmal, sabun və salfet qoyulub. Bundan əlavə, sürücülərin post ərazisində qısa müddətdə avtomobili park etməsinə də şərait yaradılıb.
Postda xidmətdə olan DYP əməkdaşları bildirir ki, bu addımın atılması yorğun və yuxulu sürücülərə kömək etmək məqsədi daşıyır. Bununla da bu qəbildən olan sürücülər tərəfindən törədilən yol-qəza hadisələrinin qarşısını almaq mümkün olar. Sürücülər burada rahat şəkildə fasilə edə və yaradılan imkanlardan faydalana bilər. Artıq bəzi sürücülər bu imkanlardan istifadə edir.
Həqiqətən də yorğun halda sükan arxasında əyləşən, yuxulayan sürücülərin uzaq məsafələrə sərnişin daşıması risqlidir. Dəfələrlə bu səbəbdən ağır qəzalar baş verib. Baxmayaraq ki, "Yol hərəkəti haqqında" Qanuna əsasən, yorğun halda avtomobili idarə etmək qadağandır. O üzdən, sürücülərin bu imkandan faydalanması tövsiyə olunur.
Maraqlıdır, bəs ekspertlər bunu necə dəyərləndirir?
Məsələyə münasibət bildirən ekspert Azər Allahverənov buna müsbət prizmadan yanaşdı: "Gecə saatlarında qəzaların çoxu məhz sürücülərin yorğunluğu səbəbindən baş verir. O baxımdan uzaq məsafələrə gedən sürücülərin istirahəti üçün şəraitin yaradılması olduqca vacib amildir. Onu da qeyd edim ki, Azərbaycanda təklif olunan bu ideya ilk deyil. Beynəlxalq təcrübədə də bundan istifadə edilir. Məsələn, Ukraynada bu artıq 2012-ci ildən tətbiq olunur. Bundan başqa, Avropanın inkişaf etmiş ölkələrində də bu var. O baxımdan Azərbaycanda da bunun tətbiq olunması qəzaların sayına öz təsirini göstərəcək. Bundan başqa, biz dəfələrlə onun şahidi olmuşuq ki, gecə saatlarında sürücü maşını çəkib yolun kənarına istirahət edir və sonra yoluna davam edir. Ona görə də stasionar postların yanında o cür istirahət yerlərinin olması faydalıdır. Hesab edirəm ki, bunun müsbət effekti olacaq".
Vidadi ORDAHALLI
