"Doktorantlar sıxıntı çəkmədən həm sosial həyatını yaşayacaq, həm də elmi işlərini davam etdirəcək"
Azərbaycanda doktoranturada təhsil alanlara təhsil kreditləri veriləcək. Bu barədə Azərbaycan Milli Elmlər Akademiyasının vitse-prezidenti İsa Həbibbəyli Akademiyanın Rəyasət Heyətinin iclasında bildirib.
O deyib ki, doktoranturanı bitirənlər həmin kreditləri 10 il müddətinə ödəyəcək. Onun sözlərinə görə, artıq bu ildən Təhsil Nazirliyi bakalavrlara təhsil kreditlərinin verilməsinə başlayıb, növbəti ildən bu, doktorantura üzrə də təşkil ediləcək: "Təhsil krediti ilə doktoranturada təhsil alan bakalavrın bütün yaşayış minimumu - yataqxana, kirayə xərcləri ödəniləcək. Təhsil Nazirliyi müəyyən edib ki, 1 tələbənin 4 il ərzində təhsil xərcini ödəmək üçün 20 min ABŞ dolları lazımdır. Doktorantura üzrə xərclər isə 25-30 min dollar olacaq. Bu vaxta kimi doktorantura 90 % ödənişsiz əsaslarla təşkil edilir. Ödənişli təhsil alan doktorantlara kreditlərin verilməsi onların təhsilinə müsbət təsir göstərəcək".
Ekspertlər doktoranturada təhsil alanlara kredit verilməsini müsbət qarşılayır. Onların fikrincə, bu addım təhsilin və elmin inkişafına səbəb olacaq.
Təhsil sahəsi üzrə ekspert Rafiq İsmayıl bizimlə söhbətində bildirdi ki, doktorantlara uzunmüddətli kreditin verilməsi elm sahəsində dönüş yarada bilər: "Bəllidir ki, bu gün elmə maraq azdır. Gənclər elmlə məşğul olmaqdan yayınır. Bunun səbəbi isə bu sahədə gəlirin az olmasıdır. Alimlərin öz təcrübə və ya araşdırmalarını davam etdirməsi üçün onlara maddi vəsait lazım olur. İşlərini görmək üçün bankdan götürdükləri kreditlə bu istəklərini tam reallaşdıra bilmirdilər. Artıq bu problemlər geridə qaldı. Doktorantlar sıxıntı çəkmədən həm sosial həyatını yaşayacaq, həm də elmi işlərini davam etdirəcək. Doktorantlara kreditin verilməsi Azərbaycan elminə yeni nəfəs gətirəcək".
Həmsöhbətimizin sözlərinə görə, doktorantlara güzəştli kredit verilməsi onların sosial həyatının normal məcraya düşməsinə təsir edəcək: "Alimlər uzunmüddətli və güzəştli kreditlə əmək fəaliyyətinə başlaya bilər. Elm sahəsində edilən istənilən mütərəqqi dəyişiklik onun inkişafına müsbət təkan verir".
Günel CƏLİLOVA
