Bakı şəhərində nəqliyyat axınında sıxlığın yaranmasına səbəb olan başlıca amillərdən biri avtomobillərin düzgün park edilməməsidir. Qanunsuz parklama hallarının paytaxt yollarında tıxaclara səbəb olduğu hamıya məlumdur.
Bir müddət əvvəl paytaxt küçələrində qanunsuz parklamanın qarşısını almaq üçün parkomat sisteminin tətbiqinə başlandı. Müəyyən olunmuş ərazilərdə sürücülər üçün avtomobillərini park etmələri məqsədilə xüsusi parkomatlar quraşdırılmasına baxmayaraq, hələ də qadağan olunan yerlərdə parklamalar müşahidə edilir. Bundan əlavə, məlumat üçün bildirək ki, paytaxtda parkomatlar quraşdırılan və eyni zamanda, avtomobilin saxlanmasını qadağan edən yol işarələri qoyulmuş ərazilər də mövcuddur. Bununla bağlı Bakı Nəqliyyat Agentliyi tərəfindən monitorinqlərə başlanıb.
BNA-nın İctimaiyyətlə əlaqələr və maarifləndirmə şöbəsinin müdiri Nuridə Allahyarova "Bakı-Xəbər"ə bildirib ki, bütün bu proseslərə nəzarət etmək məqsədilə İNS layihəsi çərçivəsində Bakı şəhəri üzrə quraşdırılmış 44 parklamaya nəzarət kameraları bərpa edilib. O bildirib ki, həmin nəzarət kameraları, növbəli iş rejimində olmaqla, Nəqliyyatı İntellektual İdarəetmə Mərkəzində 12 nəfərlik işçi heyət tərəfindən müşahidə edilir: "Gün ərzində işçi qrup tərəfindən aşkarlanan qayda pozuntuları müvafiq cərimə tədbirlərinin görülməsi üçün aidiyyəti qurumlara təqdim edilir. Bununla əlaqədar sürücülərə parklama zamanı daha diqqətli olmağı, avtomobilini qanunsuz yerlərdə park etməməyi tövsiyə edirik".
Günel CƏLİLOVA
