"Meridian" - Esmira: "Apteklərə mütəmadi dərman göndəririk"
Məlum olduğu kimi, ölkə başçısı İlham Əliyevin Nazirlər Kabinetinin iclasında dərman preparatlarının qiymətinin baha olması ilə bağlı məlum açıqlamasından sonra, Tarif Şurasının yeni qərarına əsasən, dərman vasitələrinin ekspertiza xidmətlərinin və dövlət qeydiyyatına alınmış dərman vasitələrinin qiymətləri dövlət tərəfindən tənzimlənən mallar siyahısına daxil edildi. Beləliklə, dərman preparatlarının qiyməti dövlət tərəfindən tənzimləndi. Artıq bir neçə gündür şəhərdə fəaliyyət göstərən əczaxanalarda dərmanların satış qiymətində azalma müşahidə olunur.
Dərmanların satış qiymətinin azalmasına baxmayaraq, əksər apteklərdə dərman qıtlığı yaranıb. Bəzi əczaxanalarda rəflərin boş olmasını müşahidə etdik.
"Elmlər Akademiyası" metrostansiyasının qarşısında fəaliyyət göstərən aptekdə dərman qutularının qoyulduğu rəflər boş vəziyyətdə idi. Satıcıdan həmin rəflərin nə səbəbdən boş olduğunu və dərmanların niyə olmadığını soruşanda o bizə depodan mal göndərilmədiyini bildirdi.
Ölkə başçısı İlham Əliyev öz çıxışında deyib ki, yaşından asılı olmayaraq, hər kəsin dərmana ehtiyacı var. Əhali dərmanların satış qiymətinin endiyini eşidəndə sevinmişdi. Amma apteklərdə bir sıra preparatların olmaması alıcıların haqlı narazılığına səbəb olur.
Məsələnin ciddiliyini nəzərə alıb dərman depoları ilə əlaqə saxladıq.
İlk olaraq "Avromed Compani" MMC-yə müraciət etdik. Şirkətin
baş direktorunun müavani Şəhla Mahmudova "Bakı-Xəbər"ə açıqlamasında qeyd etdi ki, dərmanların qiymətinin tənzimlənməsi vətəndaşların sağlamlığına dövlət qayğısının təzahürüdür və "Avromed" şirkəti dərman qiymətlərinin dövlət tərəfindən tənzimlənməsini dəstəkləyir: "Son iki gündə mətbuatda apteklərdə dərmanların qıtlaşması haqqında xəbərlər yayılır. "Avromed" şirkəti pərakəndə satışla məşğul olmadığı üçün bu barədə dəqiq informasiyaya malik deyil. Lakin onu bildirmək istərdik ki, pərakəndə satış məntəqələrindən, yəni apteklərdən "Avromed" şirkətinə daxil olan sifarişlərin həcmi azalmayıb. Biz belə hesab edirik ki, qiymətlərin aşağı düşəcəyini gözləyən apteklər öz anbarlarında əvvəlki qədər mal qalığı saxlamır və buna görə də bəzi hallarda onlar hər hansı bir dərman preparatını aptek anbarında tam qurtardıqdan sonra sifariş verir".
Həmsöhbətimiz onu da əlavə etdi ki, qiyməti tənzimlənməmiş dərmanlar da bütün digər preparatlar kimi satışdadır. Qiyməti tənzimlənmədiyinə görə satışına məhdudiyyət qoyulan dərman preparatı yoxdur.
Ş.Mahmudovanın sözlərinə görə, böyük və ya kiçik dərman şirkəti olmasından asılı olmayaraq, qiymətlərin tənzimlənməsi prosesi əczaçılıq bazarının bütün iştirakçılarında eyni zamanda aparılır. "Avromed" şirkətində də qiymətlərin tənzimlənməsi İqtisadiyyat və Sənaye Nazirliyinin reqlamentinə, nazirliyin müəyyən etdiyi qaydalara və ardıcıllığa əsasən həyata keçirilir.
"Biomed" dərman deposunun nümayəndəsi Asəf Qayıbov qəzetimizə açıqlamasında bildirdi ki, onlar hər gün çalışdıqları apteklərə dərman göndərir: "Apteklər hansı dərmana ehtiyac olması haqqında bizə siyahı göndərir. Biz də onların siyahısına uyğun olaraq həbləri göndəririk".
A.Qayıbov onu da əlavə etdi ki, Nazirlər Kabinetinin göstərişindən sonra dərmanların satış qiyməti tənzimlənib: "Bəzi dərmanların satış qiyməti 2, bəzilərində isə 3 dəfə aşağı salınıb".
"Meridian" dərman deposunun nümayəndəsi Esmira xanım bizimlə söhbətində bildirdi ki, onlar mütəmadi olaraq apteklərə dərman göndərir. Hansı aptekdə dərman qıtlığı müşahidə olunursa, bu həmin əczaxananın fəaliyyətinə aid məsələdir. Dərmanların satış qiymətinə gəlincə, Esmira xanım bildirdi ki, preparatlar yeni qayda ilə satılır.
