"Azərbaycanda nikaha daxil olmaq istəyən 20 gəncdə QİÇS xəstəliyi aşkarlanıb". Bu barədə Elmi-Tədqiqat Hematologiya və Transfuziologiya İnstitutunun direktoru Zöhrə Əlimirzəyeva Movqe.az-a açıqlamasında məlumat verib. Z.Əlimirzəyeva bildirib ki, QİÇS aşkarlananlardan 19-u oğlan, biri qızdır.
Onun dediyinə görə, onların hər birinə fərdi şəkildə bu xəstəliyin aşkarlandığı barədə məlumat verilib. İnstitut direktoru qeyd edib ki, onların hər biri gəncdir. Həmin gənclər haqqında məlumat SPİD Mərkəzinə göndərilib. Z.Əlimirzəyevanın sözlərinə görə, nikaha daxil olmaq istəyən və QİÇS aşkarlanan şəxslərin bu məlumatı ailə qurmağa hazırlaşdığı şəxsdən gizlədəcəyi inanılmazdır: "Çünki onların mütləq əksəriyyəti analizin nəticələrini almağa birlikdə gəlir. Bundan əlavə, QİÇS xəstəliyinin olduğunu bilib bu xəstəliyi başqasına yoluxdurmaq cinayət məsuliyyəti yaradır".
Z.Əlimirzəyeva onu da qeyd edib ki, üç ayda "Nikaha daxil olmaq istəyən şəxslərin tibbi müayinədən keçmə Qaydası"na uyğun olaraq tibbi müayinə üçün müraciət edən 33 412 nəfər arasında talassemiya daşıyıcıları olsa da, onlardan yalnız 7-si cütlükdür: "Nikaha daxil olmaq istəyənlərdən birinin talassemiya daşıyıcısı olması gələcəkdə doğulacaq uşaq üçün təhlükə yaratmır. Yəni cütlüyün birində talassemiya aşkar olunursa, onların ailə qurması üçün heç bir problem olmur. Ona görə də biz talassemiya aşkarlanan hər iki cütlüklərin statistikasını açıqlayırıq. İndiyədək aparılan müayinələr zamanı 7 cütlüyün hər ikisinin talassemiya xəstəliyinin daşıyıcısı olduğu üzə çıxıb. Bəzi xəstələrdə isə sifilis xəstəliyi aşkarlanıb".
Ekspertlərin fikrincə, nikaha daxil olmaq istəyənlər arasında 20 nəfərdə təhlükəli xəstəliyin aşkar olunması həyacan siqnalının verilməsi üçün ciddi əsasdır. Qeyd edək ki, ailə qurmaq istəyən gənclərin sağlamlıq haqqında arayış təqdim etməsi iyunun 1-dən etibarən qüvvəyə minib. Bu müddət ərzində 20 gəncdə QİÇS xəstəliyinin aşkar olunması ekspertləri narahat edir.
Tibb elmləri doktoru, professor Adil Qeybulla "Bakı-Xəbər"ə açıqlamasında qeyd etdi ki, 20 gəncdə QİÇS virusunun aşkar olunması təhlükəli rəqəmdir. Onun sözlərinə görə, QİÇS xəstəliyi retroviruslar qrupuna aiddir: "Bu xəstəlik qan vasitəsilə yoluxur. Bundan başqa, xəstəliyin anadan uşağa keçməklə və cinsi əlaqə zamanı da yoluxması mümkündür. Hazırda xəstəliyin ən çox yayılması cinsi yolla baş verir. Xəstələrə qan köçürülərkən yoxlandığı üçün qan yolu ilə bu virusun keçməsi ehtimalı çox aşağıdır. Bundan əlavə, narkomanlar arasında bir şprisdən bir neçə nəfər istifadə etdiyi üçün onlar arasında da bu xəstəliyin yayılması ehtimalı və faktları daha yüksəkdir. Xəstəlik ilk 10 ildə heç bir əlamətlə özünü göstərmir. Bundan sonra isə xəstəlik bədəndə artıq çoxalır və immuniteti zəiflədir. Bu son dərəcə ciddi məsələdir. Xəstənin immun sistemi çox zəif olduğu üçün qidalanma faktoru nəticəsində xəstəliyin alovlanma dövrü daha qısa ola bilər. Və xəstəlik artıq baş verdiyi halda bədən müqaviməti çox zəif olduğu üçün insan adi soyuqdəymədən belə dünyasını dəyişir".
Həmsöhbətimizin sözlərinə görə, ailə qurmaq istəyən cütlüklərdən sağlamlıq haqqında arayış tələb edilməsinin qanuniləşməsinin müsbət effektləri artıq görünür: "Ailə quran cütlüklərdən sağlamlıq haqqında arayış tələb olunmasa idi, o zaman onlar xəstəliklərindən xəbərsiz nikaha daxil olacaqdılar. Və o zaman hər iki tərəf xoşbəxtliklə deyil, tam əksi ilə qarşılaşacaqdı. Bu kimi xoşagəlməz olayların yaşanmaması üçün sağlamlıq haqqında arayış tələb olunması təqdirəlayiqdir. Demək olar ki, 20 ailə faciə ilə üzləşməkdən yayındı".
Günel CƏLİLOVA
