Azərbaycandan bu il Həcc ziyarətinə gedəcək zəvvarlar üçün ayrılan yerlər tam dolmayıb. Bu barədə mətbuata Qafqaz Müsəlmanları İdarəsindən məlumat verilib. Məlumatdan o da aydın olub ki, hazırda 90 yer boş qalıb. Azərbaycana ayrılan yerlərdən nisbətən ucuz variant üçün 30 yer, nisbətən bahalı variant üçün isə 60 yer boşdur. Azərbaycana ümumilikdə 2400 zəvvar yeri ayrılıb. Ziyarət üçün sənəd qəbulu bu ayın sonunda başa çatacaq.
Qeyd edək ki, bu il Azərbaycanda Həcc ziyarəti üçün sənəd qəbulu martın 11-də başlayıb. Ziyarət sentyabrın 11-də başlayacaq. Bu il ilk dəfə olaraq sənəd qəbulunun vaxtı əlavə iki ay uzadılıb. Hər il olduğu kimi, bu il də zəvvarlara ziyarət iki variantda təklif olunur. Daha yaxşı şəraitli otellərdə qalmaq, yeməklərlə təmin olunmaq və 4 nəfərlik otaqlarda yerləşmək üçün təklif olunan variant 5750 dollar, nisbətən ucuz, 6 nəfərlik otaqlarda qalmaq üçün təklif olunan variantın qiyməti isə 4700 dollardır. Deməli, bu il adi xidmətlərlə Həcc ziyarətinə gedənlər təxminən 1500, VİP xidmətlərlə gedənlər isə 1700 manat əlavə pul ödəməlidir. Yaxın Şərqdə baş verən hadisələrlə əlaqədar ziyarət yalnız təyyarə ilə baş tutacaq. Uçuşları AZAL həyata keçirəcək. Bu il ilk dəfə olaraq ödənişlər ABŞ dolları ilə aparılır.
Onu da qeyd edək ki, 2012-ci ildə VİP xidmətlərlə Həcc ziyarəti 3850 manat, adi xidmətlər isə 3090 manat təşkil edib. Son iki ildə nisbətən şəraiti zəif və gündə iki dəfə yemək verilən otellərdə qalmaq istəyən zəvvarlar 3250 manat, daha yaxşı şəraitli və yeməkləri daha çeşidli olan otellərdə qalmaq istəyən zəvvarlar isə 4100 manat ödəməli olub.
Hər il azərbaycanlı zəvvarların sayında artım müşahidə edilib, ayrılan yerlər vaxtından əvvəl dolub. Bu il isə, əksinə, qeydiyyat müddətinin sonuna 4 gün qalmasına baxmayaraq, hələ də 90 yer boşdur.
Maraqlıdır, bu il Həcc ziyarəti üçün ayrılan yerlər niyə dolmayıb?
Məsələyə münasibət bildirən dinşünas Hacı Şahin Həsənli bunu dünyada gedən iqtisadi böhranla əlaqələndirdi: "Bunun bir neçə səbəbi var. Nəzərinizə çatdırım ki, hər il Həccə gedənlərin sayı artıb. Ötən il hətta yerlər tez dolduğundan, bir çoxları ziyarətə gedə bilmədilər. Bir il ərzində insanların dinə marağının azaldığını iddia etmək çətindir. Hesab edirəm ki, bu, sırf dünyada baş verən proseslərlə əlaqəlidir. Çünki Səudiyyə Ərəbistanı da qiymətləri artırıb. Nəinki Azərbaycandan, eləcə də dünya ölkələrinin hamısından Həcc ziyarətinə gedənlərin sayında azalma var. Mən birmənalı olaraq bunu iqtisadi amillərlə bağlayıram. Həm də nəzərə almaq lazımdır ki, ötən illərə nisbətən Səudiyyə Ərəbistanı tərəfindən ayrılan kvota 20 faiz azaldılıb".
Vidadi ORDAHALLI
