Almaniyada qaçqın sığınacaqlarına radikal sağçıların hücumu getdikcə böyüyür və daha təhlükəli şəkil alır. Şərqi Almaniyada xüsusilə PEGİDA (Avropanın İslamlaşdırılmasına qarşı Yurtsever Avropalılar) hərəkatının başladığı və Almaniyanın həddindən artıq sağçı təşkilatlarının mərkəzi sayılan şərqdəki Saksoniya əyaləti Almaniyaya sığınan qaçqınlar üçün təhlükəli bölgəyə çevrilib.
Baki-xeber.com xəbər verir ki, Pirna şəhəri yaxınlığındakı Heidenauda qurulan müvəqqəti qaçqın sığınacaqları qarşısında nümayiş keçirən millətçilər, onlara etiraz edən solçu qruplar və araya girən polislərlə hücum edib. Polis qaynaqları aksiyanın əvvəlcədən açıq bir şəkildə təşkil olmuş böyük bir hücum olduğunu bildirir.
Çox sayda polisin yaralanması ilə nəticələnən qarşıdurmanın ardından Almaniyadakı bütün qaçqın sığınacaqları ətrafında nümayişlərin qadağan edilməsi gündəmə gəlib. Alman polisi birliyinin başçısı Rainer Vendt sonrakı nümayiş və toqquşmaların harada olacağı dəqiq bilinmədiyindən bütün qaçqın sığınacaqlarının ətrafının təhlükəsizlik bölgəsi elan edilməsi və polisə ciddi yoxlama və şübhəlilərin bölgəyə girişinin məhdudlaşdırılması səlahiyyəti verilməsinə çağırıb.
Ümumiyyətlə Almaniyada keçən aylarda qaçqınların yerləşdirildiyi binalara çox sayda hücumlar olub. Bir neçə gün əvvəl Bavariya əyalətinin Noyştad-Valdnabe şəhərində azərbaycanlıların yaşadığı qaçqın düşərgəsində də yanğın hadisəsi baş verib. Orada yaşayan 19 nəfərdən heç biri xəsarət almayıb. Bavariyanın daxili işlər naziri Yoahim Hermann yanğının ksenofobiya zəminində törədildiyini istisna etməyib. Mer Rupoert Tropmann yanğını dəhşətli hadisə adlandırıb. O, hadisədə ksenofobiya amili olması məsələsinə münasibət bildirərək spekulyasiyaya getmək istəmədiyini və işi polisin araşdırmalı olduğunu deyib.
Hadisə zamanı Noyştad-Valdnabedəki köhnə restoranda birinci mərtəbədə mebellərin bir hissəsi yanıb. Yanğının yayılmasının qarşısı tez bir zamanda alınıb. Sığınacaq şahidləri gecə saatlarında birinci mərtəbədən iki nəfərin qaçdığını görüblər. Daha bir nəfər isə binanın yaxınlığında onları gözləyib. Polisin ilkin qiymətləndirməsinə əsasən maddi ziyan 500 avro dəyərindədir.
Həmin sığınacaqda cəmi 19 nəfər olmaqla, 10 nəfər Azərbaycan, 2 İran, 2 Ukrayna, 2 Kosovo, 2 Ermənistan, 1 Konqo vətəndaşı məskunlaşıb. Bunlardan 3-nün isə azyaşlı uşaq olduğu bildirilir.
Köhnə restoranın birinci mərtəbəsi oyun oynamaq üçün uşaqların istifadəsinə verilib. Şəhərin mərkəzindəki bu köhnə otel və restoran artıq 2 ildir ki, qaçqınları qəbul edir. Hadisə Azərbaycanın Almaniyadakı Səfirliyinin diqqətindədir. Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev bildirib ki, XİN-in təlimatı əsasında Səfirlik məsələni Almaniyanın dövlət qurumları ilə araşdırır.
XİN mətbuat katibi bildirib ki, yanğın istintaqının obyektiv aparılacağına ümid edir: "Almaniyanın Bavariya əyalətinin rəsmilərinin də qeyd etdiyi kimi, bu yanğın hadisəsinin ksenofobiya və irqi ayrı-seçkilik zəminində baş verməsinin istisna olunmadığını nəzərə alaraq, ümid edirik ki, istintaq obyektiv və müfəssəl şəkildə aparılacaq və təqsirkar bilinən şəxslər qanun qarşısında layiqli cəzalarını alacaqlar”.
Yanğın hadisəsi faktı ilə bağlı araşdırma qəsdən yanğın törətmə ehtimalı üzərində aparılır. Azərbaycanın Almaniyadakı Səfirliyinin Oberpfalts Baş Polis İdarəsindən əldə etdiyi məlumata görə, 40 nəfərdən ibarət xüsusi istintaq qrupu məsələnin araşdırılmasını həyata keçirir: "Amma hələ ki, şübhəli şəxs qismində heç kəs aşkar olunmayıb. Hazırda şahidlərin dindirilməsi davam etdirilir".
Qeyd edək ki, iki gün əvvəl Baden Vyurtemberq əyalətində qıçqınların yerləşdirilməsi planlaşdırılan daha bir bina yanıb. Rəsmilər bu hadisənin də qəsdən törədildiyini ehtimal edir.
Bu arada, "Mitteldeutsche Zeitung” Federal Daxili İşlər Nazirliyinə istinadən xəbər verir ki, keçən il Almaniyada miqrantlara qarşı irqçi cinayətlərin 47 faizi köhnə Şərq Almaniya əyalətlərində və Berlində qeydə alınıb.
2014-ci ildə ölkədə qeydə alınmış 130 irqçi cinayətin 61-i yeni əyalətlərdə törədilib. Sözügedən rəqəmlər bir il əvvəlki statistika ilə müqayisədə vəziyyətin daha da pisləşdiyi ortaya çıxır və 40 faiz artım olduğu bildirilir.
Ümumiyyətlə 2014-ci ildə radikal sağçılar tərəfindən, irqçi cinayətlərdən başqa 1029 cinayət faktı qeydə alınıb. Bunun da əvvəlki illərlə müqayisədə daha yüksək rəqəm olduğu bildirilir.
Üstəlik ötən il Almaniyada irqçi cinayətlərin 45 faizinin üstü açılmayıb.
Yaşıllar Partiyasının nümayəndəsi İrene Mihalic qeyri-hökumət təşkilatlarının qeydə aldığı irqçi cinayətlərin sayının, federal və əyalət polis təşkilatlarının statistikasından çox fərqli olduğunu bildirir. Mihalicə görə, qeyri-hökumət təşkilatları 2014-ci ildə köhnə Şərqi Almaniya əyalətlərində 781 bu cür cinayət hadisəsi qeyd alıb, federal hökumətin statistikasında isə isə bunun 410 olduğu qeyd edilir.
Bu cür hadisələri daxili təhlükəsizlik üçün ciddi təhlükə kimi xarakterizə edən siyasətçi siyasi cinayətlərin daha yaxşı araşdırılmasının vacib olduğunu bildirib.
Ölkədəki son hadisələrə görə, hökuməti tənqid edənlərin də sayı artır. Tənqidçilər hesab edir ki, hökumət əcnəbi miqrantların təhlükəsizliyilə bağlı yetərincə tədbirlər görmür. Koalisiya hökumətinin kiçik ortağı Alman Sosial Demokrat Partiyası da qaçqınları hədəf alan qalmaqallı hadisələrə görə indiyə qədər susan baş nazir Angela Merkeli tənqid edib. Partiyanın baş katibi Yasmin Fahimi, xaricilərə qarşı nifrət və şiddəti qızışdıran şəxslərin olmasına təəssüfləndiyini və baş nazir Merkelin susqunluğunu pozub, "Almaniyada əcnəbilərə qarşı düşmənçiliyə və şiddətə qətiyyətlə tolerantlıq yanaşılmayacağını" söyləməsini gözlədiklərini deyib.
Heidenauya gedən iqtisadiyyat naziri Sigmar Gabriel ortalığı qarışdıranlara fürsət verilməməsinin gərəkliyini vurğulayıb. Bələdiyyə başçısı Opitz isə müsbət siqnallar verməsi üçün Merkeli də Heidenauda gözlədiklərini bildirib.
Almaniya Baş naziri Angela Merkelin sözçüsü Steffen Seibert isə bildirib ki, radikal sağçıların və neo-nasistlərin qaçqın sığınacaqları ətrafında nifrət dolu aksiyaları, vətəndaşların hətta uşaqlı ailələrin onlara dəstək verməsi isə utancvericidir.
Ümumiyyətlə Almaniyada sağçı terrorun yenidən canlanmaması üçün baş nazirin qaçqınları hədəf alan olaylara dərhal müdaxilə etməsilə bağlı çağırışlar artır.
