Nazirlər Kabineti "Azərbaycan Respublikası Hökuməti ilə BMT-nin Ərzaq və Kənd Təsərrüfatı Təşkilatı (FAO) arasında kənd ərazilərində yaşayan qadınların kəndin davamlı inkişafının sosial-iqtisadi və gender aspektləri üzrə imkanlarının artırılmasına dəstək layihəsi"ni təsdiq edib.
Kənd Təsərrüfatı Nazirliyindən bununla bağlı mətbuata bildirilib ki, FAO-Türkiyə Əməkdaşlıq Proqramı çərçivəsində maliyyələşən, Azərbaycanda və Türkiyədə həyata keçiriləcək bu layihənin əsas məqsədi təbii sərvətlərin düzgün və vahid şəkildə idarə edilməsinin təmin olunması və kənd ərazilərində yaşayan qadınların ehtiyaclarına xidmət etməklə seçilmiş pilot ərazilərdə yaşayan kənd qadınlarının imkanlarının artırılmasından ibarətdir.
Layihə çərçivəsində Kənd Təsərrüfatı Nazirliyinin müvafiq şöbələrinin kənd qadınları üçün təlim və məsləhət xidmətlərinin göstərilməsi ilə əlaqədar imkanların artırılması, hər iki ölkənin pilot əyalətlərində yaşayan kənd qadınları üçün ehtiyaclara uyğun təlimlərin keçirilməsi vasitəsilə onların potensialının yüksəldilməsi, Türkiyə və Azərbaycanın Kənd Təsərrüfatı nazirlikləri arasında əlaqələrin gücləndirilməsi, ən yaxşı təcrübənin mübadiləsinin aparılması, o cümlədən aparıcı qadın fermerlərin bu ölkələrə qarşılıqlı tanışlıq səfəri, layihə və onun nəticələri barədə ictimaiyyətin məlumatlandırılması kimi fəaliyyətin həyata keçirilməsi nəzərdə tutulur.
Bütövlükdə, belə bir layihənin həyata keçirilməsinin kənd qadınları üçün əhəmiyyəti nədən ibarətdir? Ekspertlər bunu necə dəyərləndirir?
Məsələyə münasibət bildirən sosioloq Ənvər Fərəcov belə bir layihənin həyata keçirilməsini müsbət dəyərləndirdi. O bunu bir sıra arqumentlərlə əsaslandırdı: "Əvvəla nəzərə almaq lazımdır ki, kənd qadınlarının iş həyatına inteqrasiya olunma səviyyəsi çox aşağıdır. Burada söhbət ev işlərinin görülməsindən getmir. Söhbət bir sıra sahələrdə işləməkdən gedir. Belə ki, qadınların orada təmsil olunma səviyyəsi aşağıdır. Məsələn, rayonlarda yaradılan fermer təsərrüfatlarının əksəriyyətinə məhz kişilər rəhbərlik edir. Halbuki, kəndlərdə elə bacarıqlı, səriştəli, təşəbbüskar qadınlar var ki, onların potensialından istifadə olunsa, kənd təsərrüfatı sahəsində daha çox faydalı nəticə əldə etmək olar. Ancaq müəyyən mental amillər və digər səbəblər üzündən bunu həyata keçirmək mümkün deyil. Bütün bunlar aradan qaldırılsa və kənd qadınları işə cəlb olunsa, kəndin inkişafında ciddi nəticələr əldə etmək olar. Bir daha qeyd edim ki, kəndlərdə çoxsaylı bacarıqlı xanım var. Sadəcə, şərait yoxdur ki, onların potensialından səmərəli istifadə olunsun. Hesab edirəm ki, həyata keçiriləcək yeni layihə bu istiqamətdə yeni imkanlar yarada bilər. Bütün bunlarla yanaşı, QHT-lər səviyyəsində regionlarda mütəmadi olaraq maarifləndirmə işi aparılmalıdır. Yəni bununla bağlı görüləsi işlər çoxdur. Əsas odur ki, işin düzgün təşkil olunması həyata keçirilsin".
Vidadi ORDAHALLI
