Məlum olduğu kimi, Avropa Oyunları zamanı Bakıda tıxaclar əhəmiyyətli dərəcədə azaldı. Hərəkətin məhdudlaşdırılacağı əvvəlcədən elan olunmuş yollardan başqa digər küçə və prospektlərdə də nəqliyyatın hərəkətində ciddi problemlər yaranmadı. Adətən digər günlərdə avtomobil çoxluğundan sıxlıq yaranırdı.
Görülən tədbirlər çərçivəsində sürücülərə fərdi nəqliyyat vasitələrindən istifadə etməmək barədə çağırış edildi. Dünya praktikasından nümunələr götürüldü, inzibati qaydalar sərtləşdirildi, qadağalar tətbiq olundu. Paytaxtda dövlət idarələrinin iş vaxtı dəyişdirildi. Ağırtonnajlı maşınların gündüzlər şəhərə daxilolma vaxtları məhdudlaşdırıldı, rayon qeydiyyatında olan avtomobillərin paytaxta daxil olmasına müəyyən məhdudiyyətlər qoyuldu. Həmçinin bölgələrdən gələn maşınlar üçün xüsusi dayanacaqlar quruldu və s.
Bu arada ölkədə iş saatının dəyişdirilməsi gündəmə gətirilib. Bu barədə baş nazirin müavini Abid Şərifov mətbuata açıqlamasında bildirib. Onun sözlərinə görə, Azərbaycanda institutlar, dövlət müəssisələri eyni zamanda işə başlayır: "Əksəriyyəti 9-da, ya da doqquzun yarısında. Biz bu qərarı qəbul etməmişdən qabaq mən sizə konkret sxemlərdə təqdim edə bilərəm ki, hansı ölkədə necədir. Avropa ölkələrinin hamısında, yalnız Avropa ölkələri yox, bütün dünyada belədir. Biz özəl sektora göstəriş verə bilmərik. Biz aidiyyəti qurumlarımızdan xahiş edirik, tövsiyə edirik ki, özəl sektorla danışıqlar aparsın. Onlar işə başlamalıdırlar saat 8-in yarısından səkkizəcən. Dövlət sektoru - 9-un yarısından 10-un yarısına qədər. Bank sektorunda isə iş saat 10-dan başlamalıdır".
Maraqlıdır, iş saatları müxtəlif vaxtlarda başlasa, bu, tıxacların azalmasında nə kimi rol oynayacaq?
Məsələyə münasibət bildirən ekspert Azər Allahverənov, prinsipcə, buna müsbət yanaşdığını bildirdi. Onun fikrincə, bu məsələlər kompleks şəkildə öz həllini tapmalıdır: "İş saatları ilə bağlı təklif maraqlı fikirdir. O baxımdan maraqlı fikirdir ki, həqiqətən də şəhərdə yaranan tıxacları aradan qaldırmaq üçün iş saatları ilə əlaqədar müəyyən vaxt intervalı olmalıdır. Ona görə ki, tıxaclar çox vaxt müəyyən pik saatlarda yaranır. Əsasən də əhali işə gedən vaxt, bir də işdən çıxan vaxt bu özünü daha çox göstərir. Bir də uşaqlar məktəblərdən çıxan vaxt sıxlıq müşahidə olunur. Müxtəlif iş saatlarının üst-üstə düşməsi tıxacların yaranma səbəbi kimi dəyərləndirilə bilər. Reallıqda həmin vaxtların dəyişdirilməsi praktiki baxımdan müsbət nəticə verə bilər. Yəni tıxacların azalmasına şərait yaradacaq. Tədris müəssisələrində də iş vaxtının başlamasına diqqət etmək lazımdır. Bütün bunların kompleks həyata keçirilməsi müəyyən effekt verə bilər. Ən azından hardasa pilot layihə kimi nəzərdən keçirilə bilər. Digər tərəfdən, maksimum siyasət elə qurulmalıdır ki, yol infrastrukturu təkmil şəkildə işləsin. Yol hərəkəti effektiv şəkildə idarə olunsun. Bunun üçün də icra qurumları arasında geniş şəkildə əlaqələndirmə yaradılmalıdır. Tədris ilinin başlanması ilə əlaqədar sentyabr ayından başlayaraq yollar yenidən yüklənəcək. İstənilən dəyişikliklər həmin perspektivə hesablanmalıdır".
Vidadi ORDAHALLI
