Bu il Həcc ziyarəti sentyabr ayında baş tutacaq. Həcc mərasiminin əsas ayini olan və müsəlmanların əsas bayramı Qurban bayramı sentyabrın 24-də qeyd olunacaq. Sentyabrın əvvəlində isə Azərbaycandan zəvvar qrupları Ərəbistana yola düşəcək.
Qeyd edək ki, Azərbaycanda hər il olduğu kimi, Həcc ziyarətinə sənəd qəbulu QMİ tərəfindən ilin əvvəlindən başlayıb. İdarədən verilən məlumata görə, bu il Həcc ziyarətinə gedəcək zəvvarlarla QMİ arasında müqavilə imzalanacaq və xidmət haqqı zəvvarın özü, yaxud onun səlahiyyətli nümayəndəsi tərəfindən QMİ-nin Azərbaycan Beynəlxalq Bankının "Mərkəz" filialındakı (Ünvan: AZ1005, Bakı, Səbail, Hacı Zeynalabdin Tağıyev, 3) manat hesabına ödənir.
Ancaq bu il ziyarət qiymətləri ilin əvvəlində baş verən devalvasiya səbəbindən bahalaşıb. Belə ki, xidmət və keyfiyyət fərqlərinə əsasən zəvvarlara, hər il olduğu kimi, iki Həcc tarifi təklif olunur. Nisbətən aşağı keyfiyyətli və hotel nömrəsində çox adamın qaldığı zəvvar paketi 4700 ABŞ dolları və nisbətən yüksək keyfiyyətli (VİP) xidmətlərə görə 5750 ABŞ dolları nəzərdə tutulub. Bu isə ötən illə müqayisədə xeyli bahadır. Xatırladaq ki, son iki ildə Azərbaycanda Həcc qiymətləri sabit olub. Yəni nisbətən şəraiti zəif və gündə iki dəfə yemək verilən hotellərdə qalmaq istəyən zəvvarlar 3250 manat, daha yaxşı şəraitli və yeməkləri daha çeşidli olan hotellərdə qalmaq istəyən zəvvarlar isə 4100 manat ödəməli olub. Bu il isə qiymətlər 35 faiz civarında, yəni devalvasiya kursuna uyğun olaraq qaldırılıb. Həcc ziyarəti VİP xidmətlərlə 5750, adi xidmətlərlə isə 4700 dollar olub. Yəni bu il əvvəlki illərlə müqayisədə adi xidmətlərlə Həcc ziyarətinə gedənlər təxminən 1500, VİP xidmətlərlə gedənlər isə 1700 manat əlavə pul ödəməli olacaq.
"Yeni-Müsavat" qəzetinin iddiasına görə, bahalaşma səbəbindən bu il Həcc ziyarəti kvotası dolmayıb. Hər il yayın əvvəlində artıq kvota dolurdu, hətta ötən il QMİ müraciət edənlərin bir qisminin növbəti il ziyarətə göndəriləcəyini bəyan etmişdi. İndi isə vəziyyət dəyişib, ziyarətə 1 aydan bir qədər artıq vaxt qalmasına baxmayaraq, yerlər tam dolmayıb.
Qafqaz Müsəlmanları İdarəsinin mətbuat xidmətinin rəhbəri Rəhimə Dadaşova qəzetimizə açıqlamasında bildirdi ki, bu məsələ ətrafında ajiotaj yaratmağa heç bir əsas yoxdur: "Həcc ziyarətilə bağlı bizə müraciətlər daxil olmaqdadır. Biz hazırda sənəd qəbulu ilə məşğuluq. Bilirsiniz ki, bu proses hər il baş verir. İndiyə qədər ayrılan kvotanın dolmadığını görməmişik. Əksinə, sənəd verənlərin sayı o qədər çox olurdu ki, biz gedə bilməyənləri növbəti ilə saxlayırdıq. Həcc ziyarəti İslam dininin vacib əməllərindən sayıldığı üçün həmin ziyarətə maraq böyükdü. Düşünmürəm ki, qiymətdə olan artım həmin prosesi ləngidə bilər. Yəni arzusu olan gedəcək. Sənəd qəbulu ilə bağlı proses normaldır. Hər il vaxt bir qədər dəyişir. Hazırda yay fəsli ilə əlaqədar olaraq ola bilər ki, sənədlərin verilməsində bir qədər izdiham müşahidə olunmur. Yəqin ki, bir azdan proses daha da sürətlənəcək. Kvotanın dolacağına qəti şübhəmiz yoxdu və bu barədə ətraflı məlumat verəcəyik".
Məhəmmədəli QƏRİBLİ
