Hər kəs yayda dənizə gedib yayın dadını çıxarmağa və bədəninin rənginin dəyişməsinə cəhd göstərir. Amma bəziləri dərisinin rəngini tündləşdirməyə, qaralmağa çalışarkən süni yola əl ataraq solyari vannaları qəbul edir. Bu sırada qadınlar üstünlük təşkil edir. Hava istiləşdikcə qadınların gözəl görünmək istəyi daha da artır. Həqiqətən, solyari vannaları bu gün qadınlar üçün aktual mövzulardan biridir.
Qadınlar daha çox solyari və dəri rəngini dəyişən xüsusi spreylər vasitəsilə qaralır. Həkim-dermatoloqlar bu barədə nə qədər həyəcan siqnalı çalsalar da, görünən odur ki, süni yolla qaralmağr üstünlük verənlərin sayı hələ də çoxluq təşkil edir. Kosmetoloqların bildirdiyinə görə, ultrabənövşəyi şüa həm saça, həm gözə, həm də ürəyə ziyandır. Onların fikrincə, 40 dərəcəyə qədər istilik verən vannalar dərinin hədsiz qurumasına səbəb olur. Ultrabənövşəyi şüalar dərinin elastikliyini azaldır və vaxtından öncə qocalmasına səbəb olur. Bu gün dünyada yüz milyonlarla insan solyari qəbul edir ki, bu da insanları birbaşa xərçəng risqi ilə üz-üzə qoyur. Artıq Ümumdünya Səhiyyə Təşkilatı süni ultrabənövşəyi şüaların qəbulu nəticəsində bədxassəli şişlərin yaranma ehtimalının siqaret və alkoqollu içki qəbul edənlərlə bərabər səviyyədə olduğunu bəyan edib.
Həkim ekspert, professor Adil Qeybulla bizimlə söhbətində bildirdi ki, solyaridə ultrabənövşəyi şüaların dəriyə birbaşa təsir etməsi zamanı dəridə müxtəlif xəstəliklər peyda olur. İnsanların bədənində müxtəlif şişlər və xəstəliklər əmələ gəlir. Ekspertin sözlərinə görə, solyari istifadəsi zamanı həssas dərilərdə müxtəlif dəyişikliklər peyda olur, o üzdən süni qaralma üsulunu seçən şəxslər mütləq həkim nəzarətindən keçməlidir:"Şübhəli relyefli törəmələr olan dəri sahibləri solyarinin qəbulundan çəkinməlidir. İlk növbədə xanımlar bilməlidir ki, onların səhhəti bu şüanı qəbul edə bilər, ya yox. Solyari vannası qəbul edən zaman artıq şüalanma da dərinin zədələnməsinə gətirib çıxara bilər. Ona görə də solyari aparatında ultrabənövşəyi şüaları ötürən aparat texniki baxımdan qaydasında olmalıdır. Bununla məşğul olan şəxslər solyari aparatları barədə yaxşı məlumatlandırılmalıdır. Solyaridən tez-tez istifadə məqsədəuyğun sayılmır. Şüalanmaya məruz qaldıqdan sonra növbəti seans 5-6 ay çəkməlidir. Amma tez-tez süni günəş vannasının qəbul edilməsi düzgün deyil. Solyari vannalarında ultrabənövşəyi şüaların birbaşa təsir etməsi bütün dünyada qadağan olunmuş prosedurdur. Bir sıra Avropa ölkələrində ümumiyyətlə, süni yolla qaralma qadağan olunub".
Həmsöhbətimiz onu da bildirdi ki, ölkədə hər hansı bir tibbi yenilik tətbiq edilməzdən öncə bir müddət klinik təcrübədən keçməsi önəm daşıyır. Uzun müddət aparılan kliniki müşahidələr həmin yeniliyin zərərli və xeyirli tərəfini müəyyənləşdirir: "Qış aylarında solyariyə müraciət edənlər bilməlidir ki, bu süni mühitdir. Orqanizmin bioloji parametrləri buna cavab vermir. Hər hansı xəstəxana və ya gözəllik mərkəzi müştəriyə təklif edilən xidmətin zərərli və xeyirli tərəfini izah etməlidir. Bəzi insanlar, yeri gəldi-gəlmədi, gözəllik üçün solyaridən istifadə edir. Amma bəzi göstəriciləri nəzərə almaq lazımdır. 18 yaşa qədər olan xanımların solyaridən istifadə etməsi qəti qadağandır. 18 yaşından sonra sağlam dəriyə malik, heç bir xəstəliyi olmayan, işığa həssaslığı qeydə alınmayan insanlar solyari qəbul edə bilər. Qan təzyiqi, müxtəlif dəri xəstəlikləri olanlara solyari pis təsir göstərir. Süni vanna üçün 18-40 yaş arası optimal yaş göstəricisidir".
Dermatoloq Bella Sultanova isə bildirdi ki, solyaridən istifadə edən xanımların dərisi daha tez qocalır:"Süni yolla qaralmağın daha bir yolu isə krem və losyonlardır. Kremlər, solyaridən fərqli olaraq, dərinin rəngini daha təbii göstərməyə kömək olur. Və belə kremlərin qiyməti 10-35 manat arasında dəyişir. Lakin unutmaq lazım deyil ki, üz və bədən üçün kremlər müxtəlifdir, onları səhv saldıqda əks təsir göstərə bilər".
