2015-ci ilin ilk yarım ili ərzində yol hərəkəti qaydalarını pozduqlarına görə 20 və daha çox bal toplamış 258 sürücünün sürücülük hüquqları müxtəlif müddətlərə məhdudlaşdırılıb. Bunu Trend-ə Daxili İşlər Nazirliyi (DİN) Bakı şəhər Baş Polis İdarəsinin Dövlət Yol Polisi İdarəsinin (BŞDYPİ) İctimai qurumlarla əlaqə bölməsinin rəisi, polis polkovniki Vaqif Əsədov deyib.
Bölmə rəisinin sözlərinə görə, hesabat dövründə paytaxtın yol patrul xidmət müfəttişləri tərəfindən 115823 yol hərəkəti qaydalarının pozuntusu aşkar edilib: "Bunlardan 112028-i kobud pozuntu hesab edilib. Yarım il ərzində yol polisləri tərəfindən 77 avtoxuliqan saxlanılıb. Avtomobili sərxoş halda idarə edən 4229, işıqforun qırmızı işığında hərəkət edən 5206, qəza şəraiti yaradan 3075, dövlət nişanı olmadan nəqliyyat vasitəsini idarə edən 329, sərnişindaşıma qaydalarını pozan 882, müvafiq sənədləri olmadan avtomobili idarə edən 2473, polisin qanuni saxla əmrinə tabe olmayan 1907 sürücü məsuliyyətə cəlb edilib. Bundan əlavə, 47049 piyada inzibati qaydada məsuliyyətə cəlb olunaraq cərimələnib”.
V.Əsədov qeyd edib ki, yol hərəkəti qaydaları pozuntularının aşkar edilməsi sahəsində müşahidə-izləmə kameralarının görüntülərindən də istifadə olunması hərəkətin təşkili ilə yanaşı, vətəndaşların qanuna riayət etmələrinə də təsir göstərib: "Hesabat dövründə Mərkəzi Məlumat Sistemində yol hərəkətinə videonəzarətin tətbiqi sayəsində kameralar vasitəsilə 144984 yol hərəkəti qaydalarının pozulması aşkar edilib. Qayda pozuntusuna yol verən sürücülər barəsində qanunvericiliyə uyğun olaraq elektron protokollar tərtib edilib. Mərkəzə qoşulmuş nömrətanıma sisteminin köməyi ilə DYP əməkdaşları tərəfindən 2-si cinayət xarakterli faktlar üzrə axtarışda olan 447 nəqliyyat vasitəsi saxlanılıb və onların hərəkət istiqamətləri müəyyən edilib”.
Qeyd edək ki, 2015-ci ilin ilk yarım ili ərzində Bakı şəhərinin inzibati ərazisində 392 yol-nəqliyyat hadisəsi qeydə alınıb. Nəticədə 118 nəfər ölüb, 414 nəfər müxtəlif dərəcəli bədən xəsarətləri alıb.
Bakıda yol qəzaları ən çox nə vaxt və harada baş verir?
Vaqif Əsədov bu ilin ilk 6 ayı ərzində Bakıda yol qəzalarının ən çox qeydə alındığı vaxt və yerləri də açıqlayıb. Polis polkovniki deyib ki, günün vaxtına görə, hadisələrin əksəriyyəti saat 13:00-dan 18:00-dək və saat 20:00-dan 24:00-dək qeydə alınıb: "Cari ilin 6 ayı ərzində bu vaxtlarda 189 hadisə baş verib, nəticədə 49 nəfər ölüb, 197 nəfər yaralanıb. Ümumi hadisələrin 48,2%-i, ölüm faktlarının baş verməsi 45,1%-i və xəsarət alınması faktlarının isə 47,6%-i məhz bu saatlara təsadüf edib. Həftənin günlərinə görə isə baş verən hadisələr, ölüm və xəsarət faktları təxminən eyni sayda olub”.
Bölmə rəsinin sözlərinə görə, hesabat dövründə yol qəzalarının əksəriyyəti paytaxtın Heydər Əliyev (27 hadisə, 15 ölüm, 28 yaralı), Ziya Bünyadov (18 hadisə, 8 ölüm, 11 xəsarət), Nobel (14 hadisə, 4 ölüm, 11 xəsarət), Qara Qarayev (14 hadisə, 1 ölüm, 14 xəsarət), Babək (7 hadisə, 3 ölüm, 5 xəsarət), Neftçilər (6 hadisə, 4 ölüm, 3 xəsarət), Tbilisi prospektlərində (5 hadisə, 2 ölüm, 8 xəsarət), Mərdəkan-Buzovna yolunda (10 hadisə, 4 ölüm, 11 xəsarət), Şəhər şossesində (6 hadisə, 6 ölüm, 4 xəsarət), Zığ şossesində (6 hadisə, 5 ölüm, 6 xəsarət) və Bakı dairəvi yolunda (11 hadisə, 3 ölüm, 21 xəsarət) qeydə alınıb: "Bu rəqəmlər paytaxt yollarında qeydə alınan ümumi hadisələrin 31,6%-ni, ölənlərin 46,6%-ni, xəsarət alanların isə 29,5%-ni təşkil edib”.
Qeyd edək ki, 2015-ci ilin ilk yarım ili ərzində Bakı şəhərinin inzibati ərazisində 392 yol-nəqliyyat hadisəsi qeydə alınıb. Baş vermiş hadisələrdə 118 nəfər ölüb, 414 nəfər isə müxtəlif dərəcəli bədən xəsarətləri alıb.
Bu il 34 uşaq yol qəzalarının qurbanı olub
2015-ci ilin ilk 6 ayı ərzində Azərbaycanın avtomobil yollarında 1045 yol-nəqliyyat hadisəsi qeydə alınıb. Qəzalar nəticəsində 407 nəfər ölüb, 1117 nəfər müxtəlif dərəcəli bədən xəsarətləri alıb.
Bu barədə Daxili İşlər Nazirliyi (DİN) Respublika Baş Dövlət Yol Polisi İdarəsinin (BDYPİ) İctimaiyyətlə əlaqələr şöbəsinin rəisi, polis polkovniki Kamran Əliyev deyib.
K.Əliyev qeyd edib ki, ötən ilin analoji dövrü ilə müqayisədə 171 hadisə (14,1%), 105 ölüm faktı (20,5%), 117 xəsarət alma faktı (9,5%) azalıb.
Şöbə rəisinin sözlərinə görə, qəzaların çoxu piyadaların vurulması ilə bağlı olub: "Piyadavurmalar ümumi hadisələrin 39 %-ni təşkil edib. Belə ki, 408 piyadavurma hadisəsi nəticəsində 143 nəfər ölüb, 313 nəfər isə xəsarət alıb. Təəssüflə qeyd edirəm ki, qəzalar zamanı ölənlərin 34-ü, yaralananların isə 99 nəfəri azyaşlı uşaqlar olub. Ölənlərdən 11-i, yaralananlardan isə 24-ü 7 yaşınadək, ölənlərin 23-ü, yaralananların 75-i isə 7 yaşından 16 yaşınadək olan uşaqlardır”.
