Gədəbəyin Söyüdlü qızıl yatağını istismar edən xarici şirkətin söyüdlülərə yaratdığı problem ölkə ictimaiyyətində, rəsmi qurumlara, mediada geniş müzakirə olunduqca ortaya yeni faktlar çıxır. Məlum olur ki, şirkət indiyə qədər əməl etməli olduğu çox şeyə əməl etməyib.
Gədəbəyin, söyüdlülərin sahib olduqları yataqları illərdir istismar ediblər, amma onlara bir çürük qoz da verməyiblər. Yəni Söyüdlüdə heç bir yaxşı iş görməyiblər ki, söyüdlülər Tanrının onlara bəxş etdiyi sərvəti mənən bu şirkətə halal etsin. Bu şirkətin Söyüdlüdə hər hansı bir sosial layihə həyata keçirmədiyi rəsmən təsdiqləndi. Belə ki, ekologiya və təbii sərvətlər naziri, Gədəbəy rayonunun Söyüdlü kəndində tullantıxana sahəsində monitorinqlərin aparılması və mövcud vəziyyətin qiymətləndirilməsi məqsədilə yaradılan Komissiyanın sədri Muxtar Babayev brifinqdə bu faktıı vurğulayıb: “Söyüdlü kəndində də şirkət tərəfindən sosial layihələr həyata keçirilməyib".
Bu xarici şirkət Söyüdlüdə indiyə qədər nə üçün sosial layihələr həyata keçirməyib? O şirkət hansı sosial layihələri həyata keçirməli idi ki, bunu etməyib? Niyə keçirməyib? Söyüdlülülər hansı sosial layihələrdən məhrum olunublar?
“Çox təəssüf ki, bu şirkət heç zaman Söyüdlü camaatının arzu və istəklərini, təkliflərini dinləmək, qəbul etmək istəməyib”
Müasir İnkişaf Birliyinin sədri Mübariz Göyüşlü “Bakı-Xəbər”ə şərhində “Söyüdlüdə baş verənlər bu dərəcədə miqyası böyüdüləcək məsələ deyildi. Ekologiya və təbii sərvətlər naziri başda olmaqla bizim aidiyyəti qurumlarımız və barəsində danışlan xarici şirkət əgər öz üzərinə düşən işin məsuliyyətini dərk edib görməli olduqları işləri görsəydilər bu qədər böyük problemlər yaranmazdı. Bu, məsələnin bir tərəfi. Digər tərəfdən açıq görsənir ki, bu xarici şirkət öz üzərinə düşən vəzifələri, öhdəlikləri layiqli şəkildə həyata keçirməyib. Büövlükdə, bu şirkətin fəaliyyətinə Ekologiya və Təbii Sərvətlər Nazirliyi nəzarət etməli idi, amma etməyib. Bu şirkət Söyüdlüdə sosial layihələr həyata keçirməkdə maraqlı olmalı idi. Bütün dünyada ənənə belədir ki, xarici şirkət fəaliyyət göstərdiyi əraziyə yaxın yaşayış məntəqlərində sosial layihə həyata keçirsin. Hər bir şirkətin sosial məsuliyyəti var. Bu şirkət sorğu keçirib söyüdlülülərin ən çox nəyə ehtiyacları olduğunu öyrənə və onun əsasında sosial-humanitar layihə həyata keçirə bilərdi. Bunu etməli idi. Bu hər şeydən əvvəl bu o şirkətin özünün imici üçün lazım idi, həm də işlədiyi ölkəyə, fəaliyyət göstəriyi bölgəyə, o ərazinin insanlarına hörmətinin ifadəsi sayılardı. Bu şirkət Söyüdlüdə əhalinin tələbatına, istəyinə uyğun sosial layihələr həyata keçirə bilərdi ki, bunu etmək istəməyib. Yolları təmir edə, yol çəkə, tibb ocağı, mədəniyyət müəssisəsi inşa edə, bağça, ehtiyac olardısa məktəb tikə bilərdi. Yəni çox iş görmək imkanı var idi.
Dünyada belə nümunələr çoxdur. Bu şirkət Azərbaycanın təbii sərvətlərini istismar edərək pul qazanır, bu puldan isə sosial aksiyalara ayırmır, yalnız vəsaiti mənimsəməklə məşğul olur”-deə qeyd etdi.
Bununla bağlı şirkətin xüsusi layihəsi olduğunu deyən M.Göyüşlü hesab edir ki, şirkət çox iş görə bilərdi, amma görməyib. “Bunlar burada ancaq pul qazanmaq və Azərbaycanın səvətlərini istismar etmək, əhalini də heç bir halda nəzərə almamaq, kənd sakinlərinin təklif və fikirlərinə, şikayətlərinə əhəmiyyət verməmək yolunu tutublar. Çox təəssüf ki, bu şirkət heç zaman Söyüdlü camaatının arzu və istəklərini, təkliflərini dinləmək, qəbul etmək istəməyib, onları sosial layihələrdən məhrum edib. Nəticə də belə oldu. Hər kəs öz məsuliyyətini dərk etsəydi problem bu qədər böyüməzdi və gəlib dövlət başçısı səviyyəsində münasibət bildirilməsinə çatmazdı”-deyə M.Göyüşlü əlavə etdi.
Əli TURABOV
