“Ölkəmizin böyük hissəsi artıq rəsmən “yaşıl enerji” zonası elan edilib və bunun fonunda Gədəbəy rayonunda baş vermiş hadisə tamamilə qəbuledilməzdir. Mən hesab edirəm ki, Ekologiya və Təbii Sərvətlər Nazirliyi ən azı səhlənkarlığa yol verib, nəzarətsizlik nümayiş etdirib, passiv müşahidəçi kimi çıxış edib və bunun nəticəsində xarici investor bizim təbiətimizi zəhərləyib. İnsanlar haqlı olaraq öz etiraz səsini ucaldıblar, amma onların səsinə baxan olub? Yox! Bir gün, iki gün, üç gün, beş gün, hara baxırdı Ekologiya və Təbii Sərvətlər Nazirliyi? Bilmirdimi ki, belə problem var? Ya bilirdi gözünü yumurdu, ya da bilmirdi. Hər ikisi qəbuledilən deyil”.
Bu barədə Prezident İlham Əliyev 2023-cü ilin 6 ayının sosial-iqtisadi yekunlarına həsr olunmuş müşavirədə bildirib.
Belə hesab etmək olarmı ki, Ekologiya və Təbii Sərvətlər Nazirliyinin digər qiymətli yataqlarda işləyən xarici investor şirkətlərə nəzarəti eynilə Gədəbəydə kimi yarıtmaz və laqeydliklə müşayiət olunub?
“Təəssüflər olsun ki, bu sahəyə laqeyd münasibət və nəzarətsizlik çox ciddi problemlərə yol açır”
Ekspert İlqar Hüseynlinin “Bakı-Xəbər”ə şərhində bildirdiyinə görə, Gədəbəydəki xarici şirkətin vətəndaşlarımıza qarşı etdiklərinə və əlaqədar qurumların fəaliyyətinə Prezidentin mövqeyi cəmiyyətə mesaj ötürdü ki, vətəndaş haqlı olub və məmurlar onları sona qədər dinləməli və problemə çözüm tapmalı idilər. “Yəni vətəndaşın haqlı tələblərinin arxasınca sona qədər gedilməlidir. Ekologiya və Təbii Sərvətlər Nazirliyinin baş verənlərə yanaşmasına gəlincə, nazir özü Söyüdlüdə olmuşdu və geri dönüş edərkən o göldə hər hansı bir faciəvi vəziyyətin olmadığı ilə bağlı rəsmi bəyanatlar səsləndirdi. Belə çıxır ki, nazir Muxtar Babayev ekoloji fəlakət nədir, ekoloji fəlakət necə yaranır, nəyi ekoloji fəlakət hesab etmək olar, nəyi olmaz məsələsi barədə bir o qədər aydın təsəvvürə malik deyil. O süni göl niyə yaradılmalıdır? Ekosistem niyə korlanmalıdır? Ya bu barədə məlumata malik deyil, ya da ikinci bir versiya qalır ki, o şirkətin yetkililərinin sifarişini yerinə yetirib, nəyinsə müqabilində yalnız onların fikirlərini ifadə edib. Belə hallar kütləvi yayılmış hallardır. Mədən sənayesi ilə məşğul olan şirkətlərin hamısı Ekologiya və Təbii Sərvətlər Nazirliyindən rəy alır. Bu gün Azərbaycanda yüzlərlə qum-çınqıl karxanası fəaliyyət göstərir. İmişli ərazisində Araz çayı boyunca təxminən yüzə yaxın karxana var ki, ekskovatorla yeri qazıb qumunu, çınqılını Bakıya daşıyırlar. Orada çox böyük ekoloji fəlakət yaranıb. Dəfələrlə sakinlər vəziyyətlə bağlı narazılıq ediblər, QHT-lər orada monitorinqlər aparıb monitorinqin hesabatını, nəticələrini təqdim ediblər. Ümumiyyətlə, bu məsələyə nazirliyin hər hansı bir reaksiyası yoxdur. Bir dənə nəzarət edən tapılmır, bu sanki bu qurumları narahat etmir. Vəziyyət çox acınacaqlıdır”.
İ.Hüseynli qeyd etdi ki, keçən il Şərq Tərəfdaşlığı Vətəndaş Cəmiyyəti platforması Hacıqabul gölünün vəziyyəti ilə bağlı monitorinq keçirib böyük bir hesabat hazırlayıb və həmin hesabatı Ekologiya və Təbii Sərvətlər Nazirliyinə də göndəriblər, hətta nazirlikdən rəsmi cavab da alıblar: “Cavab verdilər ki, işlər gedir, müxtəlif tədbirlər həyata keçirilir. Dövlətin ora 10 milyon manat vəsait ayırmasına baxmayaraq, Hacıqabul gölü qurudu və Azərbaycanın həcmcə üçüncü böyük gölü xəritəmizdən silindi. Bilirsiz, ölkənin ekoloji vəziyyəti ilə bağlı problemlərə laqeydliklə yanaşılır. Çünki bu sahə naşı adamların əlindədir, ona görə də belə problemlər ortaya çıxır. Xarici şirkətlərlə də bağlı ciddi problemlər var. Biz onun acı nümunələrindən birini Söyüdlüdə gördük. Nazirliyin ölkəmizdə fəaliyyət göstərən xarici şirkətlərə nəzarəti qətiyyən qənaətbəxş deyil. Çox təəssüflər olsun ki, bu sahəyə laqeyd münasibət və nəzarətsizlik çox ciddi problemlərə yol açır. Ekologiya və Təbii Sərvətlər Nazirliyinin rergional idarələri var. Şübhələr var ki, (demirəm təsdiqləyici faktlar var-İ.H) onlar nəyinsə müqabilində o şirkətlərin fəaliyyətindəki qanunsuzluqlara göz yumurlar. Ehtimal ola bilər ki, ortada korrupsiya faktı var. Burada biliriz nə var? Qanun əgər nəyisə tələb edirsə və aidiyyəti qurum da qanun pozuntusunun qarşısını almırsa, artıq burada şübhəli məqamlar, korrupsuya faktı diqqəti cəlb edir...”-deyə İ.Hüseynli qeyd etdi.
Leyla QARAXANLI
