Bakının daşınmaz əmlak bazarında müxtəlif təyinatlı qarajlar satılır. Bunlara müxtəlif küçə, prospekt və məhəllələrdəki daş və dəmir qarajlar, yeni tikili binaların altındakı avtomobil qarajları və qaraj tipli qeyri-yaşayış obyektləri aiddir.
Qeyd edək ki, Bakıdakı daş qarajların böyük əksəriyyəti sovet dövründən qalanlardır. Onların çoxunun sənədi texniki pasportdur. Texniki pasport elektron çıxarış kimi alqı-satqıya yararlıdır və onunla rahat şəkildə alqı-satqı etmək olur. Bu qarajların qiyməti isə 10 min manatdan başlayır. Hətta bəzi ərazilərdə daş qarajların qiyməti 50-70 min manata qədər dəyişə bilir.
Ancaq bəzi çoxmərtəbəli binaların zirzəmisi qaraj kimi istifadə olunur. Hətta həmin sahənin qaraj kimi bina sakinlərinə satılması praktikası geniş yayılıb. Bununla yanaşı, çoxmərtəbəli binaların zirzəmisində müəyyən ərazi qaraj kimi kirayə də verilə bilir. Ancaq qanunvericiliyə görə, mənzillərin zirzəmisi satıla və ya kirayə verilə bilməz.
“Çoxmənzilli binalarda zirzəmi 1 mərtəbədən ibarətdirsə, bu, texniki mərtəbə hesab olunur və bu mərtəbə sırf təhlükəsizlik üçün nəzərdə tutulur”
Daşınmaz əmlak məsələləri üzrə ekspert Ramil Osmanlı bildirdi ki, çoxmənzilli binalarda zirzəmi 1 mərtəbədən ibarətdirsə, bu, texniki mərtəbə hesab olunur və bu mərtəbə sırf təhlükəsizlik üçün nəzərdə tutulur: “Çoxmərtəbəli binaların zirzəmisində texniki mərtəbə anlayışı var. Texniki mərtəbə o deməkdir ki, fövqəladə vəziyyət zamanı bina sakinlərinin təxliyyəsi üçün nəzərdə tutulub. Texniki mərtəbələrin qaraj sahəsi kimi bina sakinlərinə satılması və bu məqsədlə hər hansı sənədin verilməsi qanunsuzdur. Qanunvericiliyə əsasən, texniki mərtəbənin qaraj kimi istifadə edilməsi, satılması və ya kirayə verilməsi mümkün deyil. Vətəndaşlar bilməlidir ki, həmin sahənin gələcəkdə özəlləşdirilməsi və ya qeydiyyata alınması mümkün olmayacaq. Onlara verilən müqavilənin hüquqi baxımdan heç bir əsası yoxdur.
Mənzil Məcəlləsinin müvafiq maddəsinə görə, mülkiyyətçilərin birgə istifadəsinə aid olan sahələr onsuz da bina sakinlərinə məxsus olduğundan əlavə ödəniş etmələrinə ehtiyac yoxdur. Mənzil Məcəlləsinin 35-ci maddəsində qeyd olunur ki, sahə mülkiyyətçilərinin ümumi əmlakını müəyyən edir. Ümumi əmlak dedikdə sahə mülkiyyətçilərinin birgə istifadəsinə aid olan sahələrdir”.
Ekspertin sözlərinə görə, bu kimi problemlərdən yaxa qurtarmağın yeganə yolu sakinlərin özlərinin binanın idarəetməsini əllərinə almaları və Mənzil Mülkiyyətçilərinin Müştərək Cəmiyyətini qurmalarıdır.
Günel CƏLİLOVA
