Son zamanlar bank kartlarından məlumatların oğurlanması haqqında tez-tez xəbərlər eşidirik. Vətəndaşlar hesablarında müxtəlif məbləğlərdə pulların yoxa çıxdığından və oğurlandığından şikayətlənirlər. Bu çox xoşagəlməz haldır, heç kim pulunu itirmək istəmir. Həmçinin, bu overdraft debet kartları və ya kredit kartlar ola bilər, bu zaman həm öz pulunu itirmək, həm də banka borclu qalmaq olar.
Çox zaman kartın sahibi kartın onda olduğunu aşkar edir. Əməliyyat kart sahibinin olduğu şəhərdə, həmçinin, xarici ölkədə həyata keçirilə bilər. İnsan anlaya bilmir ki, onun kartından necə istifadə olunub. O, PIN-kod və kart haqqında məlumatları heç kimə demədiyini iddia edir. Onu narahat edən əsas sual – kartdan oğurlanmış pulları necə geri qaytarsın? Bunu etmək asan deyil, lakin mümkündür. Ən çətin variant əməliyyatlar PIN-kod daxil edilərək həyata keçirildikdə olur. Banklar iddia edirlər ki, belə halda əməliyyatlar qaydalara uyğun aparılmış və etibarlı hesab edilir.
Ümumiyyətlə, son zamanlar vətəndaşlar hesablarında müxtəlif məbləğlərdə pulların yoxa çıxdığından və oğurlandığından şikayətlənirlər. Bu cür hallardan gec xəbər tutulduqda pulları geri qaytarmaq olmur. Bəs insanlar bu məlumatları necə qoruya bilərlər?
“Bəzi hallarda bank əməkdaşlarının məlumatları götürməsi...”
Bank sahəsi üzrə ekspert Əkrəm Həsənov bildirdi ki, bu, ilk növbədə, vətəndaşların öz məsuliyyətindədir: “Kart məlumatlarının qorunmasını birinci növbədə müştərinin özü təmin etməlidir. Kartın üst tərəfində 16 rəqəm, arxa tərəfində 3 rəqəm var, üstəlik, kartın 4 rəqəmli PİN-kodu var, hansı ki, kartı əldə edəndə əlavə bir zərfdə verirlər. Bilmək lazımdır ki, başqasına yalnız 16 rəqəmli kodu, ayın tarixi qeyd olunan hissəsi və ad-soyadı vermək olar ki, o da kimsə sizə ödəniş edə bilsin deyə. Kartın arxasında yerləşən 3 rəqəmli kodu və PİN-kodu isə heç kəsə vermək olmaz. Təəssüf ki, vətəndaşlar bu məlumatları da, kartı da başqasına verirlər. Yəni ilk olaraq oğurlanma bu cür olur, vətəndaşların öz məlumatsızlığı səbəbindən”.
Həmsöhbətimiz onu da vurğuladı ki, bəzi hallarda isə bu, bank əməkdaşlarının məlumatları götürməsi səbəbindən olur: “Digər səbəb isə bəzən bankın əməkdaşlarının qanunsuzluğa yol verməsidir. Bu da, təbii ki, qanunazidd hərəkətdir və birbaşa cinayət məsuliyyətidir".
Günel CƏLİLOVA
