İbrahim Rüstəmli: “Adamlar var ki, orden və medallarla bağlı narazılıqları var, sağlamlığı, pul təminatı, sığortası ilə bağlı problemlərlə üzləşir”
Məlum olduğu kimi, müdafiə nazirinin müvafiq əmrilə səfərbərlikdən tərxis edilmiş şəxslərin müraciətlərinə baxılması üzrə komissiya yaradılıb. Müdafiə Nazirliyinin yaydığı məlumata görə, artıq sözügedən komissiya bölgələrdə də fəaliyyətə başlayır.
Qeyd edək ki, səfərbərlikdən tərxis olunmuş vətəndaşlarımızın qəbulu, onların müraciətlərinə obyektiv və operativ qaydada baxılması ilə bağlı müdafiə nazirinin əmrilə yaradılmış komissiya yanvarın 11-dən etibarən Bakıda Silahlı Qüvvələrin Təlim və Tədris Mərkəzində fəaliyyətini davam etdirir. Bundan başqa, Füzuli rayonunda komissiyanın səyyar qrupu da fəaliyyət göstərir. Bakıda fəaliyyət göstərən komissiya tərəfindən bu günə qədər 1751 vətəndaş qəbul edilib. Füzuli rayonunda fəaliyyət göstərən səyyar qrup tərəfindən isə 202 vətəndaş qəbul olunub. Hazırda müraciətlərdə qaldırılan məsələlərin həlli istiqamətində lazımi tədbirlər görülür.
Bunu Müdafiə Nazirliyinin mətbuat xidmətinin mətbuat katibi polkovnik-leytenant Anar Eyvazov yanvarın 17-də jurnalistlərə müsahibəsində deyib.
Müdafiə Nazirliyi tərəfindən yaradılan bu komissiyaya müraciət edənlərin sayı artır, xeyli şəxs bu komissiyaya müraciət edib. Bu müraciətlərin səbəbi nədir?
- “İnanıram ki, səfərbərlikdən tərxis olunanların qarşılaşdıqları bu problemlər də operativ şəkildə öz həllini tapacaq”
Tanınmış hərbi ekspert İbrahim Rüstəmli hesab edir ki, bu təbii prosesdir. “Fikrimcə, bu tamamilə təbii prosesdir. Biz çox qaynar bir dövrdən çıxmışıq. Bilirsiniz ki, sözün həqiqi mənasında, Vətən müharibəsi getdi və bu müharibədə onminlərlə gəncimiz əsl qəhrəmanlıq nümunələri göstərdi. Bu gənclərin hamısının qarşısında ehtiramla baş əyirik. Xüsusilə də şəhidlərimizi, onların müqəddəs ruhlarını daim əziz tutur, yad edirik, onlar bizim üçün həqiqətən də yeri doldurulmaz olan əvəzsiz bir itkidir. Müharibədən sonrakı proseslərdə həmişə bu cür vəziyyət yaranır, narazılıqlar olur, müraciətlər çoxalır, sosial həyatda diskomfortlar özünü göstərir. İstər medal baxımından, istərsə də digər məsələlərdə problemlərlə üzləşən insanlar var. Bir neçə gün əvvəl sosial şəbəkələrdə bir status oxudum ki, adam bütün rayonların işğaldan azad edilməsi üçün bütün döyüşlərdə iştirak edib, onun hərbi biletinə isə yalnız iki rayonun adı yazılıb, o da narazılıq edir. Adamlar var ki, orden və medallarla bağlı narazılıqları var, sağlamlığı, pul təminatı, sığortası ilə bağlı problemlərlə üzləşir və sair. İnanıram ki, səfərbərlikdən tərxis olunanların qarşılaşdıqları bu problemlər də operativ şəkildə öz həllini tapacaq. Çünki geriyə yol yoxdur. Geriyə yol ona görə yoxdur ki, bu ordunun İlham Əliyev kimi Ali Baş Komandanı var. Yadınıza gəlirsə, Ali Baş Komandan yaralı qazilərimizlə, hərbçilərimizlə görüşündə demişdi ki, mən hər bir əsgərimin yanındayam. Həqiqətən də belədir”.
İ.Rüstəmlinin sözlərinə görə, o, dünya ordularının tarixini araşdırıb öyrənir, lakin İlham Əliyev kimi öz əsgərlərinə qayğı və həssaslıqla yanaşan ikinci bir Ali Baş Komandan tanımayıb. “Müharibə dövründə də Ali Baş Komandanımız əsgərlərimizin daha az yaralanması, daha az şəhid olması üçün əlindən gələni etdi, həqiqətən də şəxsi bir fədakarlıq nümunəsi göstərdi. Burada Ali Baş Komandanın iradəsi var. Ali Baş Komandanın da iradəsi ortada olduğu üçün də düşünürəm ki, Müdafiə Nazirliyi və digər əlaqədar strukturlar, güc qurumları bu müraciətlərə vaxtında və operativ cavab verəcəklər” - deyə İ.Rüstəmli qeyd etdi.
İradə SARIYEVA
