“Azəriqaz”ın yeni mexaniki qaz sayğacları camaatı niyə narazı salır - şirkətin və ekspertlərin rəyi...

img

Son günlər sosial şəbəkə ünvanlarında guya mexaniki-elektron sayğacların təbii qazla bağlı daha çox sərfiyyatı qeydə aldığı barədə müxtəlif yanaşmalara rast gəlinir. Bir qrup vətəndaş iddia edir ki, əvvəlki illər və son aylarla müqayisədə onlara ikiqat borc yazılır.

Goranboy rayonu Xarqərvənd kəndinin sakini Xaləddin Mustafayev yeni qoyulan sayğacın çox borc yazdığından şikayətlənir: "Bizim bütün kənd eyni problemdən narazıdır. Mənim evimdə cəmi bir soba yanır. Əvvəllər qaz üçün aylıq 40, 50, qış aylarında maksimum 60 manat ödəmişəm. Yeni qurulan sayğac üçün isə mənə 17 günə 90 manat yazılıb. Ayın sonuna kimi isə bu məbləğ 144 manata qədər artıb. Qaz pulu üzrə ödənişi ayda bir dəfə edirdiksə, indi ayda ödəniş üçün iki dəfə çek göndərilir. Bu da yəqin ki, məbləği az göstərmək üçün belə edilir. Bizə qaz idarəsində onu da bildiriblər ki, pulu ödəməsəniz, sizin qaz kəsiləcək. Yeni qurulan sayğaclarda problem var. Rayonda yaşayan sadə bir vətəndaş təkcə qaz üçün ayda 150 manat qaz pulunu necə ödəyə bilər?” Daha sonra adının çəkilməsini istəməyən bir vətəndaş bildirib ki, yeni qoyulan sayğacdan sonra onlara 90 manat borc yazılıb. Hansı ki, daha əvvəlki aylarda ödəniş etdiyi çeklərdə borc haqqında heç bir borc qalığı göstərilməyib. Şikayətçi iddia edir ki, bu borc onlara saxta olaraq yazılıb.

Qeyd edək ki, mexaniki tipli sayğacın yazdığı məbləğlə bağlı sosial şəbəkələrdə geniş müzakirə olub. Bir qrup insan eyni problem olaraq yeni qoyulan sayğacın çox borc yazdığını iddia edib.

  • Ceyhun Səfərov: “Narazı qalan abonentlərin sərfiyyatda artıq göstəriciləri də pandemiya ilə bağlı sərtləşdirilmiş karantin dövrünə təsadüf edir”

"Azəriqaz"ın mətbuat katibi Ceyhun Səfərov bildirdi ki, deyilənlər həqiqəti əks etdirmir. Qaz ölçü qurğuları, yəni sayğacların hamsının bir funksiyası var – sayğacdan keçən təbii qazın sərfiyyatını qeydə almaq: “Hansısa sayğac az, hanısasa sayğac çox qeydiyyat aparmır. Bu qurğular standartlara cavab verir. Ölkəyə gətirildikdən sonra test olunur, yoxlanılır, daha sonra istismara verilir. Yəni müvafiq qurumlar da buna nəzarət edirlər. Abonentlər nəzərə almalıdırlar ki, soyuq günlərdə sərfiyyat artır. Qaza olan tələbat çoxalır. Üstəlik, narazı qalan abonentlərin sərfiyyatda artıq göstəriciləri də pandemiya ilə bağlı sərtləşdirilmiş karantin dövrünə təsadüf edir. Yəni hamı - əksər ailə üzvü evdədir və istilik sisteminə ehtiyac əvvəlkindən çoxdur. Güzəştli aşağı tarifli limit həddinin də elə 2020-ci ilin dekabr ayında keçilməsinə çox təsadüf edildi. İstənilən abonent öz sərfiyyatı, ödənişləri barədə abonent saldosunu əldə edə bilər. Məsələn, bu, "ASAN Kommunal” mərkəzlərində mümkündür. Və yaxud 104/185 saylı Çağrı Mərkəzinə də müraciət edib sorğu verə bilərlər”.

Sayğacların dəyişdirilməsinə gəlincə, həmsöhbətimiz qeyd etdi ki, 2019-cu ildə Fransanın “İltron-Gallus” şirkəti qalib olmayıb və köhnə smart sayğacların istehsalçısı da onlar olduğuna görə bu sayğaclardan imtina edilib. Digər tərəfdən, qiymət bizim üçün sərfəli hesab olunmurdu. Pandemiya dövründə gəlir və xərclərimizi nəzərə alaraq, sərfəli təkliflər edən Almaniyanın “Zenner” şirkəti qalib olaraq test üçün onlardan 200 ədəd test-sınaq işləri üçün smart-kart tipli sayğaclar alınaraq ölkəyə gətirilib. Hazırda proses gedir və nəzarətdə saxlanılır. Əslində, bu sayğaclar yeni gətirilməyib, illərdir mexaniki sayğaclar alınıb.

  • Mirvari Qəhrəmanlı: “Vətəndaş əgər belə halla narazıdırsa, mütləq şəkildə məhkəməyə müraciət etsin”

"Neftçilərin Hüquqlarının Müdafiə Təşkilatı" (NHMT) İctimai Birliyinin rəhbəri Mirvari Qəhrəmanlı məsələ ilə bağlı bildirdi ki, analoji hal  2019-cu ildə olub: “O zaman 50-60 nəfər vətəndaşın sayğacının çox pul yazması ilə bağlı məhkəmə yolu ilə sübut etdik ki, əslində, bu sayğaclar artıq pul yazır. Fransadan alınan smart tipli sayğaclar çox baha idi, həm də ona müdaxilə etmək çətin idi. Məlumdur ki, dekabrın 31-də qazın limiti sıfırlanır. Amma bu dəfə bu proses yanvarın 5-də həyata keçirilib. Necə olur bir neçə gündə vətəndaşa bu qədər borc yazılıb. Bu da o deməkdir ki, sayğaclara müdaxilə olur. Vətəndaş əgər belə halla narazıdırsa, mütləq şəkildə məhkəməyə müraciət etsin. Tələb etsin ki, həmin sayğac müstəqil laboratoriyada yoxlanılsın. Bu işin ən dəqiq sirrini onu quraşdıran şəxslər bilir”.

Günel CƏLİLOVA

Son xəbərlər