Vaksinasiya prosesinin tətbiq edilməsinə çalışırıq. “Trend”in məlumatına görə, bunu TƏBİB-in İdarə heyətinin sədri Ramin Bayramlı dekabrın 15-də keçirilən brifinqdə deyib.
R.Bayramlı əlavə edib ki, bəzən bir xəstəni xilas etmək üçün 5-6 həkim öz həyatını təhlükəyə atır: “Xəstəliyin 2-ci dalğası ilə çətin vəziyyət yaşayırıq. Gündəlik yoluxmaların sayı xeyli artıb, lakin hələ ki, biz bunun öhdəsindən gələ bilirik, ancaq səhiyyə sistemi limitsiz deyil. Ona görə də vaksinasiya prosesinin tətbiq edilməsinə çalışırıq”.
TƏBİB sədri deyib ki, vaksinlər sayəsidə dünyada 10-larla təhlükəli xəstəliyin qarşısı alınıb: “Əgər bu vaksinlər olmasaydı, dünyamız daha təhlükəli olardı. Təəssüflər olsun ki, biz yeni koronavirus pandemiyası ilə üz-üzə qalmışıq.
R.Bayramlı bildirib ki, koronavirus bizim orqanizmimizə yaddır: “Koronavirus ağ ciyərdən orqanizmə daxil olur və bədənə yayılır. Virus bir daxil olur və minlərlə xaric olur, bədən orqanlarını destrukturizasiyaya uğradır. COVİD-19 xəstəliyi pandemiyadır və virusa qarşı effektiv dərman vasitəsinin tapılması uzun bir yoldur. Sərt karantin rejimi də iqtisadi baxımdan ağır prosesdir. Hazırda ən asan yol vaksinasiyadır”.
Ramin Bayramlı deyib ki, vaksinin effektivliyi və təhlükəsizliyi haqqında hələ tam dəqiq məlumat vermək çətindir, ancaq ümidverici xəbərlər var. Onun sözlərinə görə, müxtəlif şirkətlər tərəfindən təklif edilən vaksinlər var və Azərbaycan 5 mövcud vaksinlə tanış olub. Bu vaksinlər ABŞ-Almaniya tərəfindən birgə istehsal edilən, Rusiya (Sputnik V), ABŞ (Moderna) Oxford Universitetində (İngiltərə, İsveç alimləri və AstraZeneca Şirkəti ilə birgə hazırlanan) və Çində (Sinovac) istehsal edilən vaksinlərdir.
İlkin mərhələdə əhalinin 10 faizinin vaksinasiya olunacağını deyən TƏBİB-in İdarə heyətinin sədri bildirib ki, növbəti mrhələdə daha çox insan vaksinasiya ediləcək: “Nə qədər çox insan vaksinasiya olunarsa, kütləvi immunitetimiz bir o qədər də möhkəm olar”.
R.Bayramlı onu da deyib ki, vaksin vurdurmaq o demək deyil ki, maskadan istifadə etmək lazım deyil.
O qeyd edib ki, vaksin vurulduqdan sonra immunitetin yaranması müəyyən bir zaman alır: “Ona görə də həm özünü, həm də ətrafdakıları qorumaq üçün müəyyən müddət maskalardan istifadəyə davam etməliyik”.
R.Bayramlı koronavirus vaksininin qoruyuculuq müddəti barədə də danışıb. O deyib ki, koronavirusa qarşı vaksinin qoruyuculuq müddəti ilə bağlı hazırda dəqiq bir söz demək çətindir. Ancaq ən az bir il qoruyuculuq müddətinin olduğu deyilir.
R.Bayramlı bildirib ki, bununla bağlı vəziyyəti zaman göstərəcək: “Ən az bir il qoruyuculuğu barədə fikirlər var. Bəlkə bu müddət uzun oldu, bəlkə ildə bir fədə vaksinasiyaya ehtiyac olacaq, bəlkə vaksinin təsiri ömürlük olacaq. Bütün bunları zaman göstərəcək”.
Azərbaycanda birinci kimlərin vaksinasiya olunacağına gəldikdə isə, R.Bayramlı deyib ki, ilk vaksinasiya ən yüksək risq qrupuna daxil olan insanlar arasında aparılacaq. R.Bayramlı bildirib ki, risq qruplarının başında səhiyyə işçiləri gəlir. Onun sözlərinə görə, ikinci yerdə 65 yaşdan yuxarı insanlar gəlir. O qeyd edib ki, dünyada bu təcrübədən istifadə olunur və böyük ehtimalla, Azərbaycanda da bu təcrübə nəzərə alınacaq.
Azərbaycan da koronavirusa qarşı vaksinlərdən istifadə üçün həm ikitərəfli, həm də çoxtərəfli danışıqlar aparır. Bunu isə Nazirlər Kabineti yanında Operativ Qərargahın keçirdiyi brifinqdə Səhiyyə nazirinin müavini Viktor Qasımov deyib.
Onun sözlərinə görə, ikitərəfli danışıqlarda Türkiyə ilə daha yaxından işbirliyi aparılır: “Hazırda COVİD-19 xəstəliyini törədən virus 1 ilə yaxındır ki, dünyada tüğyan edir. Buna qarşı vaksin artıq hazırlanıb və onun tətbiqinə bəzi ölkələrdə başlanılıb”.
V.Qasımov deyib ki, Azərbaycana alınıb gətiriləcək vaksinlər təhlükəsizilik göstəricilərinə 100 faiz cavab verəcək. Onun sözlərinə görə, vaksinlərin ölkəyə gətirilməsi zamanı “Soyuq zəncir” prinsipinə əməl ediləcək. Eyni zamanda, tibbi personalın vaksinasiyasının aparılmasına hazırlıq da təmin ediləcək.
V.Qasımov onu da deyib ki, koronavirusa qarşı vaksinasiya pulsuz olacaq və bunun üçün strategiya artıq hazırdır. Onun sözlərinə görə, ölkədə vaksinasiya pulsuz həyata keçiriləcək və artıq risk qrupları müəyyənləşib. İlk növbədə onların vaksinasiyası həyata keçiriləcək.
Vəli Axundov adına Elmi Tədqiqat Tibbi Profilaktika İnstitutunun direktoru Adil Allahverdiyev isə deyib ki, vaksinlərə inanmaq lazımdır. Onun sözlərinə görə, koronavirus yeni ortaya çıxan zaman onun olmadığı barədə məlumatlar yayıldı. İndi isə sosial şəbəkələrdə vaksinlə bağlı ziddiyyətli fikirlər irəli sürülür. Lakin tarix boyu infeksion xəstəliklərin müalicəsində vaksinlərdən istifadə edilib: "Ola bilər ki, bəzi şəxslərdə vaksinlər nəticəsində güclü immun sistemi yaransın, bəzilərində isə zəif immun sistemi yaransın, bəzilərində isə heç yaranmaya bilər. Bəzən bir ailədə bir nəfər xəstələnir, digəri xəstələnmir. Bu, insanın immun sisteminin vəziyyətindən asılıdır".
