Son günlər sosial şəbəkələrdə sərt karantin rejimi günlərində parça maska taxanların cərimələnəcəyi ilə bağlı fikirlər səsləndirilir. Qeyd olunur ki, parça maska koronavirusun yayılmasının qarşısının alınmasında hər hansı bir effektə malik olmadığı üçün, bu qoruyucu vasitədən istifadə edənlər cərimələnəcək. Bu fikirlər əhali arasında narahatlıq yaradıb.
Məsələnin ciddiliyini nəzərə alıb aidiyyəti qurumlarla və ekspertlərlə əlaqə saxladıq.
Elşad Hacıyev: “Sosial şəbəkələrdə bu mövzu ilə əlaqədar yayılan məlumatlar həqiqəti əks etdirmir”
Daxili İşlər Nazirliyinin (DİN) Mətbuat Xidmətinin KİV və ictimaiyyətlə əlaqələr şöbəsinin rəisi, polis mayoru Elşad Hacıyev bildirdi ki, sözügedən iddialar əsassızdır: “Polis və Daxili Qoşunların hərbi qulluqçuları tərəfindən tibbi maskaların çeşidlərinə və ya rənglərinə hər hansı bir məhdudiyyət tətbiq olunmur. Sosial şəbəkələrdə bu mövzu ilə əlaqədar yayılan məlumatlar həqiqəti əks etdirmir. 21 noyabr tarixindən etibarən xüsusi karantin rejiminin qüvvədə olduğu müddətdə ölkə ərazisində bütün qapalı və açıq məkanlarda, ictimai yerlərdə müvafiq qaydada tibbi maskalardan istifadə məcburidir. Onu da qeyd edim ki, tibbi maskalardan istifadə edilməməsi və ya tələb olunan normalara uyğun şəkildə taxılmaması qanunla müəyyən edilmiş qaydada məsuliyyət yaradır”.
Aydın Əliyev: “Parça maskalardan deyil, tibbi maskalardan istifadə vacibdir”
Azərbaycan Tibb Universitetinin Tədris Terapevtik Klinikasının Şüa diaqnostikası şöbəsinin müdiri, radioloq Aydın Əliyev bildirdi ki, koronavirusla mübarizədə əhalinin tibbi maskalardan istifadə etməai məqsədəuyğundur: “Çünki həm adi cərrahi maska var, həm də N95 maskası var. Bunların burun hissəsində metallik komponent var. Onu əyib buruna uyğunlaşdırmaq olur. Bu zaman birbaşa açıq havanın tənəffüs yollarına keçməsinin qarşısı alınır. Amma bu, qara maskalardır, hansı ki, dekorativ maskalardır, ev şəraitində bəzəkli formada hazırlanır, onların burun hissəsində metallik komponent olmadığı üçün burun-yanaq hissədə o bucaq açıq qalır və oradan açıq hava tənəffüs yollarına daxil olur. Təbii ki, belə olan halda da koronavirusun hava-damcı yolu ilə tənəffüs yollarına daxil olmaq ehtimalı daha da artır. Bu səbəbdən də parça maskalardan deyil, tibbi maskalardan istifadə vacibdir”.
Günel CƏLİLOVA
