Bildiyimiz kimi, Nazirlər Kabinetinin qərarına əsasən, ölkəmizdə xüsusi karantin rejimi 2021-ci il yanvarın 31-nə qədər uzadılıb. Bu ilin dekabr ayının 14-dən 2021-ci il yanvarın 18-nə qədər isə sərtləşdirilmiş xüsusi karantin rejimi tətbiq ediləcək.
Xüsusi karantin rejimi müddətində ölkəmizdə kütləvi yığıncaqların, toy, yas və nişan mərasimlərinin keçirilməsinə icazə verilmir. Bu mərasimləri gizlin şəkildə keçirənlər isə karantin qaydalarını pozduqlarına görə qanun qarşısında cavab verməli olurlar. COVID-19 virusuna yoluxanların sayının günü-gündən artmasının əsas səbəbkarı gizli yığıncaqlardır ki, burada insanlar arasında yoluxma risqi daha yüksək olur.
Çox təəssüflər olsun ki, xüsusi karantin rejiminin tələblərini pozan kifayət qədər restoran və şadlıq evi, eləcə də orada toy, nişan mərasimi təşkil edən vətəndaşlarımız var. Bəzi vətəndaşlarımız qanunlara əhəmiyyət vermək istəmirlər. Son günlər belə hallara sıx-sıx rast gəlinir. Bir neçə şadlıq evi dövlətin qanunlarını saymadan toy-nişan, ad günü mərasimləri keçirir. Bir tərəfdən də şəhidlərin qırxı çıxmamış toy edənlər də az deyil.
Bilirik ki, toy, ad günü, nişan mərasimlərini keçirən şəxslər və mərasimin təşkil edildiyi şadlıq evlərinin, restoranların sahibləri saxlanaraq polis bölmələrinə aparılır, onlar arasında cərimələnənlər də, həbs edilənlər də olub. Pandemiya başlayandan indiyə qədər dəfələrlə bu hal təkrarlanıb, amma başqalarının vəziyyətindən nəticə çıxaranlar yoxdur. Vətəndaşlar şadlıq evlərində toy edir, buna görə vətəndaşlar da, şadlıq evləri sahibləri də cərimələnir, cərimələrini ödədikdən sonra onlar yenidən öz əməllərini davam etdirirlər. Yəni nə cərimə, nə də həbslər şadlıq evlərinin qanunazidd əməllərini dayandıra bilmir. Onda tamam başqa metodun tətbiq edilməsi gündəmə gəlir. Bu halın qarşısının alınması üçün ən optimal variant karantin qaydalarını kobud şəkildə pozan restoran və şadlıq evlərinin lisenziyalarının əllərindən alınması, onların fəaliyyətinin rəsmən qadağan olunmasıdır. Fikrimzcə, bu daha təsirli metod olardı, çünki şadlıq evləri və restoranların sahibləri İnzibati Xətalar Məcəlləsinə əsasən cərimə olunurlar, bəziləri isə 15 sutka cəza alırlar, onlara qarşı bundan əlavə tədbirlər görülmür. Amma onların lisenziyaları ləğv edilərsə, başqaları da bundan dərs götürərlər.
“Bu şadlıq evlərinə, restoranlara heç bir güzəşt edilə və onlara hər hansı bir humanist yanaşmadan söhbət gedə bilməz”
“Polisə Dəstək” İctimai Birliyinin sədri, tanınmış hüquqşünas Şəmsəddin Əliyev “Bakı-Xəbər”ə şərhində bildirdi ki, birmənalı şəkildə, həmin şadlıq saraylarının və restoranların lisenziyaları ləğv olunmalıdır. “Əvvəlcə bir məqamı qeyd edim. Koronavirus ilk dəfə Çinin Uahan şəhərində meydana gəldi, məlumatıma görə, bu şəhərin əhalisi 11 milyon nəfərdir. Orada yoluxma ilə bağlı 10-15 fakt çıxdı ortaya və Çin dövləti bu fakta görə həmin şəhəri bağladı. Bir nəfər bayıra çıxa bilmədi. İnsanlar bu virusun qarşısını almaq üçün özlərində güc taparaq özlərini və digərlərini yoluxdurmamaq üçün çölə çıxmadılar, bununla da virusa qalib gəldilər.
Azərbaycanda dövlət mart ayından bu yana yoluxmanının qarşısının alınması üçün kifayət qədər sərt tədbir həyata keçirib, karantin qaydalarını pozanlara qarşı sərt qaydalar tətbiq edir, onlar cərimələnir, polis tərəfindən saxlanır. Amma bizim vətəndaşların xeyli bir qismi bu qaydalara əməl etmək istəmir. Onlar öz sağlamlıqlarının qədrini bilmirlər, özləri bilər, amma digərlərinin sağlamlığına hörmətlə yanaşmağa borcludurlar. Bu mənada düşünürəm ki, insanların hər biri Nazirlər Kabinetinin qəbul etdiyi qərarlara hörmətlə yanaşmalıdır. Bu qərarın pozulması, onun icra olunmaması hər bir vətəndaş üçün məsuliyyət yaradır. Karantin qaydalarını pozanlar arasında şadlıq sarayları, restoranlar, kafelər də var. Bu şadlıq saraylarının və restoranların arxasında oliqarx sahibkarlar dururlar. Hesab edirəm ki, karantin qaydalarına məhəl qoymayan, dövlətin qanunlarını tapdayan şadlıq sarayları və restoranların lisenziyaları ləğv edilməli, onların fəaliyyətinə qadağa qoyulmalıdır. Onların onsuz da əhaliyə, cəmiyyətə, dövlətə zərrə qədər xeyirləri yoxdur, ancaq zərərləri var. Vətəndaşlar orada toy şənliyi keçirəndə belə yığılan pullar gənc ailə quranlara yox, elə o şadlıq saraylarına gedir. Ola bilsin ki, restoran və şadlıq evlərinin əldə etdiyi gəlirdən cüzi miqdarda vergiyə pul ödəmələri olur, amma gəlirin böyük hissəsi isə onlara qalır. Dünyanı əsarətində saxlayan pandemiya ilə mübarizə istiqamətində Nazirlər Kabinetinin verdiyi qərarlara hər kəs, birmənalı şəkildə, əməl etməli, etməyənlər isə sərt şəkildə cəzalandırılmalıdır”.
Ş.Əliyev hesab edir ki, hazırda pandemiya ilə əlaqədar ekstremal bir vəziyyət yaranıb, bu vəziyyətdə ortaya çıxan hər cəmiyyətə, insan sağlamlığına zidd hərəkətlərin qarşısının alınması üçün Nazirlər Kabinetinin qərarlarında ehtiva olunmayan əlavə tədbirlər də görmək mümkündür: “Bunu təcrübə göstərir. Karantin qaydalarına zidd addımlar atan restoran və şadlıq evlərinin lisenziyaları ləğv olunmalıdır. Müəyyən qurumlar bununla bağlı məhkəməyə müraciət edə, bunun əsasında məhkəmə də, birmənalı şəkildə, karantin qaydalarına əməl etməyən, insan sağlamlığı üçün ciddi təhlükə yaradan restoran, şadlıq evləri və kafelərin fəaliyyətinə xitam verə bilər. Bu şadlıq evlərinin bu addımları ehtiyatsızlıq deyil, onlar bilərkdən, qəsdən karantin qaydalarını pozurlar. Bu şadlıq evlərinə, restoranlara heç bir güzəşt edilə və onlara hər hansı bir humanist yanaşmadan söhbət gedə bilməz. Karantin qaydalarını pozan restoran və şadlıq evlərinə qarşı ən sərt cəza tətbiq etmək lazımdır. Ən azı onların lisenziyaları ləğv edilsin, fəaliyyətlərinə 6 ay, bir ay qadağa qoyulsun. Onlara qarşı görülən bu cəza tədbirləri isə başqalarına görk olacaq və onların əməllərini təkrarlamayacaqlar”.
İradə SARIYEVA
