Şanlı Ordumuz Ali Baş Komandan İlham Əliyevin rəhbərliyi ilə qəhrəmanlıq, peşəkarlıq nümayış etdirərək 44 gün ərzində Azərbaycan xalqının 30 illik yurd nisgilinə son qoydu. Vətən tarixinin bu şərəfli salnaməsinə öz adını yazan igidlərdən biri də dağlar diyarı Lerik rayonunun Dico kəndində dünyaya göz açmış Firdovsi Balaxan oğlu Tahirov idi.
Firdovsi el təəssübünü çəkən, halallığı sevən, çörəkli nəslin nümayəndəsidir. Atası Balaxan kişi ömrünü xalqına fayda vermək, doğma yurdunun hər bir işinə gərək olmaq amalına həsr edib. Bu işgüzar, ləyaqətli insan övladlarına gözəl tərbiyə verərək onları özü kimi cəmiyyətə yararlı boya-başa çatdırıb. Övladlarında qurub-yaratmaq eşqi böyükdür. Od götürüləsi, qeyrət içiləsi bu ocağın oğul payı Firdovsi doğma torpağa vurğun, Vətənə qəlbən bağlı oğul kimi yetkinlik yaşına çatır. Vətən, el qarşısında mənəvi, insanlıq borcunu yaxşı əməllərlə həyatlara nur çiləməkdə görür. Belə yüksək amalla 2015-ci ildə Azərbaycan Dövlət Pedaqoji Universitetinin tarix fakültəsinə daxil olur. Torpaq sevgisi ürəyinin lap dərinliyinə hopur. Yaxşı oxumaqla saflaşır, həm də düşmən təcavüzünə məruz qalan Qarabağın azadlığı üçün həyatın sınaqlarına sinə gərməyə hazırlaşır. Tələbə Firdovsini erməni dığaların xəyanətkar hərəkətləri ciddi düşündürür, narahat edir. Çox keçmir, elə xalqına, millətinə sədaqətini, sevgili Vətəninə sadiqliyini torpaq naminə Azərbaycanın haqq savaşında döyüş meydanında qani ilə təsdiq edir. Şəhidlik zirvəsinə ucalmaqla bugünümüz üçün də, sabahımız üçün də var olanların sırasına qoşulur. Beləcə, 23 yaşında sevilən yurduna gözəl mənəvi sərvət yadigar qoyur. Bu sərvətin özündə isə müqəddəs bildiyi, canını yolunda qurban etdiyi torpağın özü boyda ilahi bir məhəbbət vardır...
Bəli, ürəyinin istəyini əsas götürən Firdovsi oxuduğu ali məktəbin sonuncu kursunda, yəni 2019-cu ildə Ordu sıralarına yazılır. Məqamında vətən torpağının hər qarışında döyüşə hazır olan Lerikin igid oğlu Xüsusi Təyinatlı dəstədə xidmətə başlayır. Bir müddət Gəncədə təlim keçir. Əla döyüşçü keyfiyyətləri nümayiş etdirir. Köksündə qəhrəman ürəyi döyünən, torpaq sevgisi qanında-iliyində olan Firdovsi haçansa dığalara qan qusdurmaq üçün odun-alovun içinə, səngərə, döyüşə hərtərəfli hazırlaşır.
F.Tahirovun cəbhə yolu Tovuzdan başlanır. Amalı vətən torpağını canı bahasına qorumaq, ən əsası mübarizə meydanında dığaları diz üstə çökdürüb Qarabağı tezliklə azad etmək olur. Tovuzun qanlı hadisələrində son gülləsinədək vuruşaraq böyük igidlik, şücaət göstərib Vətən qarşısında müqəddəs borcunu şərəflə yerinə yetirir. Firdovsi bir daha sübut edir ki, öz halal torpağı uğrunda hər an canından-qanından keçməyi bacaran oğuldur.
Namərd erməni dığalardan intiqam, qisas almaq alovu Firdovsinin Vətənlə bir döyünən qəlbində get-gedə alovlanır. Buna görə də ikinci Qarabağ müharibəsinin başladığı anda işğal edilmiş torpaqların hər qarışını azad görmək eşqi ilə qorxmadan odun-alovun içinə gedir. Öldürdüyü hər erməniyə görə fərəhindən qanad açır. Döyüş ərzində məhv etdiyi dığaların sayı bilinmir. Cəbhə xəttində özü şəhidlik zirvəsinə ucalsa da, cəsurluğu, igidliyi, mərdliyi əsgər yoldaşlarına nümunə olaraq onları qələbəyə doğru aparır...
Vətən sevgisi Firdovsi üçün hər şeydən uca idi. Qanında axan bu ilahi sevgi əbədi olaraq onun adını könüllərə yazır. Aramızdan vaxtsız getsə də, gələn nəsillərə örnək həyat yolu yaşayır bu igid şəhidimiz. İndi 30 il düşmən tapdağında qalan Qarabağımızın hər addımında üçrəngli bayrağımız dalğalanır. Vətən sevdalı igid bunu ürəkdən arzulayırdı. Odur ki, şəhidlik zirvəsindən gələcəyə boylanan ruhu çox rahatdır...
Zəfər ORUCOĞLU Azərbaycan Jurnalistlər Birliyinin üzvü
