Azərbaycanda ciddi məhdudiyyətlərə baxmayaraq, yeni növ koronavirus infeksiyası sürətlə yayılır. Yoluxma və ölüm səviyyəsinə görə ölkəmiz Cənubi Qafqazda ilk yerdə dayanır. Hər gün 4300-dən artıq yoluxma, 40-a yaxın ölüm qeydə alınır ki, bu da kifayət qədər yüksək göstərici hesab olunur. Artıq təcili yardımın normal fəaliyyəti pozulub, xəstəxanalar dolub və lazımi dərman preparatları kəskin bahalaşıb və ya qıtlaşıb.
Xatırladaq ki, yoluxmaların sayının kəskin artması təcili yardımın bütün çağırışlara yetişə bilməməsinə gətirib çıxarıb. Sosial şəbəkələrdə bu barədə çoxsaylı şikayətə, narazılığa rast gəlinir.
Yoluxma sayı sürətlə artdığı üçün karantin rejiminin tam sərtləşdirilməsi təklif olunur.
Ümumdünya Səhiyyə Təşkilatının Azərbaycandakı nümayəndəliyinin rəhbəri Hande Harmancı media nümayəndələrinə açıqlamasında qeyd edib ki, virusun yayılmasının qarşısının alınması insanların tövsiyələrə nə dərəcədə riayət etməsindən asılıdır: “Ən vacib qabaqlayıcı tədbir əl və tənəffüs gigiyenası qaydalarına riayət etmək (müvafiq olaraq maska taxmaq da daxil olmaqla), digər insanlarla məsafə saxlamaq və müntəzəm olaraq qapalı yerləri havalandırmaqdır. Ümid edirik ki, Azərbaycanda koronavirusla bağlı hər kəs tövsiyələrə riayət edəcək və tam qapanmaya getməyə ehtiyac yaranmayacaq. Əks halda, tam qapanma mümkün olacaq”.
“…bu gün yoluxmaların sayının azalmasına ehtiyac var”
Tanınmış həkim, farmakoloq Müşfiq Hüseynov bildirdi ki, COVID-19-un ikinci dalğası birincidən daha dağıdıcı və təhlükəlidir: "Əgər 4 ay əvvəl birinci dalğada insanlar “xəstəlik varsa, niyə mənim tanıdığım heç kimdə yoxdur” sualı verirdilərsə, bu gün, demək olar, hər evdə xəstə var. Artıq hamı inanır, amma gecikmişik. Bir aydır həkimlər həyəcan təbili çalır ki, özünüzü qoruyun, maska, sosial məsafə qaydalarına, gigiyenaya əməl edin. Dəfələrlə deyildi, yazıldı, göstərildi. Amma keçən həftə küçədə maska məcburiyyəti olmayana qədər buna məhəl qoyan yox idi. Nəticə göz qabağındadır".
M.Hüseynovun sözlərinə görə, səhiyyə sistemi çökməsə də, artıq “error” verir: “Bu gözlənilirdimi? Əlbəttə, gözlənilirdi. Çexiya kimi inkişaf etmiş Avropa ölkəsində sistem çökmüşdüsə, Türkiyə kimi tibbi nöqteyi-nəzərdən dünya səviyyəli ölkədə xəstəxanalar doludursa, elementar dərman istehsalı olmayan Azərbaycanda sistemin davam gətirəcəyi şübhəli idi. Ölkə rəhbərliyinin təcili tikdirdiyi modul tipli xəstəxanalar olmasaydı, bu gün nələr olardı, bəlli deyil. Amma onlarda da yer limitlidir və bu gün, demək olar ki, yer yoxdur".
Həmsöhbətimiz hesab edir ki, 2 həftəlik sərt karantin rejimi tətbiq edilməlidir: “Təəssüf ki, gündəlik yoluxmaların sayı azalmır, əksinə, yoluxanların və ölənlərin sayında artım müşahidə olunur. Rəqəmlər 4300-4500 arasında dəyişir. İstənilən halda, yoluxmaların sayında artım gözləniləndir. Soyuq havada bütün xəstəliklər baş qaldırır. Həmçinin, xəstəliyin artması da koronavirusun aktivləşməsinə yol açır. Qarşıdan Yeni il gəlir və insanlar bir-birinin evinə gedir, bayramı birlikdə qeyd etməyə üstünlük verirlər. Düzdür, virusa görə insanlar evdən kənara çıxmamağa çalışır. Ancaq yenə də belə hallar ola bilər.
Restoranlarda da bayrama görə sıxlıq ola bilər. Hesab edirəm ki, karantin rejimini 15 gün sərtləşdirmək yaxşı olar. Amma yenə də iqtisadi tərəfləri mütləq şəkildə araşdırılmalıdır. Qapanmaya gediləndə iş yerləri bağlanır. Ona görə bu məqamlar da diqqətdə saxlanmalıdır. 15 günlük qapanma yoluxanların sayının azalmasına səbəb ola bilər. Bu gün yoluxmaların sayının azalmasına ehtiyac var. Demək olar ki, xəstəxanalarda yer yoxdur”.
Günel CƏLİLOVA
