Milli Ordunun zabiti Ramil Səfərovun Ermənistan hərbçisi Qurqen Markoryanı Budapeştdə qətlə yetirməsinin ildönümüdür. Ermənistan KİV-i bu məsələ ilə bağlı xüsusi təbliğata start verib. Onlar həmin hadisənin tarixinə ekskurs edirlər.
Bildirirlər ki, guya Macarıstan bu məsələdə qanunsuzluğa yol verərək R.Səfərovun Azərbaycana ekstradisiyasını təmin edib. Zabitimizin Azərbaycanda əfv edilməsini də erməni mediası qanunsuzluq kimi təqdim etməyə çalışır. Hətta bu hadisəyə görə Ermənistanla Macarıstan arasındakı diplomatik münasibətlərin kəsildiyinə də nəzər salınır.
Qeyd olunur ki, Qurqen Markoryanın öldürülməsi ilə bağlı məhkəmə araşdırması İnsan Haqlarına dair Avropa Məhkəməsinin sonuncu etapındadır. Ermənistan mətbuatına bu barədə məlumat verən vəkil Siarnuş Saakyan bildirib ki, yaxın günlərdə yekun qərar açıqlanacaq. Vəkil bildirib ki, qəbul ediləcək məhkəmə qərarı danışıqlar prosesində siyasətçilərin əlində yaxşı təzyiq vasitəsi olacaq. Vəkilin mövqeyindən belə başa düşülür ki, onlar indidən məhkəmənin hansı qərar verə biləcəyini təxmin edir və ya bu barədə məqsədli şəkildə cəmiyyətə çaşdırıcı məlumat ötürürlər. Ümumiyyətlə, bizim ekspertlər Ramil Səfərovla bağlı Avropa Məhkəməsində aparılan işin perspektivini necə dəyərləndirirlər?
Yeganə Hacıyeva: “Cəzasını çəkmiş bir şəxslə bağlı hansısa sərt qərarın qəbul edilməsi Avropa Məhkəməsinin səlahiyyətinə aid deyil”
Beynəlxalq məsələlər üzrə ekspert Yeganə Hacıyeva “Bakı-Xəbər”ə bildirdi ki, həmin qətl hadisəsi Ermənistanda yox, Avropa ölkələrindən birində baş verib: “Hadisənin yaşandığı Macarıstan dövləti suveren məhkəmə sisteminə malikdir. Ölkə Avropa Şurasının üzvü olduğu səbəbindən konvensiyaları da qəbul edib. Baş verən hadisə həmin ölkənin qanunlarına uyğun şəkildə araşdırılıb, Ramil Səfərov oranın qərarı ilə cəzaya məhkum edilib və uzun müddət həbsdə saxlanıb. Ardınca Avropa Şurasının özünün tanıdığı qaydalara əsasən, iki ölkənin razılığına görə Azərbaycana ekstradisya edilib və ölkə başçısı tərəfindən əfv edilib. Ramil Səfərovla bağlı bütün hüquqi prosedurlar həyata keçirilib. Ermənistan tərəfinin etdiyi şikayətdə əsasən milli diskriminasiya faktı qabardılır. Deyilir ki, Ramil Səfərov Qurqeni milli mənsubuyyətinə görə öldürüb. Düzdür, Avropa qanunları və konvensiyaları diskriminasiyanı qəbul etmir. Ancaq həmin qətl birmənalı şəkildə diskriminasiya zəminində olmayıb. Ramil Səfərovun özü diskriminasiyaya məruz qalıb. Milli kimliyinə görə doğma kəndindən didərgin düşüb. Bütün dediklərimiz onun psixikasında ciddi izlər buraxıb. Baş verən qətl hadisəsində Ramil Səfərovun təhqir edilməsi amili də dayanır”.
Ekspertin sözlərinə görə, Azərbaycan tərəfinin müdafiə olunmaq üçün əlində ciddi arqumentləri var: “Erməni zabiti Səfərovu milli kimlik zəmnində təhqir edib. Bu məsələ ilə bağlı Avropa Məhkəməsinin hansısa sərt qərar qəbul edəcəyi inandırıcı deyil. Qərar təxmini belə olacaq ki, qətli törədənlə bağlı lazımi addımlar atılıb, sonra isə o, qanuni şəkildə azad edilib. Cəzasını çəkmiş bir şəxslə bağlı hansısa sərt qərarın qəbul edilməsi Avropa Məhkəməsinin səlahiyyətinə aid deyil. Ermənistan tərəfinin şikayətində emosional məqamlara daha çox üstünlük verilib. Hüquq isə belə şeyləri tanımır, konkretliyi qəbul edir. Ramil Səfərov həmin hərəkətə görə cəzasını çəkib və qanuni əsaslarla azad olunub”.
Məhəmmədəli QƏRİBLİ
