60 saylı Salyan-Neftçala seçki dairəsinin lider namizədi olan, Ana Vətən Partiyasının sədri Fəzail Ağamalı mediaya açıqlamasında bildirib ki, parlamentin tamamilə yenilənməsi ciddi problemlərə səbəb ola bilərdi: “Növbədənkənar parlament seçkiləri parlamentin 125 deputatının tamamilə yenilərlə əvəzlənməsi demək deyil. Bu çox böyük, ciddi problemlər yarada bilərdi. Ola bilər ki, bəzi insanlar özünü cəmiyyətdə təsdiq edib, amma parlament təcrübəsi yoxdur”.
F.Ağamalının bu açıqlaması cəmiyyətdə birmənalı qarşılanmayıb. Hətta bəziləri bunu hakimiyyətin ünvanına səslənən təhdid kimi də dəyərləndiriblər. Belə qənaətdə olanlardan biri REAL Partiyasının funksioneri Natiq Cəfərli olub. O, mediaya verdiyi açıqlamada yuxarıda qeyd etdiyimiz qənaəti bölüşüb.
F.Ağamalı sonra verdiyi açıqlamasında hakimiyyəti təhdid etmədiyini deyib: “Çox təəssüf edirəm ki, kifayət qədər intellekti olan Natiq Cəfərli mənim dünya praktikasında və parlament peşəkarlığında öz təsdiqini tapan rəyimə başqa çür yanaşıb. Əlbəttə, parlamentə keçirilən seçkilərdə həlledici söz seçicilərindir. Seçicilərin etimad göstərdiyi şəxslər parlamentdə təmsil olunmalıdırlar. Bu, inkaredilməz faktdır. Xüsusi olaraq öz adımdan deyirəm ki mənim illər boyu fəaliyyətimdə hakimiyyəti təhdid etmək praktikası yoxdur”.
Artıq seçkilər baş tutub və parlamentdə kimlərin təmsil olunacağınının böyük əksəriyyəti məlumdur. Ortada olan fakt budur ki, parlament tam yenilənmədi. F.Ağamalının fikirlərində hansısa məqsəd və məram axtarmaqdan da uzağıq. Çünki özü bu məsələyə aydınlıq gətirib. Ancaq bu məsələyə bir nəzəri cəhətdən yanaşmaq istərdik. Parlamentin 125 deputatının hamısı yenilənsəydi, bunun ölkəmiz üçün hansısa təhlükəsi ola bilərdimi? Bir faktı da nəzərə alaq ki, keçmiş parlamentin tərkibinə cəmiyyətdə böyük inanmsızlıq vardı.
Vüqar Rəhimzadə: “Yenilənmənin hansı şəkildə əks edilməsindən asılı olmayaraq, bunun dövlətimiz üçün heç bir təhlükəsi ola bilməzdi”
“İki Sahil” qəzetinin baş redaktoru Vüqar Rəhimzadə “Bakı-Xəbər”ə açıqlamasında bildirdi ki, bu məsələlərə bir qədər qanuni aspektdən yanaşmaq lazımdır: “Parlamentin hansı tərkibdə olmasını biz istəyimizlə müəyyən edə bilmərik. Qanunverici orqan xalqın seçimi əsasında formalaşdırılır. Seçkilərin ümumi nəticəsi göstərdi ki, seçicilər orada həm təcrübəli insanları, həm də yeni simaları görmək istəyirlər. Artıq bu seçim olub və arxada qalıb. Hesab edirəm ki, parlamentin tamamilə yenilənməsi də heç bir təhlükəyə səbəb ola bilməzdi. Bir daha qeyd edim ki, bu bizim istəyimizlə olmur. Peşəkarlıqla gənclərin sintezi daha uğurlu nəticə verə bilər. Biz təcrübəli kadrları da kənarda saxlaya bilmərik. Tamamilə passivlik göstərən millət vəkillərinin bir çoxuna bu dəfə etimad göstərilmədi. Bunun özü də yenilənmə istiqamətində atılan addımdır. Yenilənmə deyəndə biz, mütləq mənada, bütün deputatların ucdantutma dəyişməsini nəzərdə tutmamalıyıq. Parlamentdə köhnələr də təmsil olunmalıdır, yenilər də. Biz təcrübədən daim bəhrələnməliyik. Amma bir daha qeyd edim ki, yenilənmənin hansı şəkildə əks edilməsindən asılı olmayaraq, bunun dövlətimiz üçün heç bir təhlükəsi ola bilməzdi. Ümidvaram ki, yeni formalaşacaq parlament də öz işinin öhdəsindən layiqincə gələ biləcək”.
Məhəmmədəli QƏRİBLİ
