Məlum olduğu kimi, “Müsavat”, “ReAL” partiyaları, “D18 hərəkatı” və müstəqil namizədlərin bir qrupu paytaxt ərazisində mitinq keçirməsi ilə bağlı Bakı Şəhər İcra Hakimiyyətinə (BŞİH) müraciət edib. BŞİH alternativ yer olaraq mitinqin 16 fevral 2020-ci il tarixdə, saat 15:00-dan 17:00-dək Qaradağ rayonu, Lökbatan qəsəbəsindəki 28 May küçəsi, “Neftçi" İdman Klubu İctimai Birliyinin Qaradağ təlim-idman bazasında keçirilməsini təklif edib.
Radikallar isə onlar üçün ayrılan yerdə aksiya keçirməkdən imtina edərək fevralın 16-da MSK qarşısında əvvəlcədən rəsmi qaydada xəbərdar olunmalarına baxmayaraq, toplaşmağa cəhd ediblər. Cəhdin qarşısı polis əməkdaşları tərəfindən alınıb və onlar ərazidən kənarlaşdırılıblar. Bu zaman ciddi qanun pozuntusu qeydə alınmayıb, saxlanan və xəsarət alan olmayıb.
Burada radikalların seçkisonrası mitinqinin iki uğursuz təzahürü ortaya çıxır. Birincisi, icazə verilmiş Lökbatandan imtina edərək qanunsus aksiya keçirməyə cəht edirlər. İkincisi, bəlli olduğu kimi, müəyyən pozuntularla bağlı bəzi dairələrdə seçkinin nəticələri ləğv edilib. Digərləri ilə bağlı da araşdırmalar gedir. Bütün bunları radikallar nəzərə almayaraq, qanuni araşdırmalara təzyiq göstərməyə cəhd edirlər.
Təəssüf ki, 4 seçki dairəsinin nəticəsinin Mərkəzi Seçki Komissiyası tərəfindən ləğv edilməsinə, bəzilərinin seçki dairələri üzrə müraciətlərin araşdırılması üçün müvafiq dairə seçki komissiyalarına göndərilməsinə baxmayaraq, bəzi qrupların nəticələri gözləmədən MSK qarşısında aksiya keçirmək cəhdi müəyyən pis niyyətlərə xidmət edir.
“İcazəsiz aksiyalar bu yöndə gedən araşdırmalara təzyiq xarakterli ola bilər”
Məsələyə münasibət bildirən Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) Seçki Qərargahının rəhbəri Məhərrəm Zülfüqarlının sözlərinə görə, qanunsuz aksiya keçirmək doğru deyil: “Təbii ki, radikalların bu addımı doğru deyil. Aksiya üçün hara müəyyən olunubsa, ora getmək lazımdır. Bundan başqa, pozuntu qeydə alınan dairələrlə bağlı araşdırma gedir. İcazəsiz aksiyalar bu yöndə gedən araşdırmalara təzyiq xarakterli ola bilər. Hesab edirəm ki, bütün bunları nəzərə alıb icazəsiz aksiyalardan çəkinmək lazım idi. Burada bir məsələ də var. Məsələ ondadır ki, bəziləri deyirdi sosial şəbəkələrə baxırıq və bundan ləzzət alırıq. Sosial şəbəkələr bizi seçkilərin nəticələrinə baxmağa əsas verir. Hesab edirəm bu cür açıqlamalar olmamalı idi. Çünki sosial şəbəkə rəsmi sənəd deyil. Ona görə də elan olunmalıdır ki, rəsmi sənədlərə baxacayıq, sosial şəbəkələri nəzərdən keçirəcəyik”.
Vidadi ORDAHALLI
