Münhen Təhlükəsizlik Konfransı çərçivəsində keçirilən Ermənistan-Azərbaycan Dağlıq Qarabağ münaqişəsi ilə bağlı panel müzakirələrdə Azərbaycan Prezidenti İlham Əliyevlə Ermənistanın Baş Naziri Nikol Paşinyan arasında baş tutan debat erməni Baş nazirin öz ölkəsində ciddi tənqidlərə, təhqirlərə məruz qalması ilə nəticələnib.
Ermənistan-Azərbaycan Dağlıq Qarabağ münaqişəsi ilə bağlı panel müzakirədə Azərbaycan Prezidentinin savadı, təcrübəsi, natiqlik məharəti, Paşinyanın yalanını tutaraq onu ifşa etməsi erməni mediasında əsas çözülən məsələlərdən biridir. İlham Əliyevin 45 dəqiqəlik müzakirələr zamanı Paşinyandan daha arqumentli danışması, onun üzərində psixoloji üstünlük əldə etməsi Ermənistan mətbuatının da diqqətindən yayınmayıb.
Ermənistanın “Tert.am” saytı bir neçə aparıcı ekspertin iştirakı ilə debatda Paşinyanın və İlham Əliyevin arqumentlərini incələyib. Sözügedən mətbuat orqanında qeyd edilir: “İlham Əliyevin özünü aparması, periodik olaraq Paşinyanın çıxışlarına təbəssümü, bəzən isə açıq şəkildə gülməsi müharibədə məğlub olan tərəfin biz olduğu təəssüratı yaradırdı. Hətta Azərbaycanın Xarici İşlər naziri Elmar Məmmədyarov da Nikol Paşinyana güldü və bu, nazirin hökumət rəhbərimizə, həm də dövlətimizə hörmət etmədiyinin göstəricisi idi. Əslində, özü ilə bu cür davranmağa şərait yaradan Paşinyan bu vəziyyətə görə təqsirkardır.
İndi təsəvvür edirsiniz bağlı qapılar arxasında nələr baş verir? Münhendə hamı gördü ki, kulis arxasında kim diktə edir, kim isə baş əyir. Azərbaycan tərəfi ənənəvi arqumentlərini təkrarladı. Paşinyan görünür ki, buna hazır deyildi və mənasız “münaqişə hər üç xalqın: Azərbaycan, Ermənistan və Qarabağın maraqlarına cavab verməlidir” tezisindən başqa heç nə deyə bilmədi. Tarixi mübahisələri kənara qoysaq, Əliyev növbəti dəfə danışıqlar tələbini açıq ortaya qoydu, Paşinyan isə növbəti dəfə yox...
Rəsmi Bakı Qarabağı öz tərkibində görmək, Şuşa və digər yaşayış məntəqələrini qaytarmaq istəyir. Əliyev mərhələli həll variantını: ətraf 7 rayonun qaytarılmasını, məcburi köçkünlərin öz torpaqlarına qaytarılmasını və s. istəyir.
Paşinyan isə İlham Əliyevin şahin kimi göründüyü müzakirələrdə Qərbin dəstəyini almaq üçün özünü sülh göyərçini kimi təqdim edirdi. Amma bu çox təhlükəli oyundur, xüsusən Münhendə”-deyə məqalədə deyilir.
Şakir Ağayev: “Prezident İlham Əliyevin erməni mediası tərəfindən şahinə bənzədilməsi onun siyasi lider kimi Ermənistan Baş nazirindən çox üstün olduğunu bir daha sübut etdi”
Erməni mətbuatının Prezident İlham Əliyevi şahinə bənzətməsinin səbəblərini şərh edən “Novoe vremya” qəzətinin baş redaktoru, siyasi şərhçi Şakir Ağayev “Bakı-Xəbər”ə bildirdi ki, Prezidentin çıxışı böyük əks-səda yaradıb: “Biz də o debata baxdıq və bir azərbaycanlı kimi Prezidentin üstünlüyünün şahidi olduq. Nəinki şahidi olduq, həm də böyük qürur hissi keçirdik ki, Azərbaycan Prezidenti işğalçı Ermənistanın Baş nazirini çıxılmaz vəziyyətdə qoydu. Bütün debat boyu İlham Əliyevin istər tarixi, istərsə də siyasi nöqteyi-nəzərdən daha hazırlıqlı, daha üstün olduğu bir daha görsəndi. Prezident Qarabağ tarixi ilə bağlı da çox mühüm tarixi faktlar səsləndirdi. Hətta Qafqaz bürosunun qərarından da danışdı və o, Paşinyanın Qafqaz bürosunun qərarından da xəbərsiz olduğunu sübut etdi. Qafqaz bürosunun qərarı 1921, 1923-cü illərdə verilib, iki qərar olub. İlham Əliyev tarixi faktlarla bunu da sübut etdi. O, orada Xankəndi ilə bağlı danışdı və xüsusi vurğuladı ki, onun adı tarixən Xankəndi olub. Bilirsiniz ki, xan sözü də, kənd sözü də bizə məxsusdur, türk-Azərbaycan sözüdür. Prezident qeyd etdi ki, ermənilər bura köçürüldükdən sonra Sovet dövründə Xankəndinə Stepan Şaumyanın adı verilib. Paşinyanın hətta keçmiş kənd rayonu Şaumyanın Qarabağa aid olduğunu deməsi açıq göstərdi ki, onun nə Qarabağdan, nə də tarixdən xəbəri var. İlham Əliyev yerindəcə onun dediklərinin səhv olduğunu qeyd etdi və Paşinyanın Qarabağa aidiyyəti olmayan bir rayonun Qarabağa aid edilməsinin də yalan olduğunu qeyd etdi, Paşinyanın üzr istəməsinə nail oldu. Başqa bu kimi məsələləri Prezident İlham Əliyev tarixi faktlarla sübut etdi ki, Paşinyan həm tarix, həm siyasət sahəsində Azərbaycan liderindən zəifdir. Təbii ki, bütün bunlar Azərbaycan liderinin Paşinyandan daha yüksəkdə, üstün olduğunu bir daha sübut edən amillərdir. Bunu təkcə biz görmədik, Avropanın mərkəzində Almaniyada (Almaniya həm də Avroittifaqın mərkəzidir - Ş.A.) keçirilən Münhen Təhlkəsizlik Konfransında iştirak edən, bu konfransı izləyən hər kəs gördü. Münhen Təhlükəsizlik Konfransında Prezident İlham Əliyevin çıxışı, Qarabağın tarixi Azərbaycan torpağı olduğunu tarixi faktlarla sübut etməsi, təbii ki, bir daha bütün dünyaya sübut idi ki, haqq-ədalət Azərbaycanın tərəfindədir, bu torpaqlar Azərbaycanın torpağıdır. Bu məsələdən sonra Avropa da, dünya da artıq Qarabağ məsələsində Azərbaycanın haqlı mövqeyini daha güclü şəkildə müdafiə etməlidir. Prezident İlham Əliyevin Paşinyandan üstünlüyü nəinki Ermənistan, hətta dünya mətbuatında qeyd edilir. Prezident İlham Əliyevin erməni mediası tərəfindən şahinə bənzədilməsi onun siyasi lider kimi Ermənistan Baş nazirindən çox üstün olduğunu bir daha sübut etdi. Ermənilər özləri də bu üstünlüyü çox aydın hiss etdilər”.
İradə SARIYEVA
