Fevralın 15-də Münhen Təhlükəsizlik Konfransı çərçivəsində Azərbaycan Respublikasının Prezidenti İlham Əliyevin və Ermənistan Respublikasının Baş naziri Nikol Paşinyanın iştirakı ilə Ermənistan-Azərbaycan Dağlıq Qarabağ münaqişəsi ilə bağlı panel müzakirələr keçirilib.
Debat, Azərbaycan Prezidenti İ. Əliyevin Ermənistan baş naziri N.Paşinyan üzərində arqument üstünlüyü ilə keçdi. Çünki bu söhbət Qarabağ münaqişəsindən gedirdi və burada da bütün haqq-ədalət, bütün məntiq Azərbaycanın tərəfindədir. Erməni rəhbər debata artıq uduzmuş girmişdi. Məhz bunun nəticəsi idi ki, müzakirə Prezident İlham Əliyevin Ermənistanın hökumət başçısına tarixi həqiqətlər və beynəlxalq hüquqla bağlı verdiyi dərs kimi xarakterizə olundu. Görün Paşinyan nə qədər arqumentə və məntiqə möhtac həddinə gəlib ki, dünyanın bildiyi, canlı faktlar sübutlarla təsdiqini tapmış, 650 nəfərdən çox qətli, yüzlərlə yaralı, yüzlərlə əsiri olan, hələ də şahidləri sağ olan və yaraları qurumamış tarixin Xocalı faciəsini inkar etməyə çalışdı. İstinadı isə hansısa qəzetə verilib və ya verilməməsi şübhə doğuran bir müsahibə idi. Debat zamanı N.Paşinyanın daha çox heç bir əsası olmayan, real faktlara söykənməyən arqumentlər gətirməyə cəhdi isə gülüş doğurub. Məhz bunun nəticəsidir ki, erməni jurnalistlər debatda onları biabır etdiklərinə görə Paşinyanın ünvanına ciddi ittihamlar səsləndiriblər. Ermənistan-Azərbaycan münaqişəsinə dair panel-diskussiyada Prezident İlham Əliyevin qarşısında gülünc vəziyyətə düşməsini heç cür həzm edə bilməyən erməni yazıçısı, bunu Paşinyanın kütlüyü ilə izah edib. Erməni yazıçısı vurğulayıb ki, məhz N.Paşinyanın tarixdən xəbərsiz olması, siyasi diskussiyaya lazımınca hazırlaşa bilməməsi onu, onun timsalında isə bütün Ermənistanı gülünc vəziyyətdə qoyub.
Paşinyanın Azərbaycan Prezidentinə bütün parametrlərdə uduzduğunu bildirən A.Turcotte, Ermənistan baş naziri haqqında "ayıb olsun" ifadəsini işlədib. Doğrudan da Paşinyana ayıb olsun ki, o, çıxılmaz vəziyyətdə qaldığı üçün, ağ yalanlar danışmağa məcbur qaldı. Ermənistanın baş naziri Şaumyan rayonunun Dağlıq Qarabağa aid olduğunu bildirdi. Onun düşdüyü acınacaqlı durumdan və üzr istəməsindən istifadə edən Prezidentimiz bolşevik Stepan Şaumyanın adının tarixi Azərbaycan şəhəri olan Xankəndinə verilməsini, müstəqil bir dövlətə rəhbərlik edən Xanın kəndinin bolşevik Stepanın şəhərinə çevrilməsini vurğuladı. Bu debatda, sadəcə, Ermənistanın baş naziri deyil, bütövlükdə erməni təbliğat maşını dünyanın gözü qarşısında Azərbaycan Prezidentinə məğlub olduğunu göstərdi. Ermənistan baş naziri həm də debatın aparıldığı dilin mənimsənilməsi və fikirlərin sərbəst ifadə olunmasında İlham Əliyevə uduzdu. Məhz bunun nəticəsi idi ki, Azərbaycan Prezidenti İlham Əliyev Münxendə Ermənistanın baş naziri Nikol Paşinyanı növbəti dəfə susdurdu, işğalçı ölkə rəhbərini geniş auditoriya qarşısında çıxılmaz vəziyyətə saldı. Debat və ondan sonra çəkilən fotolardan da görünür ki, Paşinyan düşdüyü vəziyyətdən çıxış yolunu başını aşağı salıb, utancaq görkəm almaqda görüb. Eşq olsun cənab Prezidentə!
Məhəmmədəli QƏRİBLİ
