Aydın Mirzəzadə: “İmzalanan saziş Azərbaycan üçün böyük siyasi əhəmiyyət daşıyır”
Bir neçə gündür bütün dünya neft sənayesinin və mətbuatının diqqəti Bakıya yönəlib. Belə ki, Heydər Əliyev Mərkəzində "Azəri-Çıraq-Günəşli" (AÇG) yataqlar blokunun işlənməsi üzrə Hasilatın Pay Bölgüsünün düzəliş edilmiş və yenidən tərtib olunmuş sazişi (PSA) imzalanıb. Başqa sözlə, "Əsrin Müqaviləsi"nin müddəti 2050-ci ilədək uzadıldı. Bu səbəbdən də mərasimə marağın olduqca yüksək olması anlaşılandır.
Prezident İlham Əliyevin də qeyd etdiyi kimi, Azərbaycan üçün əlamətdar və tarixi bir hadisədir. Ölkə başçısı deyib ki, saziş Azərbaycan üçün daha əlverişli şərtlərlə imzalanır: "Kontrakt imzalanandan sonra ölkəmizə xarici investorlar tərəfindən 3,6 milyard dollar bonus ödəniləcək".
İmzalanan yeni sazişin şərtlərindən görünür ki, Azərbaycan həmin sazişdə təmsil olunan dövlətlərlə bundan sonrakı 32 il ərzində də yaxından əməkdaşlıq edəcək. Bunun Azərbaycan üçün nə kimi siyasi əhəmiyyəti var?
Millət vəkili Aydın Mirzəzadənin sözlərinə görə, “Azəri-Çıraq-Günəşli” yataqlar blokunun işlənməsi üzrə Hasilatın Pay Bölgüsünün düzəliş edilmiş və yenidən tərtib olunmuş sazişinin imzalanması Azərbaycan tarixində növbəti böyük bir hadisədir: “Bu hadisənin əhəmiyyətini bu gün və gələcəkdə dəfələrlə hiss edəcəyik. Sazişin imzalanması Azərbaycanın beynəlxalq aləmdə artan siyasi nüfuzu deməkdir. Neft ehtiyatları olan ölkələr çoxdur. Lakin ölkə daxilində qeyri-stabillik, ölkənin beynəlxalq aləmdə aşağı nüfuza sahib olması həmin ölkələrlə əlverişli kontraktların bağlanmasına imkan vermir.
Azərbaycan müstəqil olduğu illərdə özünü ciddi və yaxşı bir tərəfdaş kimi göstərə bildi. Əvvəlki kontraktlar Azərbaycanın dövlət kimi formalaşmasında, iqtisadiyyatın güclənməsində, əhalinin sosial vəziyyətinin yaxşılaşmasında böyük rol oynayıb. Həmçinin neft kontraktları üzrə müttəfiqlərimiz də yaxşı gəlir əldə edib.
Sazişin 2050-ci ilə qədər uzadılması ilk növbədə Azərbaycanın böyük neft-qaz ehtiyatlarına sahib olduğunu, ikinci tərəfdən isə Azərbaycanla əməkdaşlıq etməyi arzulayan xarici ölkə və şirkətlərin çoxluğunu göstərir.Azərbaycan bu gün beynəlxalq aləmdə stabilliyin qorunub saxlanmasında böyük rol oynayır. Hesab edirəm ki, neftdən gələn gəlir yeni iş yerlərinin yaradılmasına, qeyri-neft sektorunun inkişafına, dövlətçiliyin möhkəmlənməsinə sərf ediləcək. Bu baxımdan da imzalanan saziş Azərbaycan üçün böyük siyasi əhəmiyyət daşıyır”.
Məhəmmədəli QƏRİBLİ
