Sentyabrın 7-də Azərbaycan müdafiə nazirinin birinci müavini - Silahlı Qüvvələrin Baş Qərargah rəisi general-polkovnik Nəcməddin Sadıkov Rusiya Federasiyası müdafiə nazirinin birinci müavini - Silahlı Qüvvələrin Baş Qərargah rəisi, ordu generalı Valeri Gerasimovun rəhbərlik etdiyi nümayəndə heyətilə görüşüb.
“Trend” Müdafiə Nazirliyinə istinadən məlumat verir ki, qonaqları salamlayan general-polkovnik N.Sadıkov iki ölkə arasında əməkdaşlığın dostluq münasibətləri və qarşılıqlı inam üzərində qurulduğunu, bu əlaqələrin daim inkişaf etdiyini və son illərdə strateji tərəfdaşlıq səviyyəsinədək yüksəldiyini qeyd edib.
Bölgədəki hərbi-siyasi vəziyyətə toxunan general-polkovnik N.Sadıkov Ermənistan-Azərbaycan, Dağlıq Qarabağ münaqişəsinin regional sabitliyə əsas təhlükə yaratdığını və onun beynəlxalq hüquq normaları çərçivəsində həllinə nail olunmasının vacibliyini vurğulayıb.
Ordu generalı V.Gerasimov da əlaqələrimizin tarixi köklərə əsaslandığını, Rusiyanın Azərbaycanın vacib strateji tərəfdaşı olduğunu qeyd edərək, yüksək hərbi nümayəndələrin qarşılıqlı görüşlərinin təşkili və keçirilməsinin ikitərəfli münasibətlərin, eləcə də hərbi və hərbi-texniki sahədə əməkdaşlığın genişlənməsi baxımından zəruriliyini bir daha qeyd edib.
Sonra tərəflər hərbi sahədə əməkdaşlığın mövcud vəziyyəti, hərbi-texniki və hərbi təhsil sahələrində əlaqələrin inkişaf perspektivlərini müzakirə edib və qarşılıqlı maraq doğuran digər məsələlər ətrafında fikir mübadiləsi aparıblar.
Sonda ordu generalı V.Gerasimov NATO-nun Hərbi Komitəsinin sədri general Petr Pavel ilə ikitərəfli görüşün Bakıda təşkil edilməsi və yüksək qonaqpərvərliyə görə Azərbaycan dövlətinin rəhbərliyinə minnətdarlığını bildirib.
Bakıda keçirilən Gerasimov-Pavel görüşü barədə öncədən maraqlı şərhlər verilib
"Bakıda keçiriləcək Gerasimov-Pavel görüşü oyun qaydalarının razılaşdırılması, gündəmdə olan məsələlərin müzakirəsi, bir-birinin mövqelərinin anlaşılması baxımından strateji məqsəd daşıyır". Bu sözləri APA-nın Moskva müxbirinə müsahibəsində rusiyalı hərbi ekspert, “Komsomolskaya pravda” qəzetinin şərhçisi, istefada olan polkovnik Viktor Baranets dünən Bakıda keçirilən Rusiya Silahlı Qüvvələri Baş Qərargah rəisi və NATO hərbi komitəsinin rəhbərinin görüşünü şərh edərkən deyib.
"Bildiyiniz kimi, son zamanlar Rusiya-ABŞ, Rusiya-NATO münasibətləri dondurulmuş vəziyyətdədir. Bura təkcə diplomatik və siyasi deyil, həm də hərbi münasibətlər daxildir. Bu münasibətlər faktiki sovetlər dövründəkindən, soyuq müharibə vaxtındakından da pis vəziyyətdədir. Gerasimov və Pavelin Bakı görüşü bu baxımdan strateji məqsəd daşıyır", - deyə V.Baranets vurğulayıb.
Bakı hərbi sahədə Rusiya-ABŞ və Rusiya-NATO münasibətlərinin yaxşılaşdırılması paytaxtına çevrilir
Onun sözlərinə görə, Bakıda Rusiya-NATO görüşündə çoxsaylı məsələlər müzakirə olunacaq: "Bunlar, sözsüz ki, Rusiya-NATO münasibətləri, Şərqi Avropada NATO-nun hava hücumundan müdafiə sistemi yerləşdirməsi, Şimali Koreyanın nüvə problemi, ABŞ-ın Cənubi Koreyada hava hücumundan müdafiə sistemi yerləşdirməsi, Suriya münaqişəsi, Ukrayna böhranı, Rusiya-NATO, hərbi sahədə Rusiya-ABŞ əməkdaşlığı məsələləridir. Gündəmdə olan məsələlər həddən artıq çoxdur".
V.Baranets son vaxtlar Rusiya və ABŞ, Rusiya və NATO generallarının görüşlərinin məhz Bakıda keçirilməsi məsələsinə də toxunub. O bu ilin əvvəlində Bakıda Rusiya və ABŞ baş qərargah rəislərinin görüşünün keçirildiyini xatırladıb: "Belə görüşlərin Azərbaycan paytaxtında keçilməsi belə qənaətə gəlməyə əsas verir ki, Bakı hərbi sahədə Rusiya-ABŞ və Rusiya-NATO münasibətlərinin yaxşılaşdırılması paytaxtına çevrilir. Bu birinci məqamdır. İkinci məqam isə Bakının dünya miqyasında strateji mövqedə yerləşməsidir. Bu regionda həm Rusiyanın, həm də ABŞ-ın strateji maraqları var. Təbii olaraq, bu strateji regionda - nəzərə alsaq ki, Suriya Bakıya çox da uzaq deyil - Rusiya və ABŞ Yaxın Şərqdəki oyunun qaydalarını müəyyən etməlidir. Ona görə ki, biz dəfələrlə Suriyada ABŞ-ın rəhbərlik etdiyi koalisiyanın və Suriya hökumət qüvvələrini dəstəkləyən Rusiya Hərbi Kosmik Qüvvələrinin necə fəaliyyət göstərdiyini demişik. Biz dəfələrlə ABŞ-ın rəhbərlik etdiyi koalisiyanın terrorçulara qarşı Suriyada vahid cəbhədə mübarizə aparmasını təklif etmişik. Lakin heç bir cavab almamışıq. İndi isə Suriyada terrora qarşı mübarizədə mühüm mərhələ yaşanır. İŞİD-in ikinci paytaxtı hesab edilən Deyr-əz-Zor bölgəsində həlledici döyüşlər gedir. Suriya ordusu Rusiyanın köməyi ilə artıq şəhərin mühasirəsini yarıb. Bildiyiniz kimi, ABŞ-ın rəhbərlik etdiyi koalisiya İraqda İŞİD-a qarşı mübarizə aparır. Ordan qaçan terrorçular isə Suriyaya axın edirlər. ABŞ-ın bu fəaliyyəti İraqdakı terrorçuların Suriyada cəmləşməsinə səbəb olur. Ona görə də bu məsələdə razılığa gəlmək lazımdır. Elə etmək lazımdır ki, terrorçulara qarşı mübarizədə Suriya ordusuna, Rusiyaya və ABŞ-ın rəhbərlik etdiyi koalisiyaya ziyan gəlməsin.
Bakı görüşü Rusiya və ABŞ-ın Yaxın Şərq regionunda gələcək fəaliyyətini müəyyən edəcək
Üçüncü vacib məqam isə Bakı görüşünun Rusiya və ABŞ-ın Yaxın Şərq regionunda bundan sonrakı fəaliyyətini müəyyən etməsidir. Bu görüşdə təkcə söhbət Suriyadan getməyəcək. Müzakirə olunacaq məsələlərdən biri də İsrailin Suriyaya zərbə endirməsidir. İsrail faktorunu Suriya münaqişəsində nəzərə almamaq qeyri-mümkündür. İsrailin ABŞ-ın diktəsi ilə hərəkət etdiyini bilirik. Anlamaq istəyirik ki, İsrail Suriyaya zərbə endirməklə nəyə nail olmaq istəyir? Çünki İsrailin Suriya münaqişəsinə daxil olmağı mövcud vəziyyəti daha da gərginləşdirəcək. Suriya ordusu İsrailə cavab verməyə məcbur olacaq. İsrail Suriyanı bu yolla təxribata çəkir. İstəyir ki, Suriya ona layiqli cavab versin. Bu məsələ Gerasimov-Pavel arasında keçiriləcək Bakı görüşünün əsas müzakirə mövzularından biridir".
Generallar Dağlıq Qarabağ münaqişəsini də müzakirə edəcək
Rusiyalı hərbi ekspert Ermənistan-Azərbaycan, Dağlıq Qarabağ münaqişəsinin Rusiya və NATO generallarının görüşündə müzakirə olunub-olunmayacağına da münasibət bildirib: "Hesab edirəm ki, görüş Bakıda keçirildiyindən, Dağlıq Qarabağ münaqişəsinin nizamlanması məsələsi də qaldırılacaq".
V.Baranets rəsmi İrəvanın Rusiya ilə Qərb arasında ikili oyun oynamasını da şərh edib: "Rusiyanın Ermənistanı hərbi və təhlükəsizlik sahəsində müdafiə etməsinə baxmayaraq, son vaxtlar erməni generallar və siyasətçilər Ağ Evdən və Pentaqondan mədəd umur, silahlar almaq üçün pul istəyirlər. Ermənistan ikitərəfli oyun oynayır, iki stulda oturmağa cəhd edir".
NATO Hərbi Komitəsinin rəhbəri və Rusiya Baş Qərargah rəisi Bakıda nələri müzakirə etdi…
NATO Hərbi Komitəsinin rəhbəri Petr Pavel və Rusiya Silahlı Qüvvələrinin Baş Qərargah rəisi Valeri Gerasimov arasında dünən Bakıda görüş keçirilib.
APA-nın xəbərinə görə, Rusiya Müdafiə Nazirliyinin məlumatında bildirilir ki, görüşdə Avropa və Yaxın Şərqdə təhlükəsizlik məsələləri müzakirə olunub, tərəflər kontaktları davam etdirməyə qərar veriblər.
"Valeri Gerasimov və Petr Pavel Avropa və Yaxın Şərqdə beynəlxalq təhlükəsizlik sahəsində vəziyyətlə bağlı fikir mübadiləsi aparıblar. Görüşün gedişində tərəflər kontaktların davam etdirilməsinə dair razılığa da gəliblər", - deyə məlumatda bildirilir.
NATO nümayəndəsi isə TASS-a bildirib ki, Rusiya Silahlı Qüvvələrinin Baş Qərargah rəisi Valeri Qerasimov və NATO-nun Hərbi komitəsinin sədri Pyotr Pavelin Bakıdakı görüşü Rusiyanın Şimali Atlantika alyansı ilə hərbi əlaqələrinin saxlamasında qarşılıqlı marağın olduğunu göstərdi: "Bu şəxsi görüş NATO-nun şəffaflıq və Rusiyanın ali rəhbərliyi ilə siyasi səviyyədə davam edən dialoq siyasətinə uyğun olaraq hərbi kommunikasiya xətlərini saxlamağa qarşılıqlı marağı aydın nümayiş etdirdi".
Onun sözlərinə görə, general Pavel və general Gerasimov gələcəkdə hərbi kommunikasiya xətlərinin istifadəsini davam etdirmək barədə razılığa gəliblər.
Baki-xeber.com
