Azər Həsrət: “İkinci versiya isə bundan ibarətdir ki, həmin nəşrlərin arxasında duran güclər bu cür metodlarla Azərbaycandan öz istədikləri güzəştləri qoparmağa çalışır”
Son günlər bəzi xarici media orqanları yenidən öz amplualarına dönərək, Azərbaycan barədə həqiqətə uyğun olmayan məlumatlar tirajlamaqla məşğuldurlar. Biz belə çirkin kampaniyaların dəfələrlə şahidi olmuşuq və bilirik ki, belə fəaliyyətin arxasında konkret niyyət durur.
Bəzi xarici nəşrlər bu dəfə bir az da “irəli” gedərək Azərbaycan Prezidenti və onun ailə üzvləri barədə böhtançı, qərəzli məlumatlar tirajlamağa üstünlük verirlər. Böyük Britaniya mətbuatında dərc olunan anti-Azərbaycan yazısı rəsmi Bakının da kəskin etirazına səbəb olub.
Azərbaycan Prezidentinin mətbuat katibi Azər Qasımov “The Guardian” qəzetinin 4 sentyabr tarixli sayında dərc edilən məqaləyə aydınlıq gətirib: “Adıçəkilən məqalədəki “məlumatlar” o qədər absurd xarakter daşıyır ki, sözün düzü, mən heç buna reaksiya vermək istəməzdim. Bildiyiniz kimi, dünyada Azərbaycana qarşı fəaliyyət göstərən müəyyən dairələr və onların havadarları, eləcə də erməni lobbisinin maliyyələşdirdiyi ayrı-ayrı kütləvi informasiya vasitələrinin nümayəndələri mütəmadi olaraq Azərbaycana qarşı ağıla sığmayan, iftira dolu, yalan məlumatlar yaymaqla məşğuldurlar. Özü də bu cür yazılar elə təqdim olunur ki, guya orada göstərilən faktlar dəlil-sübutlara və sənədlərə əsaslanır. Bu da, bir növ, məsələlərin mahiyyətinə dərindən bələd olmayan kütləvi oxucuya psixoloji təsir etmək məqsədi daşıyır”.
A.Qasımov hesab edir ki, bu cəhdlər nəticəsiz olacaq: “Bütün bu səylər boş və mənasız məşğuliyyətdən başqa bir şey deyil. Fikrimcə, özünü ciddi mətbu orqan hesab edən istənilən kütləvi informasiya vasitəsi bu cür mənasız məlumatlara əsaslanan yazılar dərc etməməlidir”.
Xarici mətbuatda dərc edilən və təkzib edilən bu tip böhtançı materialların arxasında hansı maraq dura bilər?
Media eksperti Azər Həsrət qəzetimizə bildirdi ki, Azərbaycan birinci dəfə deyil ki, belə halla rastlaşır: “Biz bunların iç üzünü zaman-zaman görmüşük. 2015-ci ildə Bakıda Birinci Avropa Oyunları keçirilərkən də məhz bu gün qara piarda iştirak edən media orqanlarından biri - “The Guardian” öz sifətini göstərdi. Bu qəzet gün ərzində Azərbaycana üç ayrı yazı həsr edirdi. Əlbəttə, buna sevinmək olardı. Lakin yazıların hər üçü, bir qayda olaraq, Azərbaycana qarşı açıq nifrət və qərəzlə dolu olurdu. Özü də hamısında eyni ifadələr, eyni ittihamlar yer alırdı. Görünür, yenə düyməyə basılıb. Yenə “azad və tərəfsiz media” orqanı Azərbaycanı, onun rəhbərliyini hədəfə alıb. Almağa da məcburdur. Çünki bu qəzet qlobal səviyyədə kampaniyaçı media orqanı kimi tanınır, qəbul edilir.
Kampaniyaçı media qurumu? Axı bizim bildiyimiz jurnalistika, media prinsipləri arasında kampaniyaçılıq adlı bir şey yoxdur. Necə olur ki, Böyük Britaniya kimi dünyaya elə media etikası dərsi keçən bir ölkənin bu qədər nüfuzlu qəzeti kampaniyaçılığa qədər enir? Məqsəd bəllidir. Krizis dövrünü yaşayan tanınmış çap media orqanlarını ayaqda saxlamaq üçün bu cür üsullardan istifadə edib vəsait əldə etmək istəyir. İkinci versiya isə bundan ibarətdir ki, həmin nəşrlərin arxasında duran güclər bu cür metodlarla Azərbaycandan öz istədikləri güzəştləri əldə etmək istəyir. Ancaq biz dəfələrlə bu cür böhtançı kampaniyadan üzüağ çıxmağı bacarmışıq”.
Məhəmmədəli QƏRİBLİ
