Əli Orucov: “Qərb-2017” strateji Belarus-Rusiya hərbi təlimləri rəsmi Moskvanın güc nümayiş etdirməsidir”
Məlum olduğu kimi, sentyabrın 14-də “Qərb-2017” strateji Belarus-Rusiya hərbi təlimləri başlayır. Rusiya və Belarus iki ildən bir silahlı qüvvələrin birgə strateji təlimini keçirir. Bu dəfə təlimlər 14 sentyabrda başlayacaq və bir həftə – 20 sentyabradək davam edəcək. Bu il 10.200 hərbçinin (7.200 Belarus, 3000 RF silahlı qüvvələrindən) iştirak edəcəyi təlimlərin böyük hissəsi Belarus ərazisində baş tutacaq. Təlimlərdə cəmi 680-ə qədər hərbi texnikanın iştirakı planlaşdırılır.
Belarusun müdafiə qurumunda qeyd edirlər ki, “təlimin başlıca məqsədi – Belarus və Rusiya ittifaq dövlətinin hərbi təhlükəsizliyinin təmin edilməsi üzrə imkanlarını, onların mümkün hərbi təcavüzün dəf edilməsi üçün hazırlığını yoxlamaq, həmçinin, hər iki ölkənin silahlı qüvvələrinin hərbi idarəçilik orqanlarının uyğunluğunu, birləşmələrinin və hərbi hissələrinin səhra və hava bacarıqlarını yüksəltməkdir”.
Belarusun müdafiə naziri Andrey Ravkov bu təlimləri iki ölkə silahlı qüvvələrinin birgə operativ hazırlığının ən böyük tədbiri adlandırır.
Bu arada Belarus KİV-i başqa rəqəmlər səsləndirir, o cümlədən söhbət hərbçilərin daha böyük miqdarından – 24 000 adam haqqında informasiyadan gedir. Bundan başqa, NATO-nun baş katibi Yens Stoltenberq də qeyd edib ki, “öncəki təlimlərin təcrübəsinə əsasən, güman edilir ki, rəsmi bəyan edildiyindən daha çox hərbçi təlimlərə cəlb ediləcək”.
Görünən odur ki, Rusiyanın keçirəcəyi təlimləri Qərb, xüsusən də Baltikyanı dövlətlər narahatlıqla izləyirlər. Bu arada NATO bildirir ki, Rusiya Qərb müşahidəçilərinə təlimləri izləməyə icazə verməyib. Gözlənir ki, təlimlərə 100 minlik kontingent qatılacaq. Bu, soyuq müharibənin başa çatmasından bəri ən irimiqyaslı hərbi manevrlər olmalıdır.
Bütün hallarda, Rusiyanın NATO müşahidəçilərinin təlimləri izləməsinə icazə verməməsini siyasilər necə dəyərləndirir?
Məsələyə münasibət bildirən AMİP Siyasi Şurasının üzvü Əli Orucovun sözlərinə görə, hazırkı şəraitdə Rusiyanın belə addım atacağı gözlənilən idi: “Məsələ ondadır ki, Rusiya-Qərb münasibətləri hər keçən gün daha da soyuqlaşır və bu özünü müxtəlif sahələrdə göstərir. Rusiyanın Ukraynada separatçılara açıq dəstək verməsi və birbaşa olaraq Krımı ilhaq etməsi Qərblə, xüsusən də bu ölkənin ABŞ-la olan münasibətlərini pisləşdirib. ABŞ-ın sanksiyaları daha da genişləndirməsi, Rusiya diplomatlarının ölkədən çıxarılması münasibətlərin pisləşməsinin göstəricisidir. Bütün bunlarla yanaşı, Rusiyanın Suriyada Bəşər Əsədə hərtərəfli dəstək verməsi geosiyasi mübarizənin daha kəskin müstəviyə keçməsindən xəbər verir. Bütün hallarda, “Qərb-2017” strateji Belarus-Rusiya hərbi təlimləri rəsmi Moskvanın güc nümayiş etdirməsidir. Bir növ, NATO-nun bundan əvvəl keçirdiyi təlimlərə cavabdır. Rusiya bildirmək istəyir ki, proseslər belə davam edərsə, o zaman istənilən halda güc nümayiş etdirməkdən çəkinməyəcək. Qərb müşahidəçilərinin təlimləri izləməyə buraxılmaması münasibətlərin daha gərgin olmasından xəbər verir. Ancaq Rusiya nə qədər təlim keçirsə də, iqtisadi baxımdan geriləyir və bu sahədə Qərblə rəqabət aparmaq imkanında deyil”.
Vidadi ORDAHALLI
