Tağı Qəmbərov: “Həmin təşkilatla əməkdaşlıq məsələsinə yenidən baxılmalıdır”
Son illər Azərbaycanla münasibətlərində problemlər yaranan və vaxtaşırı Bakıya ünvanlı tələblərlə çıxış edən “Amnesty İnternational” beynəlxalq hüquq müdafiə təşkilatı ölkəmizə qarşı qanunsuzluğa yol verib. Belə ki, qurumun mətbu orqanı olan “Amnesty Press”in əməkdaşı qanunsuz olaraq Azərbaycanın işğal altındakı ərazilərinə gəlib. Erməni mətbuatının verdiyi məlumata görə, təmas xəttindəki Talış kəndinə qədər gəlib çıxan jurnalist geri dönəndən sonra xüsusi reportaj hazırlayıb.
İzabella Rozenqrin adlı jurnalist işğal zonasındakı mülki əhali və separatçı rejimin təmsilçiləri ilə görüşdüyünü yazıb. Həmçinin o, Azərbaycan əsgərinin atəşindən qorunmaq üçün tikilən 3 metrlik beton divardan da bəhs edib.
Taliş kəndinin yaşlı sakini Vilem Petrosyan jurnalistə 2016-cı ilin aprel döyüşləri haqda təəssüratlarını bölüşüb.
Diqqətçəkən məqam “Amnesty İnternational”a yaxın jurnalistin işğal zonasına icazəsiz gəlməsidir. Normalda həmin jurnalist Azərbaycandan icazə alandan sonra həmin ərazilərə səfər etməli idi. Artıq rəsmi Bakı həmin səfərlə bağlı öz etirazını bildirib.
XİN-in mətbuat katibi Hikmət Hacıyev bildirib ki, “Amnesty İnternational”ın dərgisində verilmiş yazı Azərbaycanın işğal olunmuş ərazilərində yaradılmış qondarma rejimin təşviqinə xidmət edir, birtərəfli xarakter daşıyır və obyektiv jurnalist prinsiplərindən kənardır: “Elementar jurnalist etikası onu tələb edir ki, münaqişə məsələləri ilə əlaqədar olan materiallarda hər iki tərəfin mövqeyi işıqlandırılsın. Gördüyünüz kimi, bu yazıda yalnız birtərəfli qaydada Ermənistan tərəfinin təbliğatı aparılır”.
H.Hacıyev qeyd edib ki, özlüyündə bu səfər də qanunsuz xarakter daşıyır: “Azərbaycan ərazisində xarici KİV nümayəndələrinin akkreditasiyasını nəzərdə tutan qaydaların, sərhəd haqqında qanunun və digər müvafiq sənədlərin pozulması ilə müşayiət olunur. Ümumiyyətlə, “Amnesty İnternational” təşkilatının Azərbaycana münasibəti, qərəzli mövqeyi hər kəsə bəllidir. İstisna deyil ki, daha dəqiq araşdırma aparılacaq və bu şəxsin adı “arzuolunmaz şəxslər”in siyahısına daxil ediləcək".
Edilən qanunsuz səfəri qəzetimizə şərh edən hüquqşünas Tağı Qəmbərovun sözlərinə görə, dünyada insan haqlarının qorunmasından ağız dolusu danışan “Amnesty İnternational”ın bu addımı olduqca zərərlidir: “Bu beynəlxalq hüquq təşkilatı Azərbaycanla bağlı ən incə detallara belə bələddir. Çünki ən xırda bir detala görə biz onların etiraz bəyanatları ilə rastlaşmalı oluruq. Onlar Dağlıq Qarabağ münaqişəsinə də gözəl bələddirlər. Bilirlər ki, Dağlıq Qarabağ beynəlxalq hüquq tərəfindən Azərbaycanın ərazisi kimi qəbul edilir, hazırda işğal altında olduğu səbəbindən, həmin bölgəyə edilən bütün səfərlərlə bağlı ölkəmizin razılığı olmalıdır. Bəllidir ki, bu prosedura əməl etmək istəməyənlərə qarşı müxtəlif tədbirlər görülür. Onların adı “qara siyahı”ya salınır, sonra barələrində cinayət işi qaldırılaraq beynəlxalq axtarışa verilirlər. Artıq bir necə tanınmış şəxs belə hərəkətinə görə Azərbaycandan üzrxahlıq edib. Bir neçə böyük ölkənin vətəndaşlığını daşıyan bloger Lapşin eyni əməl törətdiyinə görə hələ də həbsdədir. Bütün bunlar onu söyləməyə əsas verir ki, beynəlxalq hüquq təşkilatı bilə-bilə bu əməli törədib. Bu səbəbdən də Azərbaycan həmin jurnalistin adını “qara siyahı”ya salmalıdır. Həmçinin, həmin təşkilatla əməkdaşlıq məsələsinə yenidən baxılmalıdır. Jurnalist qanunsuz səfərlə yanaşı, həm də təmsil olunduğu peşənin kriteriyalarına hörmətsizlik edib, birtərəfli informasiya yayıb, qarşı tərəf kimi bizim mövqeyimizi dinləməyib”.
Məhəmmədəli QƏRİBLİ
