Vəfa Heydərli: “Belə bir etapda Azərbaycanın öz strateji müttəfiqlərilə Dağlıq Qarabağ mövzusunda müzakirə aparması lazımdır”
Azərbaycan, Türkiyə və Gürcüstan xarici işlər nazirləri sentyabrın 7-də Bakıda görüş keçirəcək. Diplomatik mənbəyə istinadən verilən məlumata görə, görüş zamanı tərəflər siyasi, iqtisadi, enerji, nəqliyyat və humanitar sahələrdə əməkdaşlıq, eləcə də regional təhlükəsizlik məsələlərini müzakirə edəcək. Bundan başqa, Elmar Məmmədyarov, Mövlud Çavuşoğlu və Mixeil Canelidze üçtərəfli əməkdaşlığın digər sahələrini nəzərdən keçirəcək.
Göründüyü kimi, bu formatda keçiriləcək görüşdə təhlükəsizliklə bağlı müzakirələr prioritet olacaq. Bu müzakirələrdə Dağlıq Qarabağ məsələsinə nə kimi önəm verilməlidir?
Politoloq Vəfa Heydərli qəzetimizə bildirdi ki, Dağlıq Qarabağ problemi bütün region üçün təhlükə yaradır: “ Üç ölkə strateji tərəfdaşlıq münasibətlərinə malikdir. Bir çox iri layihələrdə birgə təmsil olunuruq. Bu proses daha sürətlə davam edir. Demək olar ki, Azərbaycanın təşəbbüsü ilə reallaşan bütün layihələrdə digər iki ölkə tranzit rolunu oynayır. Bir sözlə, bizim münasibətlərimiz çoxşaxəli olduğu üçün, tez-tez müzakirələrə ehtiyac duyulur. Bunu rəsmilərin reallaşan qarşılıqlı səfərlərinin dinamikasından da sezmək mümkündür. Təbii ki, regionda təmsil olunan ölkələri yalnız iqtisadi maraqların təmin olunması düşündürmür. Təhlükəsizlik hər bir ölkə üçün önəmlidir. Dağlıq Qarabağ münaqişəsi artıq qloballaşıb. Yəni onun həlli yalnız Azərbaycan və Ermənistandan asılı deyil. Bu səbəbdən də münaqişə bütün region üçün təhlükə törədir. Ermənistan təkidlə Türkiyə ilə sərhədlərinin açılmasını tələb edir. Ancaq bunun reallaşması üçün qoyulan şərt də Qarabağ problemilə bağlıdır. Bu baxımdan da hər üç ölkənin XİN rəhbəri səviyyəsində keçiriləcək müzakirələrdə Dağlıq Qarabağ probleminin nizamlanması əsas prioritet olacaq. Bilirsiniz ki, Gürcüstanın da daxilində oxşar münaqişə ocaqları var. Keçirilən görüşlərdə o istiqamətdə də fikir mübadiləsi aparılır. Ancaq Dağlıq Qarabağ münaqişəsinin hər üç ölkənin təhlükəsizliyi üçün təsiri bir qədər başqadır. Çünki Dağlıq Qarabağ münaqişəsinin həlli region üçün tamamilə başqa bir mənzərə yarada bilər. Dağlıq Qarabağ münaqişəsilə bağlı Türkiyə və Gürcüstanın mövqeyi bizi tam qane edir. Hər iki ölkə Azərbaycanın ərazi bütövlüyünü dəstəkləyir. Türkiyənin mövqeyi isə bizə daha yaxındır. Son vaxtlar bu prosesdə aktivlik nəzərə çarpır. Beynəlxalq güclər ciddi səy göstərir. Belə bir etapda Azərbaycanın öz strateji müttəfiqlərilə Dağlıq Qarabağ mövzusunda müzakirə aparması lazımdır”.
Məhəmmədəli QƏRİBLİ
