Akif Nağı: “Belə çıxır ki, Ermənistan hər iki qütblə dostlaşır”
Ermənistan prezidenti Serj Sarkisyanın ümumerməni gənclər düşərgəsinin iştirakçıları ilə görüşü zamanı verdiyi açıqlama onun özünü pis vəziyyətə salıb. Sarkisyan payızda Ermənistanın Avropa İttifaqı ilə hərtərəfli və genişləndirilmiş tərəfdaşlıq barədə saziş imzalayacağından danışıb: “Payızda imzalayacağıq. Onu imzalamamaq üçün səbəbimiz yoxdur”.
Sarkisyan onu da qeyd edib ki, bəzi xarici KİV-lər 2013-cü ildə Ermənistanın Avrasiya İqtisadi Birliyinə (AİB) daxil olması barədə qərarın “bir gecədə qəbul edildiyini bildirirlər, bu isə əsassız və sadəcə gülməlidir”. Onun sözlərinə görə, 2013-cü ildə Ermənistan həm AİB, həm də Aİ ilə danışıqlar aparırdı: “Əvvəlcə hər iki birlik bildirirdi ki, biri digərinə mane olmur. Lakin Aİ bildirəndə ki, mane olur, bizə nə etmək qalırdı ki?” Göründüyü kimi, Sarkisyanın daha bir ziddiyyətli fikri üzə çıxır. Deyir sentyabrda Aİ ilə saziş imzalayacağıq, onu da deyib ki, 2013-də həm Avrasiya Birliyi, həm də Aİ ilə danışıq apardıq, Aİ bizə dedi ki, eyni vaxtda ikisinə üzv olmaq olmaz və biz Avrasiya Birliyini seçdik.
Faktiki olaraq belə bir mənzərə yaranır ki, Ermənistan bir əlində iki qarpız tutmaqda israrlıdır. Yəni Avrasiya Birliyini tərk etmədən Avropa İttifaqı ilə saziş imzalayır.
Hər iki quruma üz olmaq nizamnamə və prosedur baxımından mümkündürmü?
Qarabağ Azadlıq Təşkilatının sədri Akif Nağı qəzetimizə açıqlamasında bildirdi ki, Ermənistan bu addımı düşünərək atır: “Təbii ki, Avrasiya Birliyinə üzv olarkən Sarkisyan xalqı sakitləşdirmək üçün yalan danışıb. Çünki hazırda görünür ki, hər iki təşkilatda təmsil olunmaq prosedur baxımından problem yaratmır. Belə olsaydı, Avropa İttifaqı İrəvan qarşısında Avrasiya Birliyindən çıxmaqla bağlı şərt qoyardı. Yoxdursa, deməli, üzvlük mümkündür. Ancaq bu ona görə çox gülməli görünür ki, ölkələr birtərəfli olaraq siyasi oriyentasiyasını müəyyən edir. Ya Qərbin yanında olur, ya da Rusiyanın. Nəzəri cəhətdən hər ikisinin yedəyində olmaq mümkün deyil. Ermənistan bu addımını Rusiya ilə razılaşdırıb. Yoxsa, belə ciddi qərarı təkbaşına verə bilməzdi. Rusiya bu üsulla Ermənistanı saxlamaq yükündən azad olmaq istəyir ki, Avropa kisəsini ona doğru açsın. Maraqlıdır, Qərb bunu niyə nəzərə almır? Rusiyanın forpostu olan ölkəyə belə qucaq açırsa, bunun ziyanı Azərbaycanadır. Belə çıxır ki, Ermənistan hər iki qütblə dostlaşır. Ona görə də biz xarici siyasət kursumuzda müəyyən korrektələr aparmalıyıq”.
Məhəmmədəli QƏRİBLİ
