Aydın Mirzəzadə: “AŞPA-nın Monitorinq Komitəsi hazırlayacağı hesabatda bu məsələyə ciddi yanaşmalıdır”
Xəbər verildiyi kimi, Avropa Şurası Parlament Assambleyası (AŞPA) Monitorinq Komitəsinin Azərbaycan üzrə həmməruzəçiləri Stefan Şennak və Sezar Florin Preda sentyabr ayında Bakıya səfər edəcək. Bu barədə AŞPA Monitorinq Komitəsinin Azərbaycan üzrə həmməruzəçisi Stefan Şennak öz "Twitter" səhifəsində yazıb.
Qeyd edək ki, AŞPA Monitorinq Komitəsinin həmməruzəçiləri Azərbaycan üzrə növbəti hesabatı hazırlayırlar.
S.Şennak bildirib ki, hesabatın ilkin versiyası cari ilin oktyabrında Strasburqda AŞPA-nın sessiyası çərçivəsində təqdim olunacaq və müzakirəyə çıxarılacaq.
Məlumat üçün qeyd edək ki, həmməruzəçilər sonuncu dəfə Bakıda iyun ayında olublar. O vaxt onlar ölkə Prezidenti, parlamentin spikeri, ədliyyə naziri, AŞPA-da Azərbaycan nümayəndə heyəti, baş prokurorun müavini, Ali və Konstitusiya məhkəmələrinin sədrləri, Dövlət Təhlükəsizlik Xidmətinin rəhbəri və Ombudsman aparatının, həmçinin, vətəndaş cəmiyyətinin təmsilçiləri, o ərəfədə həbsdən çıxmış şəxslər, hüquqşünaslar, müxalifət partiyalarının nümayəndələri ilə görüşmüşlər.
O da məlumdur ki, son dövrlər Ermənistan silahlı qüvvələrinin yaşayış məntəqələrimizi atəşə tutması nəticəsində dinc sakinlərdən ölən və yaralananlar olub. Dinc sakinlərin erməni hərbçiləri tərəfindən qətlə yetirilməsi qarşı tərəfin mülki insanlara qarşı necə amansız olduğunu bir daha sübut etdi. O baxımdan AŞPA Monitorinq Komitəsinin həmməruzəçiləri tərəfindən hazırlanan Azərbaycan üzrə növbəti hesabatda dinc sakinlərin qətlə yetirilməsinin öz əksini tapması nə dərəcədə mümkün və zəruridir?
Məsələyə münasibət bildirən millət vəkili Aydın Mirzəzadənin sözlərinə görə, AŞPA-nın Monitorinq Komitəsi bu məsələyə ciddi yanaşmalıdır: “Ümumən, Azərbaycan Avropa Şurası qarşısında götürdüyü öhdəlikləri yerinə yetirir. Azərbaycan bu məsələdə həmişə beynəlxalq təşkilatlar qarşısında şəffaf olub və bu dəfə də istənilən sualı müzakirə etməyə və aydınlaşdırmağa hazırdır. Digər tərəfdən, doğrudan da məruzəçilər Azərbaycanın bu məsələdə əməkdaşlığını xüsusi qeyd edirlər. Ancaq nəzərə almaq lazımdır ki, Azərbaycan təkcə hesabat verməyəcək. Eyni zamanda, beynəlxalq insan hüquqlarının müdafiəçisi kimi tanınan Avropa Şurasından öz vətəndaşlarının təhlükəsizliyinin də təminatını istəyəcək. Həmməruzəçilərə Ermənistan silahlı qüvvələrinin vaxtaşırı cəbhə xəttinə yaxın ərazilərdə yerləşən yaşayış məntəqələrini atəşə tutmasını da bildirəcək. Bunun nəticəsində yaş yarımlıq Zəhra Quliyevanın və onun nənəsinin qətlə yetirilməsini gündəmə gətirəcək. Bunun məruzəyə salınmasına çalışacaq. Hesab edirik ki, beynəlxalq təşkilat bu məsələyə çox ciddi yanaşmalıdır”.
Vidadi ORDAHALLI
