Qabil Hüseynli: “Onlar bir tərəfdən danışıqlara gəlir, digər tərəfdən isə cəbhədə belə təxribatları törədir ki...”
Ermənistan silahlı qüvvələrinin bölmələri cəbhənin müxtəlif istiqamətlərində iriçaplı pulemyotlardan da istifadə etməklə sutka ərzində atəşkəs rejimini 156 dəfə pozub. Bu barədə Azərbaycan Müdafiə Nazirliyinin mətbuat xidmətindən məlumat verilib.
Ermənistan Respublikası Noyemberyan rayonunun Berdavan, Barekamavan kəndlərində və adsız yüksəkliklərdə, İcevan rayonunun Berkaber, Vazaşen, Paravakar kəndlərində və adsız yüksəkliklərdə yerləşən mövqelərdən Qazax rayonunun Kəmərli, Quşçu Ayrım, Məzəm, Cəfərli, Bala Cəfərli kəndlərində və adsız yüksəkliklərdə, Berd rayonunun Mosesqex, Çinari kəndlərində və adsız yüksəkliklərdə yerləşən mövqelərdən Tovuz rayonunun Əlibəyli və Ağdam kəndlərində, Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonunun Zamanlı kəndində və adsız yüksəkliklərdə yerləşən Azərbaycan Ordusunun mövqeləri atəşə tutulub.
Tərtər rayonunun işğal altında olan Göyarx, Çiləbürt, Ağdam rayonunun Şıxlar, Baş Qərvənd, Cəvahirli, Abdinli, Qaraqaşlı, Kəngərli, Sarıcalı, Novruzlu, Yusifcanlı, Mərzili, Xocavənd rayonunun Kuropatkino, Füzuli rayonunun Aşağı Veysəlli, Qobu Dilağarda, Qərvənd, Qaraxanbəyli, Aşağı Seyidəhmədli, Qorqan, Kürdlər, Horadiz, Cəbrayıl rayonunun Nüzgar və Mehdili kəndləri yaxınlığında, həmçinin Goranboy, Tərtər, Ağdam, Xocavənd və Füzuli rayonları ərazisindəki adsız yüksəkliklərdə yerləşən mövqelərdən də Azərbaycan Silahlı Qüvvələrinin mövqeləri atəşə tutulub.
Ermənilər adətən mühüm danışıqlar ərəfəsində belə təxribatlara əl atırlar. Məqsəd bütün diqqətı məsələnin mahiyyətindən yayındıraraq, təhlükəsizliyə yönəltməkdir.
Məlumdur ki, BMT Baş Assambleyasının 72-ci sessiyasının rəsmi açılışı sentyabrın 12-də Nyu-Yorkda keçiriləcək. Ənənəvi ümumi müzakirələr sentyabrın 19-dan 25-dək baş tutacaq. Dağlıq Qarabağ münaqişəsi üzrə ATƏT-in Minsk Qrupunun həmsədrləri Nyu-Yorkda Baş Assambleyanın sessiyasının açılışı zamanı Azərbaycan və Ermənistan xarici işlər nazirləri ilə görüş keçirməyi planlaşdırır. Ermənilərin cəbhədə törətdiyi təxribat həmin görüşü pozmağa yönələ bilərmi?
Politoloq Qabil Hüseynli qəzetimizə bildirdi ki, Ermənistanın davranışları sübut edir ki, onlar nə beynəlxalq hüququ sayır, nə də hər hansı hərəkətinin məsuliyyətini hiss edir: ”Ermənistanın cəbhədə törətdiyi son təxribatlar hər zaman məqsədli olub. Fikir versəniz görərsiniz ki, Azərbaycan mühüm tədbirlərə ev sahibliyi edəndə və ya sülh danışıqlarında aktivlik nəzərə çarpanda belə təxribatlar intensivləşməyə başlayır.
Ermənistan daha çox dünya ictimaiyyətinin nəzərində qalmaq və diqqəti təhlükəsizliyə cəkmək üçün bu cəhdləri göstərir. Həm cəbhədə təxribat törədir, həm də informasiya təxribatı aparır. Bunu da erməni silahlı birləşmələrinin Azərbaycan ərazisindəki ayrı-ayrı dəstələri dinc azərbaycanlıları hədəf götürməklə də edir. Hərbi təxribatlar Ermənistan üçün əsas alətə çevrilib.
Ermənistan heç vaxt danışıqlarda konstruktiv mövqe tutmayıb. Bunu dünya ictimaiyyəti də bilir ki, Ermənistan hazırkı status-kvonun saxlanmasına cəhd edir. Bizim sülh danışıqlarındakı iştirak məqsədimizlə Ermənistanınkı bir-birilə uzlaşmır. Onlar bir tərəfdən danışıqlara gəlir, digər tərəfdən isə cəbhədə belə təxribatları törədir ki, proses pozulsun, status-kvo saxlansın. Ermənistanın niyyəti budur”.
Məhəmmədəli QƏRİBLİ
