Elşən Mustafayev: “Azərbaycanın regiondakı rolu, potensialı Ermənistanla müqayisədə çox böyük və önəmlidir”
Soçidə Rusiya prezidenti Vladimir Putinin erməni həmkarı Serj Sarkisyanla görüşü başa çatıb. Rusiya KİV-lərinin yaydığı məlumata görə, görüşdə prezidentlər Dağlıq Qarabağ münaqişəsi ətrafında fikir mübadiləsi aparıblar. Bundan əlavə, Avrasiya İqtisadi Birliyi və Kollektiv Təhlükəsizlik Müqaviləsi Təşkilatına dair məsələlər müzakirə edilib.
“Biz siyasi dialoqu intensiv şəkildə davam etdiririk, iqtisadiyyat, təhlükəsizlik və hərb işi sahəsində qarşılıqlı əməkdaşlıq mövcuddur. Biz, həmçinin, beynəlxalq təşkilatlar və birliklər çərçivəsində aktiv əməkdaşlıq edirik”, - deyə Putin vurğulayıb.
Qeyd edək ki, bir müddət əvvəl məhz Soçi şəhərində İlham Əliyevlə Putin arasında görüş keçirildi. Ermənistan hakimiyyəti və diasporu həmin vaxt Rusiya-Azərbaycan yaxınlaşmasından ciddi narahatlıq keçirərək, rəsmi Moskvanın ölkəmizlə əlaqələrə verdiyi önəmdən böyük narahatlıqlarını büruzə verdilər. Məhz bu səbəbdən də erməni diasporu dəridən-qabıqdan çıxaraq, İlham Əliyev-Putin görüşünün effektini azaltmaq və guya Ermənistanla Rusiya arasındakı münasibətlərdə problemin olmadığını qabartmaq üçün Sarkisyanın Soçiyə çağırılmasına nail oldular.
Bu gedişatla onlar istəyinə çata bildimi?
Politoloq Elşən Mustafayev qəzetimizə bildirdi ki, ermənilərin etdiyi bu səy onlara lazım olan nəticəni vermədi: ”Xatırlayırsınızsa, Azərbaycan Prezidenti İlham Əliyev iyulun 21-də Soçiyə səfərində Rusiya prezidenti Vladimir Putinlə ikitərəfli münasibətlər çərçivəsində bir sıra məsələləri müzakirə edib. Ermənistan tərəfi bundan böyük narahatlıq keçirdi. Hətta öz mətbuatlarında bunu Rusiyanın Ermənistana etdiyi xəyanət səviyyəsində belə dəyərləndirdilər. Zorla da olsa prezidentlərinin Putinlə görüşünə nail oldular. Ancaq bununla Putin-İlham Əliyev görüşünün effektini azaltmaq və ya mahiyyəti eyniləşdirmək mümkün deyil. Azərbaycanın regiondakı rolu, potensialı Ermənistanla müqayisədə çox böyük və önəmlidir. Bizimlə müzakirə edilən məsələlərin siyahısı olduqca çox böyük olub. Çünki Azərbaycan regionda kifayət qədər mühüm rol oynayır və Rusiya üçün burada müəyyən strateji məsələlərdə çox yaxın tərəfdaş ölkə hesab edilir. Xüsusilə ortalıqda “Şimal-Cənub” dəhlizinin reallaşması, regionda birgə enerji layihələrinin həyata keçirilməsi, regiondakı destruktiv proseslərlə birgə mübarizə aparılması, Xəzər dənizi və digər məsələlər var. Bu uzun siyahıdakı vacib mövzulardan biri də Qarabağ məsələsidir.
İndi də gəlin baxaq, Rusiya Ermənistanla hansı mövzuları müzakirə edə bilər? Bunlar cəmi 3-4 məsələdir. Ona görə də onların arasında Qarabağ probleminin həllinin olması təbiidir və bu məsələ xüsusi çəkiyə malikdir. Düşünürəm ki, Putin-Sarkisyan görüşündə bu məsələyə daha çox diqqət yetirilib. Hazırda Ermənistanın sərgilədiyi mövqe isə Rusiyanın maraqlarına ziddir. Qarabağ probleminin həllinə gəldikdə, çox güman ki, Ermənistan tərəfi yenə də Rusiya ilə Azərbaycan arasındakı hərbi-texniki əməkdaşlıqdan narahatlığını bildirib. Bu kontekstdən Rusiya çox güman ki, yenə də Ermənistana tövsiyə edib ki, öz siyasətinə, Qarabağ münaqişəsi ilə bağlı son mövqeyinə göz gəzdirsin və müəyyən güzəştlər haqqında predmetli düşünsün”.
Məhəmmədəli QƏRİBLİ
