Ermənistan müttəfiqi adlandırdığı Rusiyanın gərgin münasibətlərdə olduğu NATO və Avropa İttifaqı ilə əməkdaşlığı genişləndirməklə özünün ikiüzlü siyasətini bir daha ortaya qoyur. Bunu Trend-ə Milli Məclisin deputatı Rauf Əliyev deyib.
Deputat bildirib ki, Ermənistan öz təcavüzkar siyasəti nəticəsində regionda təcrid olunmuş vəziyyətə düşdüyündən vaxtaşırı belə variantlara əl atır: “NATO-nun Gürcüstanda keçirilən təlimlərinə qatılmaqla Ermənistan uzun illərdən bəri apardığı ikiüzlü siyasəti davam etdirir. Ancaq bütün dünyaya bəllidir ki, Ermənistan faktiki olaraq tam şəkildə Rusiyanın nəzarəti altındadır. İndi dünyada Rusiyaya qarşı müəyyən təzyiqlər, sanksiyalar tətbiq olunduğuna görə Ermənistan çalışır ki, özünə daha güclü havadarlar tapsın, tədricən Rusiyadan uzaqlaşsın. Yəni Ermənistan hakimiyyəti hər an öz müttəfiqini satmağa hazır ikiüzlü rejim olduğunu bir daha göstərir. Təbii ki, Avropa da, Rusiya da Ermənistanın bu ikiüzlü siyasətini görür”.
Deputat vurğulayıb ki, Ermənistan rəhbərliyinin bu cəhdləri əbəsdir: “Onlar anlamalıdırlar ki, düşdükləri fəlakətli vəziyyətdən çıxış yolu qonşu dövlətlərə, ilk növbədə, Azərbaycana qarşı təcavüzkar siyasətdən əl çəkməkdən, işğal olunmuş torpaqların qeyd-şərtsiz boşaldılmasından keçir. Əks təqdirdə, Azərbaycan Ordusu işğal olunmuş torpaqları azad etməyə tam hazırdır”.
“Bu gün Rusiyaya qarşı tətbiq edilən sanksiyalar, təzyiqlər fonunda Ermənistan Rusiyadan uzaqlaşmaq istəyir”. Bunu isə Milli Məclisin deputatı Elman Nəsirov deyib.
E.Nəsirovun sözlərinə görə, NATO-nun keçirdiyi hərbi təlimlərə qatılması onu təsdiq edir ki, Ermənistan hər cür satqınlığa hazırdır: "Rusiya-NATO münasibətləri olduqca bərbad vəziyyətdədir və bir çox hallarda hətta düşmən münasibətlərindən söhbət gedir. NATO Rusiyanı özü üçün ən ciddi təhlükə mənbəyi hesab edir və eyni zamanda Rusiya da NATO-ya eyni mövqedən yanaşır. Belə olan vəziyyətdə özünü Rusiyanın müttəfiqi sayan Ermənistanın NATO ilə əməkdaşlıq etməsi, onun hərbi təlimlərinə qatılması bir məlum həqiqəti növbəti dəfə təsdiqləmiş olur - Ermənistanda bir xunta rejimi oturub və həmin xunta rejimi hər cür satqınlığa hazırdır".
Deputat vurğulayıb ki, bu hadisə Rusiya ictimaiyyəti, Rusiya hakimiyyəti üçün də bir həqiqəti növbəti dəfə təsdiqləyir: "Heç vaxt Ermənistandakı hakimiyyətə etibar etmək olmaz. Ermənistanın satqın mövqeyini Avropada da, Rusiyada da çox gözəl bilirlər. 3 il müddətində Ermənistan Avropa İttifaqı ilə assosiativ sazişlə bağlı danışıqlar apardı və 2013-cü ilin sentyabr ayında Sarkisyanın Moskvaya səfərinin ardınca danışıqların üzərindən xətt çəkildi, Ermənistan 3 illik danışıqlardan imtina etdi və Sarkisyan müsahibələrinin birində qeyd etdi ki, bu, bir gecənin qərarı olub. İndi də o, NATO ilə, Avropa İttifaqı ilə əməkdaşlığı genişləndirib. Bu nə zaman baş verib? Rusiyaya qarşı NATO-dan, Avropadan, ABŞ-dan gələn təzyiqlər və sanksiyalar fonunda baş verib. Rusiya da yaxşı bilir ki, Ermənistan hakimiyyəti etibarlı deyil. Bu gün dost olar, sabah isə düşmən mövqeyində dayana bilər".
