“Ermənistan guya Rusiyaya təzyiq etmək istəyir ki...”
Ermənistanın nümayiş etdirdiyi son davranışları qəribə mənzərə yaradıb. Hiss edilir ki, o əzəli müttəfiqi olan Rusiyanı satmaq istəyir. Rusiya-Azərbaycan münasibətlərinin inkişaf etməsi, strateji əməkdaşlığa qalxması fonunda Ermənistan yenə də ikibaşlı oyun oynamağa çalışır.
Bir tərəfdən Kollektiv Təhlükəsizlik Müqaviləsi Təşkilatına üzv olur, digər tərəfdən NATO ilə təlimlərə qoşulur, dərin əməkdaşlığa cəhd edir, gizli danışıqlar aparır. Ermənistan iyulun 30-dan avqustun 12-dək Gürcüstanda NATO çərçivəsində keçirilən "Layiqli tərəfdaş - 2017" təlimlərinə qatıldı. Halbuki, Azərbaycan bu hərbi təlimdə iştirakdan imtina etdi. Ermənistan Rumıniyada keçirilən tədbirlərə də qatıldı. Ekspertlər hesab edirlər ki, Ermənistan axırda xəyanətkar mövqeyinə görə bu və ya digər şəkildə cəzalandırıla bilər. Rusiyanın Ermənistanın siyasi, hərbi və iqtisadi həyatında çox böyük nüfuzu var. Bu sahələr Ermənistanda, demək olar ki, Rusiyanın nəzarəti altındadır.
Arxalanmaq üçün yeni güc axtarışı Ermənistana gələcək üçün nə vəd edir?
Ekspert Aqşin Əliyev qəzetimizə bildirdi ki, ermənilərin yeri gələndə Rusiyaya da xəyanət edərək özlərinə yeni ağa axtarmağa başlaması təəccüblü deyil: “Hazırda Rusiya əleyhinə danışan erməni siyasətçiləri Ermənistan cəmiyyətində kifayət qədər nüfuza malik adamlardır. Onların Rusiyaya münasibətdə "Əgər bizi ikinci plana salacaqlarsa, biz də siyasətimizə baxacağıq, kimə lazım olsaq, ora gedəcəyik" kimi bəyanatlarının arxasında müəyyən həqiqətlər var. Rusiya Azərbaycanla sıx əlaqələr saxlamağa, onun maraqlarını təmin etməyə məhkumdur, onun indiki situasiyada bu istiqamətdə başqa yolu yoxdur. Azərbaycan və onun Prezidenti özünün çox uğurlu xarici siyasəti, diplomatik fəaliyyəti ilə bu gün dünya siyasətini müəyyən edən, yönəldən, istiqamətləndirən dövlətlərlə çox normal münasibətlər yarada bilib. Azərbaycanın da maraqlarını o dövlətlər birmənalı şəkildə qəbul edir, siyasətini dəstəkləyirlər. Belə olan halda, Moskva da, təbii ki, Azərbaycana qarşı hansısa başqa bir mövqedə ola bilməz.
Rusiya məcburdur ki, Azərbaycanla normal münasibətlər qursun. Azərbaycanla normal münasibətlərin qurulması Rusiyanın Qafqazdakı nüfuzuna müsbət mənada zəmin yaradır. Çünki Şimali Qafqaz xalqlarının hamısı Azərbaycanı istəyən, ölkəmizə böyük rəğbətlə yanaşan xalqlardır. Rusiyanın Ermənistana münasibətinə gəldikdə isə, onu vurğulayım ki, Moskva Azərbaycana müstəqil dövlət kimi yanaşdığı halda, İrəvana münasibəti isə tam fərqlidir. Moskvada Ermənistana sanki Rusiyanın bir əyaləti kimi yanaşırlar. Ermənistanın müstəqilliyi faktiki olaraq şərtidir. İrəvan istəsə də Rusiyanın maraq dairəsindən çıxa bilməyəcək. Kreml də heç bir vəchlə Ermənistanı tərk etmək fikrində deyil. Sadəcə olaraq, Moskvanın Bakı ilə yaxınlaşması İrəvanı qıcıqlandırdığından, Ermənistan guya Rusiyaya təzyiq etmək istəyir ki, Kreml bu siyasətindən çəkinsin, Azərbaycana silah satmağı dayandırsın. Lakin onlar buna da nail olmayacaqlar. Çünki Moskva heç zaman Ermənistanın fikrilə hesablaşmayıb, onun öz marağı var”.
Məhəmmədəli QƏRİBLİ
