Natiq Miri: "Müharibə şəraitində olan dövlətlərin başçılarının görüşməsi üçün hansısa məqamlar və baxış mövqeləri razılaşdırılmalıdır"
Soçidə Rusiyanın dövlət başçısı Vladimir Putinin Ermənistan prezidenti Serj Sarkisyanla görüşü keçirilib. Bu barədə Rusiya prezidentinin mətbuat xidməti məlumat yayıb. Ermənistan və Rusiya prezidentləri arasında keçirilən görüşdə iki ölkə başçısı Rusiya-Ermənistan münasibətlərinin aktual məsələlərini, o cümlədən Avrasiya İttifaqı və KTMT çərçivəsində tərəfdaşlıq perspektivlərini, beynəlxalq və regional problemlər ətrafında müzakirə aparıblar.
Bu görüş Dağlıq Qarabağ probleminin həlli üçün yeni nəsə vəd edirmi?
Politoloq Natiq Miri Putinin Azərbaycan və Ermənistan prezidentləri ilə ayrılıqda görüş təşkil etməsinin iki məqsədi olduğunu bildirdi: "Rusiya prezidentinin xüsusilə Dağlıq Qarabağ münaqişəsi tərəflərilə təkbətək görüş təşkil etməsi çox xoşagəlməz haldır. Rusiyanın bu siyasəti həm görüntü xarakteri daşıyır, həm də onun geosiyası maraqlarına xidmət edir. Putin bununla göstərmək istəyir ki, Qarabağ probleminin əsas moderatoru, həlledici siyasi faktoru hələ də odur. İkinci səbəb ondan ibarətdir ki, Rusiya təkbətək görüşləri öz ərazisində keçirməklə Cənubi Qafqazdakı təsir gücünü digər dünya güclərinə nümayiş etdirməyə çalışır".
Natiq Miri Soçi görüşündə Dağlıq Qarabağ probleminin həllinə dair aparılan müzakirələrin heç bir nəticəsi olmayacağını qeyd etdi: "Putinin münaqişəli ölkələrin prezidentləri ilə görüşü Dağlıq Qarabağ məsələsinə heç də yaxşı təsir göstərməyəcək. Bu görüşlər problemin həllinə yardım etməkdən daha çox Dağlıq Qarabağ problemindən istifadə edərək müəyyən manipulyasiya həyata keçirilməsinə xidmət edir. Mən düşünmürəm ki, Vladimir Putin Serj Sarkisyanla planlaşdırılmış görüşündə Ermənistana hər hansı təzyiqlər ünvanlasın. Əksinə, bu görüşün süni xarakter daşıdığını və sülh danışıqları adı ilə bir çox məsələni pərdələdiyini güman edirəm. Görüş Dağlıq Qarabağ probleminin sülh yolu ilə həllinin gecikdirilməsinə xidmət edir. Bu durum da, təbii olaraq, Azərbaycanın siyasi maraqlarına uyğun deyil. Məhz bu səbəbdən Rusiya prezidentinin Ermənistan prezidenti ilə görüşündən müsbətə doğru hər hansı irəliləyiş gözləmirəm. Müharibə şəraitində olan dövlətlərin başçılarının görüşməsi üçün hansısa məqamlar və baxış mövqeləri razılaşdırılmalıdır. Bu gün Azərbaycan və Ermənistan prezidentləri arasında Dağlıq Qarabağ probleminin həlli ilə bağlı bütün məqamlar daban-dabana ziddir. Hər hansı məqam razılaşdırılmadan bir görüşün keçirilməsi müzakirə mövzusu ola bilməz".
Məhəmmədəli QƏRİBLİ
