Ramil Hüseynov: "Maraqlar tələb edəndə terror təşkilatına qarşı birgə mübarizə aparmaq hər zaman mümkündür"
Yayılan məlumatlara görə, Türkiyə və İran İraqın şimalında mərhələli şəkildə PKK terror təşkilatına qarşı birgə hərbi əməliyyatlar aparmağı planlaşdırırlar.
İlk mərhələdə Türkiyə Hərbi Hava Qüvvələri Zap, Bervari, Batufa, Çemçu və Avaşin rayonlarında PKK-nın 19 mövqeyini bombalayacaq. Əməliyyatların İraq ərazisində, Türkiyə sərhədindən 19 km məsafədə keçiriləcəyi deyilir. Bu mərhələnin 8-10 gün ərzində icra olunacağı bildirilir. İkinci mərhələdə isə İran Silahlı Qüvvələri İraqın şimalındakı Qəndil dağında quru əməliyyatlarına başlayacaq.
İranın bu əməliyyatlara 42 min hərbçi cəlb edəcəyi gözlənir. Türkiyə HHQ isə İran ordusuna havadan dəstək verəcək.
Bu arada Türkiyə prezidenti Rəcəb Tayyib Ərdoğan İordaniyaya səfəri öncəsi bəyan edib ki, İran və Türkiyə regiondakı terror təşkilatlarına qarşı birgə hərbi əməliyyatlara başlaya bilər. Onun sözlərinə görə, əməliyyatların detalları bundan əvvəl iki ölkənin Baş Qərargah rəisləri arasında müzakirə olunub.
Məlumat üçün qeyd edək ki, Qəndil dağının bir hissəsi İraqda, digər hissəsi də İranda yerləşir. Türkiyəyə yaxın olan sözügedən dağda PKK-ın əsas bazaları yerləşir. Eyni zamanda, PKK-nın aparıcı fiqurları məhz Qəndil dağında fəaliyyət göstərərək terror təşkilatını idarə edirlər. Bu baxımdan İranla Türkiyə PKK-ya qarşı birgə bübarizə aparsa, bunun müyyən effekti ola bilər. Maraqlıldır, bəs ekspertlərin bununla bağlı fikirləri nədən ibarətdir? Birgə mübarizənin nə kimi nəticəsi ola bilər?
Məsələyə münasibət bildirən VİP-in sədr müavini Ramil Hüseynovun sözlərinə görə, İran həqiqətən də bu məsələdə Türkiyə ilə birgə fəaliyyət göstərsə, bu, PKK-ya güclü zərbə olacaq: "Ancaq İranın bu məsələdə nə dərəcədə qərarlı olacağını demək çətindir. Çünki mətbuatda gedən məlumatlara görə, İrandakı bəzi dairələr belə bir razılaşmanın olmasını inkar edirlər. Ancaq İran bu işə öz töhfəsini versə, o zaman PKK-nın vəziyyəti daha da pisləşəcək. Çünki bəzi dövrlərdə PKK terrorçuları İran ərazisindən Türkiyəyə sızıb terror aktı törədiblər. PKK bu günə qədər ona görə tam sıradan çıxarılmayıb ki, ona müəyyən dairələr zaman-zaman müxtəlif dəstək veriblər. PKK-dan Türkiyəyə qarşı zaman-zaman istifadə olunub. Məqsəd Türkiyənin regionda aparıcı güc mərkəzi olmasının qarşısını almaq olub. Hətta silah və maliyyə baxımından bəzi region dövlətləri PKK-ya dəstək veriblər. Ancaq o da var ki, PKK-nın varlığı təkcə Türkiyə üçün deyil, İran üçün də təhdiddir. İran bunu bilir və bu təhlükənin fərqindədir. Fikrimcə, regionda iki dövlət arasında tarixən mövcud olan rəqabət səbəbindən, müxtəlif dövrlərdə rəsmi Tehran PKK-nın fəaliyyətinə göz yumub. Ancaq nəzərə almaq lazımdır ki, siyasətdə daimi heç nə yoxdur. Maraqlar tələb edəndə terror təşkilatına qarşı birgə mübarizə aparmaq hər zaman mümkündür". Vidadi ORDAHALLI
